د فاریاب ولایت د بل چراغ ولسوالۍ د امنیه قومندان محمد ظفر د ماین په یوه چاودنه کې له ټپي کیدو وروسته نن (چارشنبه) سهار ساه ورکړه.
د دې ولایت د امنیې قومندانۍ د امنیت امر محمد نعیم اندرابي مشال راډیو ته وویل، چې امنیې قومندان د تیرې سېشبنې پر ورځ هغه مهال ټپي شو، چې د بل چراغ ولسوالۍ په کولیان سیمه کې یو موټر په خښ شوي ماین برابر شو.
اندرابي وایي، دغه ماین د وسله والو طالبانو له خوا ځای په ځای شوی وو.
دا په داسې حال کې ده، چې درې ورځې وړاندې د بل چراغ ولسوالۍ د امنیت مدیر عبدالومن وسله والو طالبانو وتښتاوه او بیا یې وواژه.
