د افغانستان د انتخاباتو خپلواک کمېسیون وايي، دویم پړاو ته د ولسمشریزو ټاکنو تګ له امکانه لرې نه ده.
د تېرې پنجشنبې پر ورځ د ټاکنو کمېسیون مشر یوسف نورستاني د درېیم ځل لپاره د ولسمشرۍ د ټاکنو د یوې بلې برخې پایلو تر اعلان وروسته خبریالانو ته وویل، د زیاتو رایو نتیجې له څرګندېدو سره دی باور نه لري چې انتخابات دې په لومړي پړاو کې پای ته ورسي.
((فکر کوم چې که پاتې ۱۷،۵ فیصده [رایې] وشمارل شي، شک دی چې څوک دې په لومړي پړاو کې ګټونکی شي.))
ټاکل شوې ده چې د ولسمشرۍ د انتخاباتو د ټولو رایو لومړنۍ پایلې سبا اعلان شي. تر اوسه په اعلان شویو پایلو کې عبدالله عبدالله شاوخوا ۴۴ او اشرف غني شاوخوا ۳۳ فیصده رایې تر لاسه کړې دي.
