د پښتون مفکر، شاعر او انځورګر خان عبدالغني خان د زوکړې په ياد کې د خيبر پښتونخوا په بېلابيلو برخو کې کلنیزې غونډې دوام لري.   په پېښور  کې د سیاسي او ټولنیزو چارو کارپوهه خادم حسين وايي، چې د غني خان کار او فلسفه د اورپکيتوب مفکورې ضد ده نو د ده په خبره د خېبر پښتونخوا صوبايي او مرکزي حکومتونو ته پکار ده چې د غني خان کار ستاينې په موخه د هغه په باب د جوړېدونکو غونډو او تقريباتو ملاتړ وکړي، چې دارنګ په قامي کچه د ترهه ګرۍ او سختدريځۍ ضد د ازادۍ او روښنفکرۍ مفکوره مخې ته راشي.   د مشال  همکار اسرار عالم مومند له خادم حسين سره مرکه کړې او په سر کې يې ترې پوښتلي چې په موجوده حالاتو کې د حکومت او نورو ادارو د مرستو او مالي ګټو پرته د ادبي او فرهنګي بهیر پښتانه څنګه دې جوګه شول چې د غني خان په ياد کې غونډې، دستورې، مشاعرې او انځوريز نندارتونونه جوړکړي.