د بلوچستان په اسمبلۍ کې د اپوزېشن مشر مولانا عبدالواسیع وايي ، د کوټې پر پولیس مرکز په برید کې بهرني استخبارات لاس نه لري.
نوموړي د چارشنبې په ماښام په کوټه کې تر خبري غونډې وروسته مشال راډیو ته وویل چې د اپوزېشن غړو د دې برید پر ضد عدالت ته د تلو پرېکړه کړې ده.
وزیراعلی نواب ثنالله زهري اعلان وکړ چې د پولیسو پر دې روزنیز مرکز د برید پلټلو لپاره یې د کوټې د پولیس مشر اعتزاز ګورایه په مشرۍ کې یو کمېشن جوړ کړی دی.
دا له هغه وروسته ده چې د سېشنبې په شپه د کوټې په سریاب سیمه کې وسله والو د پولیسو پر یو روزنیز مرکز برید وکړ. په دې برید کې لږ تر لږه یو شپېته کسان ووژل شو او تر یو سل شل زیات ټپیان شو.
د بريد مسوليت داعش او د پاکستاني طالبانو د حکیم الله مسود ډلې منلی خو د بلوچستان د ملېشه ځواکونو مشر ویلي چې لښکر جنګوي «العالمي» ډله په دې برید کې ښکېله وه کومې ته چې د دوی په وینا له افغانستانه لارښوونه کېده.
