د خیبر پښتونخوا سینیر صوبايي وزیر عنایت الله وايي د پاکستان شناختي کارډ ادارې « نادرا » په غیر قانوني ډول د لاکونو خلکو شناختي کارتونه بلاک کړي چې دوی یې د خلاسولو غوښتنه کوي.
نوموړي د دوشنبې په ورځ په پېښور کې د اسمبلۍ تر غونډې وروسته مشال راډیو ته وویل نادرا د دوی د ضمانت باوجود دغه کارتونه نه فعالوي.
د دونشبې ورځ په همدې موضوع د خیبر پښتونخوا په صوبايي اسمبلۍ کې هم بحث وشو او د اسمبلۍ غړیو وویل په نورو صوبو کې د اوسېدونکیو پښتنو شناختي کارتونه هم نادرا بلاک کړي دي.
دوی وویل که مرکزي حکومت دغه ستونزه اواره نه کړه نو دوی به په اسلام اباد کې ستره مظاهره وکړي.
