د ایران ولسمشرحسن روحاني له نړیوالو سره د تهران پر اټومي موافقه د امریکا منتخب ولسمشر ډونالد ټرمپ انتقادونه رد کړل او ویې ویل چې پردې موافقه بیا بحث نه کوي.
حسن روحاني د یاد تاریخي جوهري تړون د کال په پوره کېدو د سېنشبې په ورځ یوې خبري غونډې ته د وینا پر مهال وویل چې دا تړون د امریکا لپاره هم ګټور دی.
نوموړي پر ټرمپ انتقاد وکړ چې په وینا یې، د دغه تړون امریکا ته دګټو ناخبره دی. ښاغلي ټرمپ دا تړون تر ټولو بد یاد کړی او وايي په ترڅ کې یې ایران ډېر څه تر لاسه کوي.
خو روحاني د ټرمپ نیوکې یواځې شعارونه بللي او وايي دی د دغه جوهري تړون د سباوون په اړه هیلمن دی.
د ایران او د نړۍ د شپږو ځواکمنو هېوادونو ترمنځ د جوهري تړون په ترڅ کې ایران له خپلو اټومي هلو ځلو لاس اخیستی او په غبرګون کې یې پر دغه هېواد وضع شوي بندیزونه نرم شوي وو.
