د امریکا لوړپوړو چارواکیو یو پلاوی به د پاکستاني چارواکیو سره د خبرو لپاره اسلام اباد ته ځي.
د پاکستانبهرنیو چارو دفتر د دې خبر تصدیق کړی دی او وايي چې د دواړو هیوادونو چارواکي به په اسلام اباد کې سره ویني او او په خپل مینځي چارو به خبرې کوي.
د راپورونو تر مخه د پلاوي مشري به د امريکا د قامي سلامتيا کونسل چارواکې لېزا کرټس او د بهرنیو چارو مرستیاله سېکرېتره ايلس ويلز کوي.
له دې وړاندې د اګست په مياشت کې د امريکا پلاوي پاکستان ته د راتګ او د بهرنیو چارو د وزیر خواجه اصف امریکا ته دورې ځنډول شوې وې.
د دواړو هیوادونو تر مینځ خبرې اترې وروستو له هغې د ځنډ ښکار شوی کله چې ولسمشر ټرمپ د افغانستان په اړه د خپلې ستراتیجۍ د اعلان پر وخت په پاکستان د وسله والو ډلو سره د اړیکو تورونه پوری کړل.
د ستمبر د میاشتې په نورلسمه نیټه د ملګرو ملتونو د جنرل اسمبلۍ د غونډې په موقع د پاکستان د وزير اعظم شاهد خاقان عباسي او د امريکا د مرستیال ولسمشر مائيک پنس تر مينځه لیدل کتل شوي وو. دواړه مشران په دې رضا شوي وو چې پاکستان او امريکا به د افغانستان د ستونځي د هواري لپاره د خبرو اترو عمل پر مخ بوځي.
