د لاسرسي ځای

برتانیا په ایران کې خپل سفارت پرانیزي


شاوخوا څلور کاله وروسته به برتانیا او ایران په تهران او لندن کې خپل سفارتونه بیا پرانیزي.

په ۲۰۱۱ز کال کې پر ایران د غربي بندیزونو پر ضد قهرجنو مظاهره کوونکو په تهران کې پر برتانیوي سفارت برید وکړ چې په نتیجه کې یې سفارت وتړل شو.

برتانیوي چارواکي وايي، د هغه هېواد بهرنیو چارو وزیر فېلېپ هامونډ به د یکشنبې یا اتوار پر ورځ په تهران کې د خپل سفارت بیا پرانیستو ته ورشي. چارواکي وايي، تهران به هم پر هغه وخت په لندن کې خپل سفارت پرانیزي.

هامونډ په څه د پاسه یوه لسیزه کې د برتانیې لومړی د بهرنیو چارو وزیر دی چې تهران ته ځي. یو شمېر اروپايي چارواکي د جولای تر ۱۴مې نېټې وروسته تهران ته تللي، پر هغې نېټې ایران او د نړۍ شپږو ځواکمنو هېوادونو اټومي تړون لاسلیک کړ.

د تړون په نتیجه کې ایران خپل اټومي پروګرام محدودوي چې په بدل کې به یې پر هغه هېواد لګېدلي اقتصادي بندیزونه نرم کړل شي.

XS
SM
MD
LG