د لبنان د پلازمېنې بیروت په جنوبي برخه کې په دوو ځانمرګو بریدونو کې لږ تر لږه ۳۷ کسان وژل شوي او له ۱۰۰ زیات ژوبل دي.
د پېښې ځای د لبنان شیعه حزب الله غورځنګ پیاوړی مرکز دی. پولیس وايي، دوه ځانمرګو بریدګرو په برج البرنجه سیمه کې د منصور مارکېټ او عین السیکي په نوم یوه دوکان مخې ته دوه چاودنې وکړې.
د اسلامي دولت وسله والې ډلې تېر ماښام تر پېښې وروسته د حملو ذمه واري ومنله. عیني شاهدان وايي، کله چې تر لومړي برید وروسته خلکو د پېښې ځای ته ځان ورساوه او مرستندویه کارونه یې پیل کړل نو دویمه ځانوژونکې حمله وشوه.
له ۲۰۱۱ز کال راهیسې چې حزب الله په شام کې د اپوزیشن ځواکونو پر ضد د ولسمشر بشارالاسد پوځي مرسته کوي نو د لبنان په دغو سیمو کې یو شمېر بمي بریدونه شوي دي.
