د لاسرسي ځای

تازه خبر

خبرونه

د کلبوشن یادو ښځه او مور پاکستان ته ځي

د پاکستان د بهرنیو چارو وزارت وايي، د جاسوسۍ په تور د بندي هندي وګړي کلبوشن یادو ښځه او مور د ګل پر ورځ پاکستان ته ځي.

د وزارت ویاند ډاکتر محمد فیصل د شنبې پر ورځ پر ټوېټر پاڼه په یوه بیان کې لیکي، نوي ډیلي ورته ورکړی چې د یادو کورنۍ به هم د ډېسېمبر پر ۲۵مه هند ته ستنېږي. پاکستاني حکومت د روانۍ اوونۍ په لومړیو کې د یادو ښځې او مور ته ویزې ورکړې چې له هغه سره په زندان کې وویني. یادو د ۲۰۱۶ز کال په مارچ کې په بلوچستان کې نیول شوی او ورباندې د جاسوسۍ تور پورې شوی وو. د پاکستان پوځي عدالت هغه ته د مرګ سزا اورولې.

See all News Updates of the Day

چارواکي وايي په غزني کې پراخه پوځي عملیات پیلوي

په غزني کې د افغان ځواکونو عملیات به په لنډ وخت کې پیل شي

د افغانستان په غزني ولایت چارواکي وايي، په لنډ وخت کې به په دې ولایت کې پراخه پوځي عملیات پیل شي.

د غزني والي وحید الله کلیمزي د جنورۍ پر۱۶مه مشال راډیو ته وویل چې تازه له کابله ستون شوی او هلته ولسمشر اشرف غني په دې برخه کې ژمنه ورسره کړې ده.

هغه زياته کړه چې ولسمشر د امنیت ډاډ ورکړی چې هغه ولسوالي سقوط شوې دي، ځیني لویې لارې چې ناامنه دي او وسله وال طالبان هلته موجود دي په دې اړه به عملیات پيل شي.

کلیمزي دا و نه ویل چې عملیات به کله پیلېږي.

د غزني پکتیکا لویه لار وسله والو طالبانو په لاس کې ده او د غزني-کندهار لویې لارې ته هم هر وخت طالبان ورځي.

د دغه ولایت په ۱۸ولسوالیو کې د اکثرو امنیت ښه نه دی.

د برتانیې وزیراعظمې ټیریزا مې له پارلېمانه د باور رایه واخیسته

ټیریزا مې د نتیجې هرکلی کړی

د بریتانیا د وزيراعظمې ضد په پارلېمان کې د بې باورۍ اقدام ناکامه شوی دی.

تر دې مخکې د جنورۍ پر ۱۵مه د پارلېمان مطلق اکثریت له اروپایي ټولنې د هغې د وتلو پلان رد کړی وو.

د دې له کبله د اپوزيشن کارګرانو یا لېبر ګوند په پارلېمان کې د ټیریزا مې ضد بې باورۍ تحریک داخل کړ.

خو د جنورۍ ۱۶مې پر ماخوستن، د ټیریزا مې په حق کې ۳۲۵ او مخالفت کې يې ۳۰۶ غړو رایې ورکړې او هغه پر خپله دنده پاتې شوه.

نوموړې تر دې وروسته په وینا کې د نتیجې هرکلی وکړ او ژمنه یې وکړه چې له اروپايي ټولنې څخه د برتانیې ایستلو هڅو ته دوام ورکوي.

له قانون سره سم، برتانیا باید د مارچ تر ۲۹مې له اروپايي ټولنې ووځي.

یو شمېر کتونکي فکر کوي چې ښایي مې له ټولنې څخه د وتلو نېټه وځنډوي او یا بیا پر دې موضوع ټولپوښتنه وکړي.

امریکا د ځمکې مدار ته د ایرانۍ سپوږمکۍ استولو هڅه غندلې

امریکا د ایران له لوري د ځمکې مدار ته د سپوږمکۍ لېږدولو هڅه غندلې او خبرداری یې کړی چې واشنګټن له نړیوالو ارزښتونو څخه د ایران د دې بشپړې سرغړونې پلوي نه کوي.

د امریکا د بهرنیو چارو وزیر مایک پامپېو تر هغې څو ساعته وروسته بیان ورکړ چې ایران د جنورۍ پر ۱۵مه وویل، په یوه سپوږمکۍ یا سیټېلایټ سمبال راکټ یې له ځمکې خلا ته د استولو هڅه کړې چې ناکامه شوې.

د ایران دا هڅه او د امریکا سخت غبرګون په سیمه کې د ترینګلتیا زیاتېدو ته اشاره کوي.

واشنګټن غواړي پر تهران د اټومي او توغندیو پروګرامونو پر سر فشار زیات کړي.

د برتانیا پارلېمان د وزیراعظمې پلان رد کړ

ټیریزا مې له اروپايي ټولنې څخه د وتلو په اړه وینا وکړه

له اروپايي ټولنې څخه د وتلو یا برېګزیټ په اړه د وزیراعظمې ټیریزا مې پلان یا طرحه د برتانیې پارلېمان په غوڅ اکثریت رد کړه.

د پارلېمان ۲۰۲ استازو د طرحې په حق او ۴۳۲ یې په مخالفت کې رایې ورکړې.

دا د برتانیې په پارلېماني تاریخ کې ستره ماتې بلل کېږي.

د جنورۍ پر ۱۵مه، تر دې بدلون وروسته د اپوزیشن مشر جېرمي کوربېن غوښتنه کړې ده چې وزیراعظمه مې دې له پارلېمانه یو ځل بیا د باور رایه ترلاسه کړي.

ټاکل شوې نوموړې د جنورۍ پر۱۶مه له پارلېمانه د باور رایه وغواړي.

د ۲۰۱۶ز کال په جون کې په برتانیا کې له اروپایي ټولنې د وتلو په اړه ټولپوښتنه شوې وه چې خلکو په اکثریت د وتلو په حق کې رایې کارولې وې.

د کینیا پر هوټل په برید کې ۱۵ کسان وژل شوي

برید د پلازمېنې نایروبي په هغه سیمه کې شوی چې پکې بهرنیان اوسي او کار کوي

د کینیا چارواکي وايي، په پلازمېنه نایروبي کې پر یوه مجلل (پینځه ستوریز) هوټل د جنورۍ پر ۱۵مه په وسله وال برید کې د وژل شویو شمېر ۱۵ ته رسېدلی.

په وژلو کې ۱۱کینیايان، یو برتانیوی او یو امریکايی شامل دي.

د دې برید ذمه واري په القاعدې پورې ټړلې وسله والې ډلې الشباب منلې.

د کینیا د کورنیو چارو وزیر فرید ماتیانجي ویلي چې اوس د هوټل ودانۍ د پوځیانو په کنټرول کې ده او لسګونه کسان له سیمې ایستل شوي دي.

بریدګرو په هوټل کې ډزې کړي او د چاودنو غږونه اورېدل شوي.

د ۲۰۱۳ز کال په سېپټېمبر کې الشباب ډلې په نایروبي کې پر یوه لوی پلورنځای برید وکړ او تر درو ورځو یې خلک یرغمل کړي ول چې پکې ۶۷ کسان وژل شوي دي.

بريتانوی پارلېمان له اروپايي اتحاديې د وتلو پر وړانديز وروستۍ رايې ورکوي

د بریتانیا پارلېمان.

ټاکل شوې چې د جنورۍ پر ۱۵مه د بریتانیا پارلېمان برېګزيټ یا د حکومت هغه وړانديز ته رایې ورکړي چې له مخې یې دا هېواد له اروپايي اتحادیې وځي.

دا په ‌داسې حال کې ده چې وزيراعظمې تېريزا مې تر وروستۍ شېبې پورې د دې وړانديز د ملاتړ لپاره د رایو ترلاسه کولو هڅه وکړه.

د بریتانیا د عوامو په جرګه کې نننۍ رایې د هغو هڅو په لړ کې وروستۍ دي چې هدف‌یې د برېګزيټ بریالي کول دي خو زياتره سیاسي کارپوهان اټکل کوي چې ښايي دا هڅې ناکامې شي.

مېرمن مې د جنورۍ پر ۱۴مه خبرداری ورکړ چې که د عوامو جرګه دا وړانديز رد کړي، نو له اروپايي اتحادیې د بریتانیا د وتلو پلان به زیانمن شي.

هغې زیاته کړه چې د دې طرحې رد به د بریتانیا د خلکو له رایې سره خیانت وي.

د روان ۲۰۱۹م کال د مارچ ۲۹مه هغه مهلت دی چې بریتانیا باید په رسمي توګه له اروپايي ټولنې ووځي.

که دا وړانديز نن رد شي، نو د برېګزېټ برخلیک به هم مبهم پاتې شي.

د کورمې په بازارونو کې د بجلۍ ميټرې لګول پېل شوې

په کورمه کې د بجلۍ میټرې لګول پیل شوې.

په کورمه کې په مارکېټونو او دوکانونو کې د بجلۍ ميټرې لګول پېل شوي دي.

د هنګو ډيويژن د بجلۍ محکمې مشر ابرار حسېن د جنورۍ پر ۱۴مه مشال راډیو ته وويل چې اوس به خلک د خېبر پښتونخوا د نورو ضلعو په شان هره میاشت د بجلۍ بلونه جمع کوي.

د سیمې د بجلۍ محکمه وایي تر اوسه یې یوازې په صده ښار کې تر ۴۰۰ زیات د بجلۍ میټرې لګوللې دي.

بلخوا خلک وایي په سیمه کې د بجلۍ له سخت لوډشېډنګ سره مخامخ دي او حکومت بايد په لومړي سر کې دغه ستونزه هواره کړي.

کوهستان کې د کمر پرېوتو له کبله اته مزدوران مړه شوي

کوهستان.

د خېبر پښتونخوا د کوهستان داسو سيمه کې له یو غر څخه د کمر پرېوتو له وجې اته مزدوران مړه شوي دي.

د کوهستان د پوليسو مشر عبدالصبور د جنورۍ پر ۱۵مه مشال راډيو ته وويل چې پېښه تېره شپه هغه وخت مخې ته راغله چې دغو مزدورانو د داسو پاور پراجيکټ په نامه له یوې چینایي کمپنۍ سره تر کار کولو وروسته کمېلې سیمې ته تلل چې دقراقرم پر لويه لاره یې پر ګاډي له غره څخه ملبه راپرېوته او په ګاډي کې سپاره اته واړه مزدوران مړه شول.

بلخوا د سیمې خلک وایي چې د چاينا پاور پراجيکټ او چين پاکستان اقتصادي راهدارۍ لاندې په روانو منصوبو کې د مزدورانو د ژوند خوندي ساتلو او نورو حفاظتي تدابيرو ته هېڅ پام نه کېږي.

سوات کې د پوليسو د رويې پر ضد شکايتي مرکز پرانيستل شوی

د سوات نقشه.

د سوات په سیدو شریف کې د پولیسو د رویې خلاف د شکایت درجولو لومړی مرکز پرانستل شوی دی.

د ملاکنډ پولیسو مشر محمد سعید خان وزیر د جنورۍ پر۱۴مه د دغه مرکز د پرانيستې پر وخت مشال راډیو ته وویل چې د دا ډول مرکزونو د پرانيستلو مقصد پولیس د خپلو اختیاراتو له غلط استعمال څخه راګرځول دی.

سعيد وزير زياته کړه، په دغه مرکز کې به یو پولیس افسر ناست وي او د خلکو شکایتونه به درج کوي.

د نوموړي په وينا خلک کولی شي چې د اي مېل او موبایل پېغام له لارې هم خپل شکایت درج کړي.

ریاض د جمال خاشقجي د وژونکو احتساب هوډ کړی: پامپېو

د امریکا د بهرنیو چارو وزیر مایک پامپېو (کیڼ) په ریاض کې له شهزاده محمد بن سلمان سره ویني

د امریکا د بهرنیو چارو وزیر مایک پامپېو ویلي، سعودي واکدارانو بیا هوډ کړی دی چې د خبریال جمال خاشقجي د وژونکو محاسبه به کوي.

نوموړي د جنورۍ پر ۱۴مه له سعودي پاچا سلمان او شهزاده محمد بن سلمان سره تر لیدو وروسته وویل، دواړو مشرانو د احتساب پر اړتیا ټینګار کړی.

دی وویل، واشنګټن له ریاضه تمه لري چې په وژنه کې د ککړ هر کس احتساب وکړي.

د امریکا د استخباراتو مرکزي ادارې سي ای اې په خپله ارزونه کې پر شهزاده سلمان تور پورې کړی چې د خاشقجي د وژنې امر یې کړی وو.

سعودي چارواکي دا تور ردوي.

خاشقجي د ۲۰۱۸ز کال د اکتوبر پر دویمه په استنبول کې د سعودي عرب په کونسلګرۍ کې وژل شوی وو.

جمال خاشقجي د سعودي شاهي کورنۍ له سختو ناقدانو څخه وو.

ریاض وايي، د نوموړي د وژنې په تور پر ۱۱ کسانو مقدمه چلوي.

ترکیې په بیا بیا له ریاضه غوښتنه کړې چې تورن کسان دې وروسپاري.

د امریکا ولسمشر د حکومت د بندیز جاري ساتلو خبرداری ورکړ

ولسمشر ټرمپ

د امریکا ولسمشر ډونلډ ټرمپ د حکومت په جزوي توګه د بندیز جاري پاتې کېدو خبرداری ورکړی دی.

دا د هېواد په تاریخ کې لومړی ځل دی چې حکومت تر دومره اوږدې مودې پورې بند پاتې کېږي. ولسمشر ټرمپ د دې تور په ډېموکریټ ګوند پورې کوي.

نوموړي د جنورۍ پر ۱۲مه په خپل یو ټویټر پیغام کې وویل، دا لړۍ به ترهغې جاري وي چې د ډیموکرېټ ګوند غړي له رخصتیو ستانه شي او کار شروع کړي.

د جنورۍ پر ۱۱مه د کانګریس د استازو د جرګې او د سېنېټ د غړو غونډې د اونیزې رخصتۍ لپاره و ځنډیدې او تمه ده چې له ګل ورځې څخه به بیا کار شروع کړي.

په جزوي توګه د دې بندیز په نتیجه کې، د وفاقي حکومت خوا و شا ۸۰۰ زره کارکوونکي یا بې کاره ناست دي او یا هم له تنخا بغیر کار کوي.

د بجټ په منظورۍ کې دا ستونزه له هغې وروسته شروع شوه چې ولسمشر ټرمپ له میکسیکو سره پر پوله د دیوال جوړولو لپاره له کانګریس نه پنځه اربه ډالر و غوښتل خو ډیموکریټ ګوند ورسره دا خبره و نه منله.

کاناډا سعودۍ نجلۍ ته پنا ورکړه

راهف محمد القونون

د کاناډا حکومت هغې ۱۸ کلنې سعودۍ نجلۍ ته پنا ورکړې چې ادعا یې کړې وه که خپل وطن ته ستنه شي نو د کورنۍ لخوا به یې ووژل شي.

دغه نجلۍ چې راهف محمد القونون نومېږي، په ټولينزو رسنيو له کمپاين پيلولو وروسته د نړیوالو پام ځان ته ګرځولی وو.

د کاناډا د بهرنيو چارو وزير د جنورۍ پر ۱۲مه، په ټورننټو هوايي ډګر کې د راهف القونون هرکلی وکړ. تر دې مخکې د یاد هیواد وزيراعظم اعلان کړی وو چې دغه سعودۍ نجلۍ به د کډوالې په توګه ومني.

د راهف قضيي په سعودي عرب کې د مېرمنو د حقونو په اړه بحثونه راپارولي دي. ګومان کېږي چې ډیرې ښځې د خپلو کورنیو لخوا د ناسم چلند له وجې تښتیدلې دي او په دې وروستیو کلونو کې په بهرنیو هیوادونو کې د پنا غوښتلو هڅه کوي.

د مقدونیا پارلېمان د دغه هېواد نوم بدل کړ

د مقدونيا پارلېمان يوایيني ترميم منظور کړی چې له مخې به يې د دغه هېواد نوم په شمالي مقدونيا جمهوريت بدل شي.

د جنورۍ پر۱۱مه د مقدونيا د پارلېمان په ۱۲۰ غړو کې ۸۱ د نوم بدلولو په حق کې رايي واچولې. خو د اپوزيشن ګوند مشرانو له رايو بايکاټ وکړ.

دا رايي شمېرنه د مقدونيا د وزير اعظم او د نوم د بدلون مخالفه پارلېماني غړو ترمنځ د دريو ورځنيو خبرو وروسته شوې.

د مقدونيا د نوم بدلون به مرسته وکړي چې له يونان سره د دغه هېواد د يوې لسيزې ستونزه هواره شي او د اروپايي ټولنې او ناټو سازمان په غړيتوب کې به هم دغه هېواد ته زمينه برابره کړي.

فاریاب کې د طالبانو یو مهم قومندان وژل شوی

د افغانستان امنتیي چارواکي وايي، په فاریاب کې یې د طالبانو یو استخبارتي چارواکی له څو نورو وسله والو سره وژلی دی.

د افغانستان په شمال کې ۲۰۹ شاهین قل اردو د جنورۍ پر۱۲مه په یوې اعلامیې کې ویلي، د فاریاب ولایت په دولت اباد ولسوالۍ کې په یو هدفي برید کې د دې ولایت لپاره د طالبانو استخباراتي مسؤل قاري صبغت الله له خپلو شپږو وسله والو سره وژل شوی دی.

خبرپاڼه زیاتوي چې قاري صبغت الله په فاریاب کې د طالبانو مهم استخباراتي چارواکی و چې په یو دقیق هوايي برید کې په نښه شو.

وسله والو طالبانو تر اوسه په دې اړه څه نه دي ویلي.

بلخوا د افغانستان د ملي امنیت اداره وايي، په هلمند کې یې د طالبانو د وسلو او مهماتو یو زېرمه له منځه وړې ده.

د ملي امنیت ریاست په یوې خبرپاڼې کې ویلي، د ملي امنيت ځواکونو د جنورۍ پر ۱۱مه شپه د يو لړ ځانګړو عملياتو په پايله کې چې د هلمند په مارجې ولسوالۍ کې د طالبانو د يو مهم قوماندان قاري ظاهر پر قرارګاه او ډيپو تر سره شوي، په زياته کچه چاودېدونکي او مخدره توکي نیولي دي.

دوی وايي، په دې عملیاتو کې د قاري ظاهر دوه وسله وال هم وژل شوي دي.

امریکا له شامه د سرتېرو ویستل پېل کړل

په شام کې امریکايي ځواکونه

امریکا وایي له شامه یې د امریکا او اتحادیانو د سرتېرو ویستل پیل کړي دي.

د امریکا د پوځ ویاند کرنل شان ریان د جنورۍ پر۱۱مه په خپره کړې اعلامیه کې ډېر جزیات نه دي ورکړي خو یوازې دومره یې ویلي دي چې له شامه یې په خپله خوښه پوځیانو د ویستلو لړۍ پېل کړې ده.

په اعلامیه کې راغلي، امنیتي تدابیرو ته په پام سره سرتېرووتنې د کره نېټې او ځای په اړه مالومات نه شریکوي.

په شام کې بشري حقونو د څار برتانوي میشته اداره وایي د شام په رمیلین هوایي اډه کې د امریکایي سرتېرو کمېدل پېل شوي دي.

ویل کېږي چې د سرتېرو د وتنې بهیر پیل د جنورۍ پر۱۰مه شوی دی.

د امریکا ولسمشر د ډېسېمبر پر ۱۹ له شامه د سرتېرو د ویستو اعلان کړی و.

ډېر ژر به خلا ته راکټونه ولېږو: روحاني

د ایران ولسمشر حسن روحاني.

د ایران ولسمشر حسن روحاني ویلي ژر به د هیواد جوړو راکټونو له لارې دوه سپوږمکۍ یا سیټلایټونه خلا ته ولېږي.

نوموړي دا اعلان د امریکا د اندېښنو باوجود کړی چې په باور یې دا عمل ښايي د هیواد بیلیسټيک میزایلي نظام لا پرمختیا کې مرسته وکړي.

د ایران سرکاري ټي وي وايي چې روحاني دا خبره د جنورۍ پر۱۰مه د پخواني ولسمشر اکبر هاشمي رفسنجاني د مړینې د یاد په یوه دستوره کې وکړه.

خو روحاني د راکټو یا سیټلایټونو په اړه نور وضاحت ور نه کړ.

روانه میاشت د امریکا د بهرنیو چارو وزیر مایک پامپیو ایران ته خبردارې ورکړی و چې د دریو راکټونو خلا ته د لېږلوله (پاروونکي) پلان نه پشا شي.

نوموړي دعوی وکړه چې د ایس ایل وي په نوم دغه راکټې اټومي صلاحیت لرونکو بیلیسټیک میزایلو ته ورته دي او که تهران دا کار کوي نو دا به د ملګرو ملتونو د قرارداد سرغړونه وي.

محب له چیني چارواکو سره د افغانستان پر سوله غږیدلی

د چین بهرنیو چارو وزیر یانګ يي او د افغانستان د ملي امنیت سلاکار حمدالله محب.

د افغانستان د ملي امنیت سلاکار د جنورۍ پر۱۰مه د چین له بهرنیو چارو وزیر سره د هېواد پر سوله خبرې کړې دي.

د ملي امنیت سلاکار دفتر بېګا په یوه بیان کې ویلي چې حمد الله محب د چین د بهرنیو چارو له وزیر وانګ يي سره پر دوه اړخیزه اړیکو او پر سیمه ییز ثبات وغږېد.

اسوشي اېټېډ پرېس اژانس وايي، وانګ يي نوموړي ته وویل چې بیجنګ په افغانستان کې د سولې او سیاسي جوړجاړي د هڅو ملاتړ کوي.

حمد الله محب بیجنګ ته تر پروني سفر مخکې په هند کې وو او هلته یې د خپل سیال تر څنګ له یو شمېر چارواکو سره د افغانستان د سولې پر بهیر خبرې وکړې.

په عین وخت کې د سولې د عالي شورا د دارالانشا مشر او د افغان ولسمشر استازی عمر داودزی لا هم په پاکستان کې دی او هلته یې په بېلا بېلو غونډو کې له چارواکو سره پر امن او اوږد مهاله ثبات خبرې کړې دي.

د شمالي کوریا مشر غواړي له امریکايي ولسمشر سره وویني

د شمالي کوریا مشر کېم جونګ اون چینايي ولسمشر شي جېنپېنګ ته ویلي، له امریکايي ولسمشر ډونلډ ټرمپ سره دویمې سرمشریزې ته تیار دی.

د چین او شمالي کوریا دولتي خبري اژانسونو د جنورۍ پر ۱۰مه ویلي، دا خبره کېم د چین په دوه ورځني سفر کې شي ته کړې.

اژانسونه وايي، کېم دا هم ویلي دي چې له اټومي وسلو د کوریا ټاپووزمې پاکولو نتیجې ته هم رسېدل غواړي.

کېم تر خبرو وروسته په ځانګړي پوځي اورګاډي کې پیانګ یانګ ته ستون شوی دی.

دا په تېرو ۱۰ میاشتو کې د نوموړي چین ته څلورم سفر وو.

بیجنګ د پیانګ یانګ یوازینی لوی متحد دی.

چینايي ولسمشر ویلي، د کېم او ټرمپ د دویمې سرمشریزې ملاتړ کوي او ورڅخه د ښو پایلو هیله لري.

واشنګټن د دې خبر په غبرګون لا څه نه دي ویلي.

ایران د امریکا د بحري ځواک پخوانی سرتېری نیولی

ایران د رسنیو هغه راپورونه تایید کړي چې د امریکا د بحري ځواک یو پخوانی سرتېری یې نیولی دی.

نیویارک ټایمز ورځپاڼې د جنورۍ پر اوومه راپور ورکړ چې ۴۶ کلن مایکل وایټ تېر کال د جولای په میاشت کې ایران ته د سفر پر مهال نیول شوی وو، خو دا لا څرګنده نه ده چې په هغه څه تورونه دي.

د ایران حکومتي خبري اژانس ایرانا د جنورۍ پر نهمه د بهرنیو چارو د وزارت د ویاند بهرام قاسمي په وینا خبر ورکړ چې مایکل وایټ نیول شوی دی خو دا یې ونه ویل چې د هغه جرم څه دی او کله نیول شوی دی.

قاسمي زیاته کړه چې ایران څه وخت وړاندې دغه کس په مشهد کې ونیو او په څو ورځو کې یې امریکايي حکومت خبر کړ.

روسیه او جرمني د شام شخړې هواري لپاره پر همکارۍ سلا شول

دواړو مشرانو په ټېلېفون خبرې کړې دي

روسیه او جرمني په شام کې د امن لپاره په شریکه کار کولو ته رضا شوي دي.

د جنورۍ پر نهمه د جرمني وزیراعظمې انګېلا مېرکل او روسي ولسمشر ولادمیر پوتین په ټېلېفون خبرې وکړې.

د روسي ولسمشر دفتر کرېملېن وايي، په خبرو کې د شام د بحران د هواري لپاره د ملګرو ملتونو په نېږدې همکارۍ، د سیاسي هلو ځلو پرمخ وړلو هیله ښودل شوې.

دواړو مشرانو د شام لپاره د یوې اییني کمیتۍ په جوړولو هم خبرې وکړی چې د جنګ ځپلي هېواد لپاره به پر نوي ایین یا اساسي قانون کار کوي.

د بې پولې خبریالانو ټولنې په فراه کې د افغان خبریال وژنه غندلې

د بې پولي خبریالانو ټولنې په فراه کې د طالبانو له لوري د افغان خبریال جاوید نوري وژنه غندلې ده.

جاوید نوري چې د فراه د نشاط راډیو خبریال وو، د جنورۍ پر پېنځمه یې له ۳۰ کسانو سره سفر کاوه چې وسله والو طالبانو یې بس ودراوه او دی یې وویشت.

د جاوید نوري مړی د جنورۍ پر اتمه پیدا شو او د هغه کورنۍ ته وسپارل شو.

دا په ۲۰۱۹ز کال کې په افغانستان کې د یوه خبریال د وژلو لومړۍ پېښه ده.

په ۲۰۱۸ز کال کې په افغانستان کې ۱۵ خبریالان په وسله والو بریدونو کې وژل شوي ول.

زلمی خلیلزاد د هند په سفر دی

د امریکا ځانګړی استازی زلمی خلیلزاد

رسنۍ وايي، د افغانستان د سولې لپاره د امریکا د بهرنیو چارو ځانګړی استازی زلمی خلیلزاد د جنورۍ پر ۱۰مه د هند په دوه ورځني سفر دی.

نوموړی به د هند له ملي امنیت سلاکار اجیت دوول او د بهرنیو چارو د وزارت له مرستیال ویجې ګووخال سره د افغانستان د سولې پر روانو هڅو خبرې وکړي.

خلیلزاد تېر کال په سېپټېمبر کې د امریکا د بهرنیو چارو د وزارت له لوري د افغانستان د سولې ځانګړی استازی وټاکل شو.

د امریکا د بهرنیو چارو وزارت په یوه بیان کې ویلي چې خلیلزاد به تر هند وروسته چین، افغانستان او پاکستان ته ولاړ شي او په هغو هیوادو کې به له چارواکو سره د افغانستان د سولې پر لارو چارو خبرې وکړي.

بلخوا هندي رسنۍ وايي، د هغه هېواد د بهرنیو چارو وزیرې سوشما سوراج په نوي دلي کې له خپل ایراني سیال جواد ظریف سره کتلي او ورسره يې د افغانستان د سولې په روانو هڅو او د چابهار بندر د فعالیت په پراخېدو خبرې کړي دي.

روسیه وايي افغانستان ته سرتېري نه استوي

روسیې د امریکا د ولسمشر ډونلد ټرمپ د وروستیو څرګندونو په غبرګون کې ویلي چې هېواد یې خپل ځواکونه افغانستان ته نه لېږدوي او نه هم پر دې اقدام غور کوي.

دا خبره د روسیې د بهرنیو چارو وزارت مرستیال سېرګې ریابکوف د جنورۍ پر نهمه، د هند په مرکز نوي دلي کې خبریالانو ته وکړه

نوموړي وویل، روسیه له ډېرې مودې راهیسې له افغان حکومت سره همکاري لري او دا همکاري د پیاوړي کېدو په حال کې ده چې یوې نوې مرحلې ته به ورسېږي.

ريابکوف دا څرګندونې د امریکا د ولسمشر د هغو څرګندونو په غبرګون کې کړي چې څو ورځې وړاندې یې وویل چې د افغانستان ګاونډیان لکه پاکستان، روسیه او هند باید د افغانستان په مسله کې زیات رول ولوبوي.

د امریکا او مېکسیکو پر پوله بشري بحران جوړ شوی: ټرمپ

د امریکا ولسمشر ډونالډ ټرمپ د وینا پر مهال

د امريکا ولسمشر ادعا کړې چې د امريکا او مېکسيکو پر پوله بشري بحران جوړ شوی دی.

ډونلډ ټرمپ د جنورۍ پر اتمه، ولس ته ټېلېوېژني وینا وکړه چې هدف یې د امریکا او مېکسیکو پر پوله د دېوال جوړولو د هڅو ګړندي کول او د ځېنو حکومتي ادارو د ۱۸ ورځني پارچاو پای ته رسول ول.

په کانګرس کې ډېموکراټان پر ولسمشر ټرمپ نیوکې کوي او غوښتنه کوي چې د وفاقي حکومت هغه تړلې برخې بېرته پرانیزي چې له امله یې لسګونه زره خلک پر کور ناست دي يا بې معاشه کار کولو ته اړ شوي.

ټرمپ له کانګرسه د امريکا او مېکسيکو پر پوله د دېوال جوړولو لپاره د نېږدې شپږ اربه ډالرو غوښتنه کړې خو ډېموکراټانو يې مخالفت کړى دى چې له وجې یې د ۲۰۱۸ز ډېسېمبر له ۲۱مې راهیسې د امریکا وفاقي حکومت ځېنې برخې او څانګې تړلې دي.

اروپايي ټولنه د جنورۍ پر نهمه پر ایران د نویو بندیزونو تفصیل خپروي

د اروپايي ټولنې یوه ویاند ویلي، پر تهران د تازه بندیزونو تفصیل د جنورۍ پر نهمه اعلانوي.

د اروپايي ټولنې چارواکو د جنورۍ پر اتمه تر هغې وروسته بندیزونه منظور کړل چې د ایران پر استخباراتو د اروپا پر خاوره د ایران حکومت مخالفه کسانو د وژنو د هڅو تورونه دي.

تهران دا تورونه رد کړي او ویلي یې دي چې د دې ډول ګامونو هدف د ایران او اروپایي ټولنې اړیکي خرابول دي.

ټولنې تور پورې کړی چې ایران پر خپلو حکومت مخالفه کسانو په ډنمارک، هالېنډ او په فرانسه کې د بريدونو هڅې کوي.

د ډنمارک وزیراعظم لارز لوک راسموسین پر تهران د بندیزونو هرکلی کړی.

نور پورته کړئ

ځانګړې پاڼې

د مشال ځانګړې پاڼې

له موږ سره اړیکي

XS
SM
MD
LG