د افغانستان د کندهار ولایتي چارواکي وايي چې امنیتي ځواکونو یوه پنځه کسیزه ترهګره ډله نیولې ده.
د کندهار ولایت د مطبوعاتي دفتر د چارشنبې پر ورځ په یو خبرپاڼه کې وویل، چې دا ډله د ملي امنیت د ریاست مامورینو د استخباراتي معلوماتو پر اساس نیولې ده.
په خبرپاڼه کې ویل شوي چې دې ډلې په کندهار ښار او شاوخوا سیمو کې فعالیت کاوه.
د کندهار چارواکي وايي، چې په ډله کې یو کس د بلوچستان صوبې د پښین اوسېدونکی دی او له دوی سره وسلې او مهمات هم موندل شوي دي.
