د بلوچستان ګوادر پولیس وايي، له یوه کوره یې شپږ یمني وګړي په داسې حال کې خوشې کړي چې په زنځیرونو تړل شوي ول او پر بدن یې د تشدد نښې وې.
د سیمې پولیسو یوه مشر امام بخش بېګا مشال راډيو ته وویل، دا کسان یې تېره ورځ په نوې ابادۍ کې هغه مهال خوشې کړل چې دوی د حاجي لقمان په نوم د یوه کس د نیولو لپاره پر یوه کور چاپه ووهله.
ده وویل، له یمنیو وګړو یې پلټنې پیل کړې دي چې کله او څنګه ګوادر ته ورغلي ول او څومره موده یې د حاجي لقمان په بند کې تېره کړې ده.
امام بخش زیاته کړه چې لقمان د نشه يي موادو قاچاقبر دی او له مودې راهیسې یې پولیس په لټه کې دي.
