د امریکا ولسمشر ډونالډ ټرمپ د بهرنیو چارو وزیر ریکس ټیلرسن ته ویلي چې هغه له شمالي کوریا سره د ایټمي او میزایلي پروګرام پر سر د خبرو لپاره خپل وخت ضایع کوي.
ولسمشر ډونالډ ټرمپ دا خبرې پرون په خپله ټویټر پاڼه وکړي . هغه په دغه ټویټ کې د شمالي کوریا مشر کیم جونګ اون یو " راکټي سړی" یا لیټل راکټ مېن یاد کړ.
د ولسمشر ډونالډ ټرمپ دا څرګندونې یوه ورځ وروسته له هغې مخکې ته راغلي چې د امریکا د بهرنیو چارو وزیر ریکس ټیلرسن ویلي وو امریکايي چارواکي له شمالي کوریا سره د رابطې لپاره لارې چارې لري .
دې ورستیو کې د شمالي کوریا د راکټي او ایټمي پروګرام پر سر تاوتریخوالی زیات شوی دي او ورسره د امریکا او شمالي کوریا ترمنځ د یو بل پر ضد د مخالفت ډکو بیانونو کې هم اضافه شوې ده. تېره میاشت د شمالي کوریا تر ټولو زیاتې طاقتورې ایټمي تجربې وروسته ملګرو ملتونو پر دغه هېواد نوي بندیزونه ولګول.
