د انډونيزيا چارواکي وايي، خپل هغه ١٧ تنه وګړي يې نيولي چې له سوريې ورستانه شوي ول.
د دوى په خبره شک کېږي چې دغو کسانو به ښايي له اسلامي دولت سختدريځې ډلې داعش سره اړيکې درلودې.
د مهاجرت ادارې يوه وياند وويل چې په نيول شويو کسانو کې لږ تر لږه دوه ماشومان هم شامل دي چې نن له استانبوله د سوى-کارنو هاتا هوايي ډګر ته له رسېدو سره سم ونيول شول.
يوه چارواکي ويلي، ترکيې دغه کسان سوريې ته د داخلېدو په تړاو د اندېښنو له کبله له هېواده وشړل.
د ترهګرۍ-ضد ادارې يوه چارواکي رويټرز اژانس ته ويلي، لا هم له دغو کسانو پوښتنې-ګروېږنې روانې دي؛ که چېرې په ترهګرۍ پورې اړوند کوم جرم سره د دوى ارتباط څرګند شي، څېړنې به ادامه ومومي.