نن د پاکستان سېنېټ غونډې ته د هېواد ملي پوځ مشر جنرل قمر جاوېد باجوه او اعلا پوځي افسرانو تر نېږدې څلورو ګنټو پورې پر ملکي او سیمه ایز حالاتو څرګندونې [بریفنګ] وکړې.
د پښتونخوا ملي عوامي ګوند سېنېټر عثمان کاکړ مشال راډيو ته وویل چې سېنېټ غونډې ته د پوځ مشر د ملکي امنيت په اړه معلومات شريک کړل.
د نوموړي په وینا داسې پوښتنه نه وه چې له هغه و نه وشوه.
عثمان کاکړ: د پوځ مشر یې ځکه سېنېټ ته غوښتی، خارجه پالیسي چلوي
دا غونډه چې تر څلورو ګنټو پورې جاري وه، پکې د سوال و جواب برخه هم وه.
هم په دې اړه د پاکستان پېپلز ګونډ سېنېټرې سحر کامران مشال ريډيو ته وویل چې په غونډه کې د پاکستان خارجه پاليسۍ په اړه هم خبرې وشوي. پر دې مهال د پوځ مشرتابه وویل چې په کومه پاليسۍ سياسي حکومت عمل درآمد کوي، پوځې مشرتابه له هغې سره خپلځان تړلی بولي.
''د سېنېټ لپاره نن يوه تاریخي ورځ وه چې د پوځ اعلا چارواکي سېنېټ ته راغلل، پاکستان ملټري اپرېشنز ډایرېکټر ملک ته دننه او بهر ورپېښو چېلنجونو په اړه بريفینګ ورکړو، همدا شان د سېنېټرانو لخوا هم پوښتنې وشوې چې دا وخت پاکستان ته کومې امنيتي خطرې رامخې ته دي او څنګه موږ ته د هغې مخنيوی کول پکار دي. له دې علاوه په نېشنل اېکشن پلان او له ګاونډيو هېوادونو سره د اړيکو چې کومې معاملې روانې دي پر هغو هم خبرې وشوې.''
د پاکستان ملټري اپريشنز ډایرېکټر او د پاکستان د استخباراتي ادارو مشرانو هم په دې غونډه کې ګډون وکړو.
د بندې کمرې دا غونډ په سېنېټ کې د اپوزيشن مشر راجه ظفر الحق په يو تحريک رابلل شوې وه چې مقصد يې د سيمې بدلېدونکي حالاتوته په کتو د پاکستان پاليسي تګلاره ښکاره کول دي.
