رپوټونه وايي چې په ترکیه کې د امریکا قونسلګرۍ د یوه چارواکي نیول کېدو امر شوی دی.
دا په داسې حال کې ده چې د ترکیې او امریکا ترمنځ د سیاسي کړکېچونو په دوام، د دواړو هېوادونو د بهرنیو چارو وزارتونو په خپلو کې د وېزو پر ورکولو بندیز لګولی دی.
د ترکیې رسنیو پرون دوشنبه وویل، د مشکوک وګړي د نیولو هڅې روانې دي او پولیسو د هغه له ښځې او زوی څخه پوښتنې کړي دي.
په استانبول کې تېره اوونۍ د امریکا د قونسلګرۍ د یوه سیمه ییز کارکونکي تر نیول کېدو وروسته، په ترکیه کې د امریکا سیاسي ماموریت د مهاجرت له وېزو پرته پر تولونورو وېزو بندیز ولګاوه.
د ترکیې د بهرنیو چارو وزارت پرون له واشنګټنه غوښتنه وکړه چې پردې پرېکړه له سره غور وکړي او ویې ویل چې داسې اقدامات غیر ضروري لانجه رامنځته کولائ شي.
د ترکیې حکومت تر اوسه په خپله خاوره کې د امریکايي ډيپلوماټ د نیولو په اړه جزئیات نه دي ورکړي او دلیل یې لا نه دی څرګند شوی.
