د لاسرسي ځای

تازه خبر

خبرونه

د لندن په برید کې څلور وژل شوي، لسګونه ژوبل

د لندن پولیس وايي، د چارشنبې یا شورو پر ورځ له برتانیوي پارلېمان سره نېږدې په ترهګر برید کې یو پولیس افسر په چړو وژل شوی او دوه کسان د وسله وال په ګاډي وهل شوي دي.

د دوی په وینا، یوه مشکوکه بریدګر پر وېسټمنسټر پله پر روانو دوو کسانو موټر وخېژاوه.

پولیس وايي، د دوی په باور یوازې یو کس دا برید کړی دی چې پکې لږ تر لږه ۲۰ کسان ژوبل شوي هم دي. خو دوی وايي چې د ترهګرۍ مخنیوي څانګه یې پلټنې کوي او دا امکان هم شته چې ښايي په برید کې نور کسان هم شریک ول.

دا حمله د لندن پر وخت پر ماسپښين دوه بجې او ۴۰ دقیقې پیل شوه. یوه وسله وال د پارلېمان د امنیتي ساحې دننه له خپل ګاډي سره ننوت او هلته یې یو پولیس په چاقو وواهه او مرګونی یې ژوبل کړ.

وروسته په ساده جامو کې پولیسانو دا کس وویشت او چې روغتون ته رسول کېده نو مړ شو.

په چړې یا چاقو وهل شوی پولیس هم وروسته په روغتون کې ومړ.

يوه ښځه هم چې پر پله روانه وه او د ټېمز سیند ته پرېوتې وه وروسته ژوندۍ و ایستل شوه خو ویل کېږي چې سخته ژوبله ده.

سپینه ماڼۍ وايي، امریکايي ولسمشر ډونلډ ټرمپ، وزیراعظمې مې ته د پوره همکارۍ باور ورکړی دی.

په سمدستي ډول د حملې ذمه واري چا نه ده منلې.

د نننۍ ورځې ټول خبرونه وګورئ

په فرانسه کې څلور کسان په چړو ټپیان شوي

پولیسو خبري اژانس ته ویلي د بریدګرو په لټه کې دي او د شارلي ایبدو ورځپاڼې شاوخوا سیمې یې پخپله ولکه کې اخيستي دي.

د فرانس په پلازمېنه پاریس کې د ناڅرګنده کسانو لخوا د چړو په برید کې څلور کسان ټپیان شوي دي.

پولیس وایي، دا پېښه د طنزیه ورځپاڼې "شارلي ایبدو" د دفتر خوا ته په سیمه کې رامنځ ته شوې ده او برید ګر په تېښته دي.

اسوشيېټېډ پریس خبري اژانس د سېپټېمبر پر ۲۵مه خبر ورکړ چې پولیس د پاریس ختيځه برخه کې د پېښې ځای ته رسېدلي دي.

پولیس په مشرقي پاریس کې د پېښې ځای ته رسېدلي دي.
پولیس په مشرقي پاریس کې د پېښې ځای ته رسېدلي دي.

پولیسو خبري اژانس ته ویلي د بریدګرو په لټه کې دي او د شارلي ایبدو ورځپاڼې شاوخوا سیمې یې پخپله ولکه کې اخستې دي.

یاده دې وي چې په ۲۰۱۵ز کال کې په دغه دفتر په ترهګر برید کې ۱۲ کسان وژل شوي ول.

د استرالیا کرکټ ملي لوبډلې پخوانی لوبغاړی 'دن جونز' ومړ

د استرالیا د کرکټ پخوانی لوبغاړی دن جونز

د استرالیا کرکټ ملي لوبډلې پخوانی باولر دن جونز د سېپټېمبر پر ۲۴مه کې د زړه له حملې د ۵۹ کلونو په عمر ومړ.

جونز د هند کرکټ د غوره لیګ د مبصر یا کمینټېټر په توګه ممبي ته تللی و. ده د استرالیا لپاره په ۵۲ ټیسټ لوبو او ۱۶۴ یو ورځینیو مسابقو کې برخه اخیستې وه.

د جونز په مړینه د کرکټ نړیوالې شورا او د بېلابېلو هیوادونو کرکټ بورډونو خواشیني څرګنده کړې ده.

ایراني پهلوان ته د مرګ سزا ورکونکي قاضي باندې امریکا بندیزونه لګولي

افکاري روانه میاشت د قتل په جرم په دار وځړول شو.

امریکا پر یوه ایراني قاضي د نوید افکاري په نوم پهلوان ته د مرګ سزا اورولو په قضیه کې د ښکېلتیا په تور بندیزونه لګولي دي.

افکاري روانه میاشت د قتل په جرم په دار وځړول شو.

د امریکا بهرنیو چارو وزیر مایک پامپېو تېر مازیګر په یوه بیان کې پر قاضي سید محمود سعادتي رسماً بندیزونه اعلان کړل.

په بیان کې راغلي چې له رپورټونو سره سم، سعادتي او د شیراز د انقلابي عدالت لومړۍ څانګه د افکاري په قضیه کې ښکېل ول.

پامپېو د افکاري پانسي د نه منلو وړ اقدام وباله او ویې ویل چې مقدمه په بیړه پر مخ بیول شوې او منصفانه نه وه.

پامپېو وايي، ایرانی رژیم اکثر تر ټولو ځلانده او هیله بښونکي ایرانیان په نښه کوي.
پامپېو وايي، ایرانی رژیم اکثر تر ټولو ځلانده او هیله بښونکي ایرانیان په نښه کوي.

د پامپېو په وینا، ایرانی رژیم اکثر "تر ټولو ځلانده او هیله بښونکي ایرانیان په نښه کوي، ګرفتاروي او وژني یې."

پر ۲۷ کلن افکاري په ۲۰۱۸ز کال کې د حکومت ضد مظاهرو پر مهال، په چاړه د یوه امنیتي ساتونکي د وژنې تور وو.

د سېپټېمبر پر ۱۲مه د هغه پر دار ځړونې نړیوال احتجاج وپاراوه او امریکايي ولسمشر ډانلډ ټرمپ یې غندنه وکړه.

پامپېو د ایران د انقلابي عدالتي نظام پر یوه بل قاضي محمد سلطاني، د شیراز د انقلابي عدالت لومړۍ څانګې او د عادل اباد، اورومیې او وکیل اباد پر زندانونو هم بندیزونه اعلان کړل او هغه یې د بشري حقونو د سختو سرغړونو ذمه وار وبلل.

له بندیزونو سره سم، په امریکا کې د دې کسانو او ادارو شتمنۍ کنګلېږي او امریکايي وګړي ورسره راکړه، ورکړه نه شي کولای.

الېکساندر لوکاشېنکا د بېلاروس د ولسمشر په توګه نه منو: اروپايي ټولنه

الېکساندر لوکاشېنکا له ۱۹۹۴ز کال راهیسې واکمن دی.

د اروپايي ټولنې د بهرنیو چارو تګلارې مشر یو ځل بیا د ټولنې دا دریځ تکرار کړ چې الېکساندر لوکاشېنکا د بېلاروس ولسمشر په توګه نه مني.

جوزېپ بورېل دا خبره تر هغې یوه ورځ وروسته کړې چې د سېپټېمبر پر ۲۳مه په ناڅاپي ډول لوکاشېنکا د ولسمشر په توګه لوړه وکړه چې پرضد یې په ټول هېواد کې مظاهرې وشوې.

په بېلاروس کې د اګست پر نهمه له ولسمشریزو انتخاباتو راهیسې احتجاجونه روان دي چې پکې د درغلۍ د دعوو باوجود لوکاشېنکا د شپږم ځل واکمنۍ لپاره بریالی وبلل شو.

نوموړی له ۱۹۹۴ز کال راهیسې واکمن دی.

تر انتخاباتو وروسته د ظالمانه چاپو پر مهال زرګونه کسان ګرفتار شوي، پولیسو سلګونه کسان وهلي او د اپوزیشن مشران یا نیول شوي او یا له هېواده وتلو ته اړ شوي دي.

د سېپټېمبر پر ۲۳مه هم د لوکاشېنکا د لوړې مراسمو لپاره پولیس سرتېرو په زور مرکزي لارې او کوڅې وتړلې.

نوموړی د ۸۰ فیصده رایو ګټلو دعوه کوي او د سوګند په غونډه کې یې د خوښې یو شمېر بېلاروسي چارواکي موجود ول.

بورېل وايي، چې برسلز له مېنسک سره خپلو اړیکو ته بیا کتنه کوي.
بورېل وايي، چې برسلز له مېنسک سره خپلو اړیکو ته بیا کتنه کوي.

د اروپايي ټولنې د بهرنیو چارو تګلارې مشر جوزېپ بورېل د سېپټېمبر په یوه بیان کې وویل، لوکاشېنکا ته د واک سپارل "د بېلاروس د ابادۍ د زیاتره برخو له ارادې سره په ټکر کې دي چې یوازې په بېلاروس کې سیاسي کړکېچ لا ژورولای شي."

ده وویل، خلکو خپله اراده "له انتخاباتو راهیسې په ګڼو، بېسارو او سوله ییزو احتجاجونو کې څرګنده کړې."

بورېل زیاته کړه چې برسلز له مېنسک سره خپلو اړیکو ته بیا کتنه کوي.

په اوروزګان کې د نښتو له وجې ګڼ خلک بې کوره شوي

چارواکي وايي نښتې د اوروزګان په دوو ولسوالیو کې شوې دي

د افغانستان د اوروزګان چارواکي وايي، د ولایت پر ګیزاب ولسوالۍ د وسله والو طالبانو د بریدونو له وجې شاوخوا ۱،۰۰۰ تنه کورونو پرېښودو ته اړ شوي.

طالبانو په تېرو ورځو کې د اوروزګان په ګیزاب او دهراود ولسوالیو کې پراخې حملې کړي او له افغان ځواکونو سره یې نښتې شوي، چې پکې له رپورټونو سره سم، دواړو خواوو ته مرګ ژوبله اوښتې ده.

د اوروزګان د والي ویاند زړګي عبادي د سېپټېمبر ۲۴مې شپې مهال مشال ته وویل چې په ګیزاب ولسوالۍ کې د جګړې له وجې شاوخوا ۱،۰۰۰ کسان دایکنډي ولایت او د اوروزګان مرکز په ګډون نورو ځایونو ته تللي دي.

دی وايي، سلګونه نور کسان په دهراود کې خپلو کورونو پرېښودو ته اړ شوي.

عبادي زیاتوي چې د افغان ملي اردو کمانډو ځواک سرتېري وربلل شوي چې سیمه له وسله والو طالبانو پاکه کړي.

خلیلزاد: ایران افغانستان کې امریکا ته د ګوزار ورکولو هڅه کوي

خلیلزاد وویل ایرانیانو ته یې د افغانستان راتلونکې په اړه په غونډو کې د ګډون بلنه ورکړې

د افغانستان د سولې لپاره د امریکا د بهرنیو چارو وزارت ځانګړی استازی زلمی خلیلزاد وايي، د افغانستان د جګړې د پای ته د رسولو لپاره به له ایران سره د خبرو هرکلی وکړي خو په وینا یې، تهران په دې جګړه کې خپل دښمن "امریکا" ته د ګوزار ورکولو هڅې کوي.

نوموړي د سېپټېمبر ۲۴مې پر مازیګر د امریکا د سولې په انسټېټیوټ کې یوه انلاین بحث ته وویل، ایران غواړي چې تر هغو چې له واشنګټن سره موافقې ته رسېږي، امریکا د افغانستان په جګړه کې په داسې حال کې ښکېله پاتې شي چې نه بری ومومي او نه ماته وکړي.

ده وویل، ایرانیانو ته یې د افغانستان راتلونکې په اړه په غونډو کې د ګډون بلنه ورکړې.

خلیلزاد دا څرګندونې پر داسې مهال کړې دي چې د سېپټېمبر پر ۲۴مه هم د افغانستان په یو شمېر ولایتونو کې د وسله والو طالبانو او افغان ځواکونو ترمنځ نښتې وشوې.

هلته په قطر کې افغان حکومتي پلاوي د سېپټېمبر له ۱۲مې راهیسې له طالبانو سره د سولې د رسمي مذاکراتو پیلولو د طرزالعمل ټاکلو لپاره بحث ته دوام ورکړی.

اعلا وزیر محمود خان په مومندو کې د دوو سړکونو او یوه روغتون پرانسته وکړه

وزیر اعلا محمود خان وویل چې حکومت به یې د قبایلي ضلعو د ولس لپاره د پرمختګ منصوبې راوړي.

د خیبر پښتونخوا وزیراعلی محمود خان په مومندو کې د دوو سړکونو او د یوه روغتون پرانسته کړې.

دغه دواړه سړکونه ۱۰۴ کلومیټره اوږدوالی به لري په دوه اربه روپو جوړېږي.

وزیر اعلا محمود خان وویل چې حکومت به یې د قبایلي ضلعو د ولس لپاره د پرمختګ منصوبې راوړي.

د مومندو ولس بیا تر اوسنیو اعلانونو زیات دې ته په تمه دي چې حکومت دې په پخوانو اعلانونو عمل وکړی او ۳ او ۴ جي موبایل نېټورک دې ورته بحال کړي او د ګورسل لار دې تر پخواني اعلان لاندې خلاصه کړي.

تم شئ

هېڅ میډیايي سرچینه اوس نشته

0:00 0:01:58 0:00
د ډاېرېکټ لېنک

له ایران سره د مقابلې لپاره د ملګرو ملتونو کلک دریځ ته اړتیا ده: سلمان بن عبدالعزیز

هغه د اسراییل او فلسطینیانو ترمنځ د خبرو پیلېدو لپاره د امریکا هڅو ملاتړ وکړ او د لبنان د حزب‌الله ډلې د بې ‌وسلې کېدو غوښتنه ‌یې وکړه.

د سعودي عرب پاچا د ایران مخنیوي لپاره د یوه جامع حل غوښتنه کړې او پر نړیوالو یې غږ وکړي، پرېنږدي چې تهران د ډله ییزې وژنې وسلې تر لاسه کړي.

سلمان بن عبدالعزیز دغه خبرې د ملګرو ملتونو عمومي اسمبلۍ ته د دوهمې ورځې په یوه ثبت شوې ویډیويي وینا کې وکړه.

نوموړي وویل، یوې هر اړخیزې حل‌ لارې او د ملګرو ملتونو کلک دریځ ته اړتیا ده چې له ایران سره مقابله وشي.

هغه وویل، د سعودي تجربې ښودلې چې جزیي حل‌لارې او قناعت د هغه ګواښ مخه نه ‌ده نیولې چې ایران نړیوالې سولې او امنیت ته متوجې کړی.

هغه د اسراییل او فلسطینیانو ترمنځ د خبرو پیلېدو لپاره د امریکا هڅو ملاتړ وکړ او د لبنان د حزب‌الله ډلې د بې ‌وسلې کېدو غوښتنه ‌یې وکړه.

تر دې یوه ورځ مخکې د ایران ولسمشر حسن روحاني دغې اسمبلۍ ته په وینا کې وویل چې امریکا نه پر ایران خبرې تحمیلولای شي او نه هم پرې جګړه.

اې اېن پي د عدم تشدد جهاني ورځ لمانځي

په پښتونخوا کې باچا خان د عدم تشدد تګلارې سالار ګڼل کېږي

عوامي نیشنل ګوند پرېکړه کړې ده چې د اکتوبر پر دوهمه نېټه به د عدم تشدد نړیواله ورځ ولمانځي او د تحصیلونو په کچه به د امن سیمنارونه کوي.

د ګوند د صوبايې مشر ایمل ولي خان پرون ماځیګر (سپتمبر ۲۳) په پېښور کې د صوبايي کابینې له غونډې وروستو یوه خبري کانفرانس ته وویل چې د دې ورځې لمانځلو موخه د وسله والو فعالیتونو او فرقه ییز تاوتریخوالي مخنیوی دی.

نوموړي زیاته کړه چې له وزیرستانه تر باجوړ او تر بونیره د هدفي بریدونو لړۍ روانه ده او د حکومت ذمه واري ده چې مخه یې ونیسي.

ایمل ولي خان ویلي چې د تشدد دا پیښې ټولې سیمې ته خطر جوړوي نو باید د سولې او عدم تشدد لپاره د ټولنې په هره کچه کار او مبارزه ترسره شي.

پښتونخوا کې د هدفي بریدونو تازه پېښې

په شمالي وزیرستان کې په دوو بیلا بیلو هدفي بریدونو کې یو ځايي وګړی وژل شوی او یو بل ژوبل دی.

د ضلعي انتظامیې یو چارواکي مشال راډیو ته ویلي چې بېګا شپه په نورک سیمه کې دوو مخ پټو وسله والو د خلکو په وړاندې د کلي له مینځه یو ځايي وګړی اوچت کړی او بیا يې وواژه. وسله وال په تېښته بریالي شوي دي.

دغه شان تپي کې په یو هدفي برید کې یو ځاي تن ژوبل شوی دی.

پولیس وایي د پیښو پلټنې کوي خو ځايي خلک وايي پولیس ګرسره د پېښې ځای ته هم نه دی ورغلی. دوی وايي سږ کال په شمالي وزیرستان کې ۳۰ هدفي بریدونه ترسره شوي خو امنیتي ادارو لا تراوسه د بریدونو تر شا پټ لاسونه نه دي څرګند کړی.

شمالي وزیرستان برید، یو کس وژل شوی بل ژوبل دی

ځايي خلک وايي، سږ کال په شمالي وزیرستان کې ۳۰ هدفي بریدونه ترسره شوي خو امنیتي ادارو لا تراوسه د بریدونو تر شا پټ لاسونه نه دې څرګند کړی.

په شمالي وزیرستان کې په دوو بېلا بېلو هدفي بریدونو کې یو ځايي وګړی وژل شوی او یو بل ژوبل دی.

د ضلعې انتظامیې یو چارواکي مشال راډیو ته ویلي چې تیره شپه نورک سیمه کې دوو مخ پټو وسله والو د خلکو په وړاندې د کلي له منځه یو ځايي وګړی اوچت کړی او بیا يې وژلی دی.

وسله وال په تېښته کې بریالي شوي دي.

دغه شان په تپی کلي کې هم په یو هدفي برید کې یو ځايي تن ژوبل شوی دی.

پولیس وایي، د پېښو پلټنې کوي خو ځايي خلک وايي، پولیس د پېښې ځای ته نه دی واغلی.

دوی وايي، سږ کال په شمالي وزیرستان کې ۳۰ هدفي بریدونه ترسره شوي خو امنیتي ادارو لا تراوسه د بریدونو تر شا پټ لاسونه نه دي څرګند کړی.

د کرېملن نقاد نوالني له روغتونه رخصت

الېکسي نوالني د کرېملن نقاد

د کرېملین نقاد الیکسي نوالني د جرمني له روغتونه د ۳۲ ورځو درملني وروسته رخصت شوی.

نوالني تېره میاشت د سایبریا په کورنۍ الوتکه کې له ناروغۍ وروسته د درملنې لپاره جرمني ته وړل شوی وو.

د جرمني چارواکو ویلي چې په جرمني، فرانس او سویډن کې ازموینو ښودلې چې نوالني ته د نوویچک عصبي اجنټ په نامه زهر ورکړل شوي و.

غربي نړۍ له روسې په دې اړه وضاحت غوښتی وو خو مسکو د پلټنو خبره رد کړې وه او ويلي يې ول چې تر اوسه یې د جرم ثبوت نه دی لیدلی.

په برلن کې شارېټې روغتون د سپټمبر په ۲۳مه په یوه بیان کې وویل چې د ناولني حالت تر ډېرې اندازې ښه شوی او د شدید بستر ناروغانو له وارډه يې رخصت کړی دی.

جلال اباد کې د داعش ډلې څلور مهم غړي وژل شوي

د خبرپاڼې په حواله، یاد عملیات د ملي امنیت صفر دوه قطعې ترسره کړي چې د دواړو لوریو ترمنځ تر څو ساعته نښتې وروسته پای ته ورسېدل او بل چاته پکې زیان نه دی اوښتی.

د افغانستان د ننګرهار ولایت د ملي امنیت ریاست رسنیو ته په یوه لېږلې خبرپاڼه کې ویلي چې بېګا شپه د دوی ځواکونو د جلال اباد ښار د څلور مې ناحې په اکمالاتي بېز سیمه کې عملیات وکړل چې په ترڅ کې یې په ختیځ کې د داعش ډلې د هدفي وژنو، د ځانمرګو بریدونو، د باروتو او نغدو پیسو انتقالوونکي څلور مهم غړي یې وژل شوي دي.

د خبرپاڼې په حواله، یاد عملیات د ملي امنیت صفر دوه قطعې ترسره کړي چې د دواړو لوریو ترمنځ تر څو ساعته نښتې وروسته پای ته ورسېدل او بل چاته پکې زیان نه دی اوښتی.

خبرپاڼه وایي، په ترسره شویو عملیاتو کې یو شمېر چسپکي او ریموټ کنټرول ماینونه، باروت، مرمۍ، ریموټونه، یوه اندازه نغدې پیسې، یوه هندۍ رکشه او یو کرولا موټر هم نیولي دي.

د سېپټېمبر پر ۲۲مه هم دغه ریاست په تېره یوه اونۍ کې د ۷ وسله والو طالبانو، دوه انسان تښتوونکو، د جعلي پیسو د یو تن لیږدوونکي او د داعش په نوم له خلکو یو تن باج اخیستونکي د نیولو خبر ورکړی و.

د روزوېلټ کورنۍ له بېنظیر بوټو پوهنتون پېښور سره انلاین خبرې اترې

د پخواني امريکايي ولسمشر فرېنکلېن روزوېلټ مېرمنې، لسمۍ او لمسی د بې نظیر پوهنتون پېښور له زده کوونکو او استادانو سره انلاین خبرې اترې کوي. ۲۰۲۰، ۲۲م سېپټېمېبر

د امريکا پخواني ولسمشر فرېنکلېن روزوېلټ مېرمنې، لمسۍ او کړوسۍ د پيښور شهيد بېنظر بوټو ښځو پوهنتون زدکونکو سره انلاين غونډه کړي.

په پېښور کې د امريکا کونسلګرۍ د سېپټمبر پر ۲۲مه په خبرپاڼه کې ويلي دي چې د امن نړيوالې ورځ يه تړاو د روزوېلټ کورنۍ ايني روزويلټ او ټرېسې روزوېلټ په پيښور کې د ښځو پوهنتون کې جوړ د اېلېنور روزوېلټ کارنر غونډې ته وينا وکړه.

په پېښور کې د امريکا کونسل جنرل سيبرون ټونې، چې د کار موده يې سر ته رسېدلی، نوي کونسل جنرل ګريګ ماکيرس، ولسي رابطه افسر کاهانيا روبېنسن په دې ورچول کنفرانس کې ګډون وکړ.

په شهيد بېنظير بوټو ښځو پوهنتون کې د اېلېنور روزوېلټ کارنر څلور کاله مخکې جوړ شوي وو چې مقصد يې تعليم، جمهوريت، قانون، سوداګرۍ او صحت څانګو کې کار کوي.

د پوهنتون مشرې رضيې سلطانې د غونډې له ګډونوالو مننه وکړه او ويې ويل چې د امريکا پخوانۍ لومړۍ ميرمن د کار په ځايونو کې د ښځو د حقونو لپاره اواز پورته کړی او د بشري حقونو لپاره يې ډير زيات کار کړ وو.

په دې موقع د امريکا پخواني ولسمشر لمسۍ او کړوسۍ غونډې ته وويل چې دوی به دا مشن جاري ساتي.

په خبرپاڼه کې ويل شوي چې د دي ادارې له لاري په خيبر پښتونخوا کې لسګونه زره ځوانانې هر کال په امريکا کې له پرنټ، انلاين او ملټي ميډيا سرچينو ګټه پورته کوي او له پوهانونو سره رابطه کوي.

په دره ادم خېلو کې دوه کسان د ناموسي وژنې په تور نیول شوي

پولیس وايي، نیول شوي کسان یې عدالت ته وړاندې کړي او اوس ترې پلټڼې روانې دي

د خیبر پښتونخوا د کوهاټ پولیسو د سېپټېمبر پر ۲۲مه د دره ادم خېلو دوه کسان د ناموسي وژنې په تور ونیول.

د سیمې د پولیسو مشر اېس پي اپرېشنز طاهر اقبال د سېپټېمبر پر ۲۲مه یوه خبرپاڼه کې ویلي، څو ورځې وړاندې د دره ادم خېلو یوه نجلۍ چې علیمه نومېده، د خپلوانو لخوا وژل شوې وه. د پولیسو په وینا نجلۍ په خپله خوښه واده کول غوښتل.

په خبرپاڼه کې راغلي، دواړه نیول شوي کسان شفیع الرحمان او عبدالقیوم د وژل شوې نجلۍ تره او تربور دي او د هغې پلار شریف الله په رپورټ نیول شوي دي.

پولیس وايي، نیول شوي کسان یې عدالت ته وړاندې کړي او اوس ترې پلټڼې روانې دي.

د کورمې ډاکټرانو خپل احتجاج ختم کړ

ډاکټران وايي، له دې ډاډ تر لاسه کولو وروسته یې احتجاج او کاربدېز ختم کړی خو که غوښتنې یې ونه منل شوې نو د احتجاج لړۍ به یو وار بیا پیلوي.

د کورمې ډاکټرانو د سېپټېمبر پر ۲۱مه له هغه وروسته پر احتجاج او کاربندېز شول چې د دوی په وینا د سدې تاڼې پولیسو یې پر ځینو ملګرو تشدد وکړ خو پولیس د وهلو ټکولو خبره نه مني.

د سدې روغتون مشر ډاکټر واجدعلي شاه د سېپټېمبر پر ۲۲مه مشال راډیو ته وویل، د ضلعې پولیسو له مشر محمد قریش سره یې لیدلي او هغوی ورته باور ورکړی چې په درو ورځو کې دننه به د پېښې شفافې پلټنې کېږي او د ذمه وارو کسانو پروړاندې به قانوني کارروايي کېږي.

نوموړی وايي، له دې ډاډ تر لاسه کولو وروسته یې احتجاج او کاربدېز ختم کړی خو که غوښتنې یې و نه منل شوې نو د احتجاج لړۍ به یو وار بیا پیلوي.

د کرمې د پولیسو د مشر رسمي دریځ په دې اړه تر اوسه مخې ته نه دی راغلی، د مشال خبریال ورسره د خبرو هڅه وکړه خو څه نتیجه یې ورنه کړه.

خو یو بل لوړ پوړي ځايي چارواکي د نوم پټ ساتلو په شرط مشال راډیو ته وویل، په درو ورځو کې به هغه کسان د قانون منګولو ته سپارل کېږي چې په روغتیايي کارکونکو یې تشدد کړی دی.

په لوګر کې ۲۵ وسله وال طالبان وژل شوي

د افغان ځواکونو د عملیاتو پر مهال (انځور له ارشیفه)

د افغانستان د لوګر ولایت پولیسو ویاند شاپور احمدزي مشال راډیو ته وویل، چې دغه وسله وال طالبان هغه مهال ووژل شول، چې پر افغان ځواکونو یې د لوګر په بېلا بېلو سیمو کې بریدونه وکړل.

دی وایي په تېرو ۲۴ ساعتونو کې وسله والو طالبانو د لوګر د برکي برک ولسوالۍ اړوند تقي کلا او د ولايت مرکز اړوند شکر کلا کې د افغان ملي پولیسو پر پوستو بريدونه وکړل چې په ځوابي بریدونو کې د څو سرګروپانو په ګډون ۲۵ تنه وژل شوې او ۱۸ تنه نور يې ټپيان شوي دي.

که څه هم شاپور احمدزي افغان ځواکونو ته د اوښتې مرګ ژوبلې په اړه څه و نه ویل، خو یوې بلې باوري امنیتي سرچینې د نوم نه ښودلو په شرط مشال راډیو ته وویل، چې په دې نښتو کې درې افغان سرتېري وژل شوي او دوه نور ټپیان دي.

وسله والو طالبانو تر اوسه په دې اړه څه نه دي ویلي.

انډین پرېمیېر لیګ: نن راجستان رايلز او  چېنی سوپر کېنګز لوبېږي

هند کرکټ غوره لیګ (انډين پريمير ليګ) کې به د راجستان رايلز او چېنی سوپر کېنګز ترمنځ مقابله وي. دا لوبه به د متحده عربي اماراتو په شارجه کرکټ لوبغالي کې نن ماښام د پېښور پر وخت اووه بجې پیلېږي.

د نړۍ په دې مشهور ټورنامنټ کې به شاوخوا ۶۰ لوبې کېږي. دا لوبې د کورونا وایرس له کبله نه یوازې د هند پر ځای په متحده عرب اماراتو کې ترسره کېږي بلکې نندارچیان به هم میدان ته د ورتګ اجازه نه لري.

د ایران اټومي پروګرام اړوندو کسانو باندې د امریکا بندیز

ایران: په قم کې د ایران اټومي بټۍ

امريکا به نن د سپتمبر پر ۲۱مه د ايران د روايتي وسلو، ميزايلو او نيوکلير پروګرام سره پر تړلو ځينو خلکو او ادارو بنديزونه ولګوي. دغه چارواکي د نوم نه خپرولو په شرط رویټرز خبري اژانس ته ويلي ښايي ايران د دې کال تر پايه پورې د ايټمي وسلو لپاره کافي خام مواد ولري او دا چې تهران د شمالي کوريا سره د اوږده واټن ويشتونکو ميزايلو په اړه همکاري بيا شروع کړې ده.

د امريکې ځينو نيزدي اروپايي اتحاديانو د مخالفت سربيره، واشنګټن د سپتمبر په ۱۹مه پر ايران د ملګرو ملتونو بندیزونه يو ځل بيا عملي کړل.

بلغاریه: د اسرایلي وګړو وژونکو ته د ټول عمر بند سزا

بلغاريه يو عدالت په ۲۰۱۲ کال کې شوي پر يو بس هغه بمي بريد لپاره دوو تورنو کسانو ته د هغوی په غېب کې عمر قېد سزا اورولې چې يو ډرايور او پينځه اسريلي وګړي يې وژلي وو. سزا شوي کسان ميلاد فراح د لبنان او اسټريليا او حسن الحاج د لبنان او کينيډا غبرګ شهريت لري. د دوی ځای ځایګی نه دی معلوم او انټرپول پولیس يې د نيولو هڅه کوي.

دغه بريد يو لبناني فرانسوي محمد حسن الحسيني په ځان پورې په تړلي بم پر هغه بس کړی وو چې بلغاريه ته ورغلي اسرايلي سېلګر يې ليږدول. د بلغاريه چارواکو د دې حملې تور پر حزب الله پورې کړی وو خو هغوی رد کړې وو.

''طالبانو تېرو دوو اونیو کې لسګونه افغان وژلي''

کندهار کې د بمي چاودنې ژوبل په روغتون کې تر درملنې لاندې: ۲۰۲۰، ۱۰ سېپټمېمبر

د افغانستان کورنيو چارو وزارت وايي په تېرو دوو اونيوو کې طالبانو ۹۸ ولسي وګړي وژلي دي. د دې وزارت وياند طارق ارين نن رسنيوو ته په لېږلي پېغام کې ويلي چې پر دې سربېره ۲۳۹ ټپيان کړي دي. د هغه په خبره تر ټولو ډېر بريدونه په ننګرهار او تخار کې شوي دي.

بلخوا د سرپل ولايت د سانچارک ولسوال نقیب الله دقیق نن ازادي راډیو ته وویل چې د طالبانو امر باالمعروف ډلې په دې ولسوالۍ کې بيګا يوه ښځه وژلې ده.

د دې وژنې علت نه دی معلوم. طالبانو د دې دواړو خبرونو په غبرګون کې څه نه دي ويلي.

میرلي کې یوه روغتیاپالې وژل شوې

د شمالي وزیرستان، ميرعلي په سب ډويژن کې نن يوه روغتيايي کارکوونکې وژل شوې ده. د ځايي پولیسو له خوا مشال راډيو ته د ورکړل شوو معلوماتو ترمخه دا ښځه ناهېده ګل نومېږي چې په نتاسي خوشالي کلينيک کې تر کار کولو وروسته کور ته د تګ په وخت پرې ډزې وشوې.

پولیسو ويلي چې بريدګر تښتيدلي دي او دوی پلټنې پېل کړې دي. تر اوسه هېڅ یوې وسله والې ډلې د دې حملې زمه واري نه ده منلې.

د خبريالې شاهينه شاهين وژونکي‌ پرضد احتجاجي کېمپ لګول شوی

د خبريالې وژنه د سياسي ګوندونو ترڅنګ د خبريالانو سازمانونو غندلې ده.

په کوټه کې د وژل شوې خبريالې شاهينه شاهين د قاتل د نيولو لپاره احتجاجي کېمپ لګول شوی دی.

احتجاجيان وايي، ترڅو چې د خبريالې په وژنه کې تورن کس ونه نيول شي دوی به احتجاج ته دوام ورکوي.

په کېمپ کې د خبريالې کورنۍ او د زده کوونکيو سازمانونو غړي ناست دي. شاهينه شاهين د سېپټېمبر پر پنځمه نېټه په تربت کې په ډزو وژل شوې وه.

د هغې مور د شاهينه د خاوند محراب ګچکي پرضد مقدمه درج کړې ده. د بلوچستان حکومت وياند لياقت شاهواني د سېپټمېبر پر ۲۰ مه نېټه مشال راډیو ته وويل چې پولیس د تورن کس پرضد چاپې وهي خو هغه پټ دی.

د خبريالې وژنه د سياسي ګوندونو ترڅنګ د خبريالانو سازمانونو غندلې ده.

پاکستان يونېن اف جرنلټس وايي، په تېرو دوو لسېزو کې ۴۵ خبريالان وژل شوي دي.

د پکتیکا د امنیت امر محمداصف توخی ووژل شو

نوموړی په یحیا خېلو کې په مخامخ جګړه کې ووژل شو.

د سېپټمبر پر ۱۹مه، د پکتیکا د امنیه قوماندانۍ د امنیت امر سمونوال محمداصف توخی د یاد ولایت د یحیاخېلو او اومنې ولسوالۍ اړوند د (اته خونې) په سیمه کې وسله والو سره په مخامخ جګړه کې وژل شوی او درې پولیسان ټپیان شوي دي.

د پکتیکا د ولایت مقام څخه مشال راډیو ته په استول شوې خبرپاڼه کې پدې جګړه کې د یاد ولایت د خاص پولیسو قوماندان خانزاده کاروان هم ټپي شوی دی.

خانزاده کاروان رسنیو ته په استول شوي ویډیويي پیغام کې خپل ټپونه برسیرن بللي دي.

د اصف توخي ملګرو د هغه تابوت پورته کړی دی.
د اصف توخي ملګرو د هغه تابوت پورته کړی دی.

د پکتیکا د امنیه قوماندانۍ د رسنیو دفتر ویلي، چې په یاده سیمه کې اوس هم د افغان هوايي او پلي ځواکونو عملیات روان دي او د دوی لومړني مالومات دادي، چې وسله والو ته په کې مرګ ژوبله اوښتې ده.

د برید مسوولیت وسله والو طالبانو په غاړه اخیستی.

طالب ویاند ذبیح الله مجاهد رسنیو ته ویلي، چې پدې جګړه کې ۸ پولیس وژل شوي او د خاص قطعې د قوماندان په ګډون ۵ پولیسان په کې ټپیان شوي دي.

محمداصف توخی خواوشا یوه میاشت وړاندې پدې ولایت کې دامنیت امر په توګه ټاکل شوی وو.

د الېکسي نوالني روغتیايي وضعیت په ښه کېدو دی

الېکسيې وايي چې اوس هم په پوړو مشکل سره خېږي.

د روسیې اپوزیشن سياستوال الېکسي نوالني وايي، صحت يې د ښه کېدو لور ته روان دی خو ډېر وخت به اخلي.

نوموړی وايي، ده ته زهر ورکړل شوي وو.

ناولني د سېپټېمبر پر ۱۹مه په خپله انسټاګرام پاڼه دغه څرګندونې کړي دي.

هغه خپل هغه تصويران هم خپاره کړي چې په برلن روغتون کې پر زینو د کوځېدو پر مهال اخېستل شوي دي. نوموړي تازه پر انسټاګرام لیکلي چې اوس هم په پوړو مشکل سره خېژي.

اليکسي ناوليني په برلن روغتون کې په پوړو د کوځېدو پرمهال
اليکسي ناوليني په برلن روغتون کې په پوړو د کوځېدو پرمهال

نوموړی چې د روسیې د ولسمشر سر سخت مخالف ګڼل کېږي په اګست میاشت کې تر بېمارېدو وروسته د برلین روغتون ته د درملنې لپاره ولېږدول شو.

په برلن کې ډاکټرانو ويلي دي چې د ناولني صحت ښه شوی خو معلومه نه ده چې د خطرناکو زهرو اغېز به د نوموړي پر صحت تر کومې موجود وي.

جرمني وايي، په دريو هیوادونو کې د لېبارټريو ټسټونه ښايې چې د درغليو ضد کمپاين کوونکي او په حکومت انتقادکونکي ۴۴ کلن ناوليني ته نووېک اعصابي ايجنټ ورکړل شوی دی.

بلخوا غربي حکومتونه له روسيې پر دې اړه د وضاحت او پلټنو غوښتنه کوي.

حکومت: د تعلیمي ادارو بندولو په اړه چټکې پرېکړې نه کوو

د پاکستان حکومت وايي، له شپږو مياشتو راهيسې تعليمې ادارې بندې وې او د پرانستلو پريکړه يې په پوره احتياط سره شوې.

د پاکستان د تعليم وفاقي وزير وايي، د تعليمي ادارو بندولو په اړه څه قسمه د جلدبازۍ پريکړه به تعليم ته سخت تاوان ورسوي.

شفقت محمود د سېپټېمبر پر ۱۹مه په خپله ټويټر پاڼه ليکلي، په دې لړ کې څه قسمه پرېکړه بايد د صحت وزارت د سپارښتنو په رڼا کې وشي.

نوموړی وايي، له شپږو مياشتو راهيسې تعليمې ادارې بندې وې او د پرانېستلو پريکړه يې په پوره احتياط سره شوې ده.

د دهغه په خبره ۹۰ فيصده سرکاري او د کم فيسونو شخصي تعليمي ادارې د انلاين تعليم ورکولو سهولت نه لري او دارنګ چې دا تعليمي ادارې بندې کړل شي نو زياتره زده کوونکي به له زده کړو بې برخې شي.

د پاکستان حکومت د کورونا مخنیوي لپاره د احتیاطي تدابیرو نه عملي کولو له کبله يې په تېرو څلورو ورځو کې په مجموعي توګه ۳۵ تعليمي ادارې تړلي.
د پاکستان حکومت د کورونا مخنیوي لپاره د احتیاطي تدابیرو نه عملي کولو له کبله يې په تېرو څلورو ورځو کې په مجموعي توګه ۳۵ تعليمي ادارې تړلي.

دا په داسې حال کې ده چې په پاکستان کې د کورونا وايرس کمانډ اېنډ کنټرول مرکز د سېپټېمبر پر ۱۸مه ويلي ول چې د کورونا مخنیوي لپاره د احتیاطي تدابیرو نه عملي کولو له کبله يې په تېرو څلورو ورځو کې په مجموعي توګه ۳۵ تعليمي ادارې تړلې دي.

په ځينو تعليمي ادارو کې د استادانو او زده کونکو په کورونا د اخته کېدو راپورونه هم مخې ته راغلي دي.

نور پورته کړئ

ځانګړې پاڼې

له موږ سره اړیکي

XS
SM
MD
LG