د لاسرسي ځای

تازه خبر

خبرونه

پېښور کې د ښوونځیو ښځینه استادانو مظاهره وکړه

نن په پېښور کې د لومړنیو زده کړو ښوونځیو ښځینه استادانو مظاهره کړې ده.

د پېښور خبریالانو مرکز مخې ته د مظاهرې پر وخت ښځینه استادانو سړک هم تړلی وو. دوی غوښتنه کوله چې د ګوزڼ ناروغۍ مخنیوي د کیمپېن دنده دې دوی ته نه سپارل کېږي. د ښځینه استادانو سازمان مشرې نزاکت کلثوم د مظاهرې پر وخت مشال راډيو ته خپلې ستونزې یادې کړې: کټ

دې ښځینه استادانو مظاهره پر داسې وخت کړې ده چې په پېښور کې د پولیو ناروغۍ مخنیوي لپاره د خیبر پښتونخوا حکومت کیمپېن روان دی.

د نننۍ ورځې ټول خبرونه وګورئ

پېژندل شوې افغانه شربت ګله ایټالیا ته ورسېده

شربت ګله

د افغانستان هغه پېژندل شوې مېرمن شربت ګله ایټالیا ته ورسېده چې عکس یې د نېشنل جیوګرافیک مجله کې تر چاپ وروسته نړیوال شهرت موندلی وو.


د ایټالیا د وزیراعظم ماریو دراګي دفتر د نومبر پر ۲۵مه په یوه اعلامیه کې وویل چې هیواد یې ایټالیا ته د شربت ګلې لېږدول له هغه تنظیم کړل چې لومړی هغې په دې برخه کې د همکارۍ غوښتنه کړې وه.

شربت ګله له هغه وروسته د 'شنو سترګو' لرونکې افغانې کډوالې په توګه په نړیواله سطحه مشهوره شوه چې د امریکا پېژندل شوي عکاس سټیف مککیوري په ۱۹۸۴ز کال د پاکستان په یوه کمپ کې د هغې عکس واخېست او عکس یې په نېشنل جیوګرافیک مجله کې چاپ شو.

پاکستاني چارواکو په ۲۰۱۴ز کال کې شربت ګله د پاکستاني شناخت کارډ په رانیولو تورنه او له پاکستانه یې د هغې د وتلو امر وکړ.

شربت ګله، په ۲۰۱۶ز کال کې کابل ته ستنه شوه چې د پخواني ولسمشر محمد اشرف غني له هرکلي سره مخامخ او د یوه اپارتمان کیلي هم ورکړل شوه.

په کندهار کې د نښتې پر مهال یو وسله وال وژل شوی

د افغانستان په کندهار ولایت کې د دوو وسله والو حمله کوونکو او طالبانو ترمنځ په ډزو کې یو وسله وال وژل شوی او یو ژوندی نیول شوی دی.

په دغه پېښه کې دوه ولسي وګړي هم ټپیان شوي دي.

په کندهار کې د طالبانو یوې مطبوعاتي سرچینې د نوم نه ښودلو په شرط مشال رادیو ته وویل چې دا پېښه د نومبر پر ۲۵مه د لومړۍ حوزې په شهیدانو څلورلاري کې شوې.

د سرچینې په خبره دوو وسله والو موټر سایکل سپرو په سیمه کې په ګزمه بوختو طالبانو باندې ډزې کړي خو په ځوابي ډزو کې یو بریدګر وژل شوی او یو ژوندی نیول شوی دی.

تر اوسه د دې پېښې مسوولیت چا نه دی منلی.

یونېسف: افغانستان کې څلور میلیونه ماشومان له ښوونځیو بې برخې دي

یونېسف وايي، د ماشومانو د تعلیم لپاره باید ډېر نور کارونه هم ترسره شي. انځور- ارشیف

د ماشومانو د ملاتړ لپاره د ملګرو ملتونو مرستندویه اداره "یونېسف" وايي، په تېرو درې میاشتو کې یې په افغانستان کې څه باندې یو لک او ۴۲ زره ماشومانو ته د زده کړې امکان برابر کړی دی.

دې ادارې د نومبر پر ۲۵مه په خپله رسمي ټویټرپاڼه کې لیکلي چې په دې موده کې یې د ۵۳۵۰ ولسي ټولګیو ملاتړ کړی چې دغه شمېر ماشومانو ته د زده کړې امکانات برابر کړي.

د ماشومانو د ملاتړ لپاره د ملګرو ملتونو مرستندویه ادارې ویلي چې په افغانستان کې لاهم تر څلور میلیونو ډېر ماشومان چې تر نیمايي زیاتې یې نجونې دي، له ښوونځیو بې برخې دي.

یونېسف وايي، د ماشومانو د تعلیم لپاره باید ډېر نور کارونه هم ترسره شي.

پاکستان هند ته اجازه ورکړه چې غنم او درمل افغانستان ته ولېږدوي

د واګه بندر

پاکستان هند ته اجازه ورکړه چې له افغانستان سره مرسته شوی ۵۰ زره ټنه غنم او درمل د دغه هیواد د واګې بندر له لارې افغانستان ته ولېږدوي.

د پاکستان بهرنیو چارو وزارت په اعلامیه کې ویل شوي د واګې بندر له لارې د دغو مرستو د لېږدولو جواز د نومبر پر ۲۴مه د پاکستان په بهرنیو چارو وزارت کې د هند شارژدافیر ته وسپارل شو.

د پاکستان بهرنیو چارو وزارت د اسلام اباد دغه پرېکړه د "بشر دوستانه استثنایي اقدام" په توګه یاده کړې، ځکه وړاندې له دې پر هندي سوداګریزو توکو بار هېڅ لارۍ له واګې بندر څخه د تیرېدو اجازه نه درلوده.

د هند په دغو بشري مرستو کې چې ټاکل شوې د پاکستان له لارې افغانستان ته انتقال شي، غنم او درمل شامل دي.

د یادونې وړ ده چې د واګې بندر له لارې د هند د بشري مرستو غوښتنه دوه اوونۍ وړاندې پاکستان ته د طالبانو حکومت د یوه پلاوي د سفر پر مهال د طالبانو حکومت د بهرنیو چارو وزارت سرپرست له خوا مطرح شوه.

انګلش چېنل کې د کډوالو د یوې کشتۍ له ډوبېدو ۲۷ تنه مړه

دا پېښه د فرانس او برتانیا ترمنځ د انګلش چېنل په نامه هغه سمندر کې شوې چې زیاتره کډوال پرې نن سبا برتاینا ته د اوښتلو هڅې کوي.

برتانیا ته د تللو پر مهال په سمندر کې د کشتۍ ډوبېدو له وجې لږ تر لږه ۲۷ کډوال مړه شوي دي.

دا پېښه د نومبر پر ۲۴مه د فرانس او برتانیا ترمنځ د انګلش چېنل په نامه هغه سمندر کې شوې چې زیاتره کډوال پرې نن سبا برېتانیا ته د اوښتلو هڅې کوي.

د فرانس کورینو چارو وزیر جیرالډ درمانیم ویلي داسې ګومان کېږي چې په دغه کشتۍ کې ۳۴ کسان سواره وو.

د مړیو تر څنګ د دوو کډوالو د ژوندي را ایستلو وروسته د فرانس او برېتانیا لخوا د ژغورنې ګډ عملیات درېدلي دي. تر اوسه معلومه نه ده چې دا کډوال د کومو هېوادونو وګړي دي.

لومړی د مړیو شمېر ۳۱ ښودل شوی وو خو بیا د فرانس کورنیو چارو وزارت دا شمېر ۲۷ ته را کم کړ.

درمانیم ویلي له دې پېښې سره په تړاو څلور مشکوک انساني قاچاقبران نیول شوي دي.

د فرانس د شمېرو تر مخه سږ کال تر اوسه ۱۳ زره او ۵۰۰ کسانو د انګلش چېنل له لارې برتانیا ته د اوښتلو هڅه کړې چې اووه زره او ۸۰۰ یې له سمندره ژغورل شوي دي.

د ټېکسونو او بجلۍ نرخ کمولو لپاره د ټول پاکستان پټرول پمپونو اتحادیې هړتال

په کوټه کې خلک د پټرول اخیستو لپاره په لیکو کې ولاړ دي

له نومبر ۲۵مې څخه په ټول پاکستان کې د پټرول پمپونو د مالکانو اتحادیې د هړتال اعلان کړی دی.

په خیبر پښتونخوا کې د پیټرول پمپ اسوسییېشن جنرل سیکټري ګل نواز اپرېدي د نومبر پر ۲۴مه مشال راډیو ته وویل دا هړتال به تر هغې جاري وي چې حکومت ورته ټېکسونه او د بجلۍ نرخونه کم کړي نه وي.

نوموړي زیاته کړه، حکومت ټېکسونه، د بجلۍ بیلونه او د مزدورانو دیاړي زیات کړی چې په نتیجه کې یې دوی له تاوان سره مخ دي او روزګار پرېښودو ته مجبوره شوي دي.

په پټرول پمپ ایسوسي ایشن کې په ټول پاکستان کې له ۱۳۰۰۰ او په خیبر پښتونخوا کې تر ۱۵۰۰ څخه زیات پټرول پمپونو مالکان شامل دي.

بلخوا حکومت وايي چې له یادې اتحادیې سره یې خبرې اترې روانې دي او هیله ده چې دوی به هړتال ختم کړي.

د امریکا ولسمشر د جمهوریت پر موضوع د یوې لویې سرمشریزې کوربتوب کوي

دا سرمشریزه به د ډېسېمبر له نهمې تر۱۰ نېټې د ویډیو لینک له لارې ترسره کېږي.

د امریکا ولسمشر جو بایډن راراوانه میاشت د جمهوریت پر موضوع په یوه سرمشریزه کې د ګډون لپاره ۱۱۰ هېوادونو ته بلنه ورکړې ده.

دا سرمشریزه به د ډېسېمبر له نهمې تر۱۰ نېټې د ویډیو لینک له لارې ترسره کېږي.

د نومبر پر۲۳مه د بهرنیوچارو د وزارت په ویبپاڼه په خپور شوي یو نوملړ کې غونډې ته د امریکا غربي اتحادیان رابلل شوي خو چین او روسیه پکې شامل نه دي.

په ګډونوالو کې د ارمینییا، بلغاریا، جورجیا، کوسوو، مالدووه، مانیټینیګرو، شمالي مقدونیا، پاکستان، رومانیا، سربیا او اوکراین نومونه شامل دي. او د اذربایجان، بوسنیا هرزیګووینا او هنګري په ګډون د منځني اسیایي هېوادونو څخه یو ته هم بلنه نه ده ورکړل شوی.

په دې سرمشریزه کې به د حکومتي چارواکو، مدني ټولنې او غیر سرکاري میدانونونو څخه استازي برخه اخلي.

د بهرنیو چارو وزارت تر مخه دا سرمشریزه به جمهوریت ته په ورپېښو ننګونو او ورسره تړلو فرصتونو تمرکز کوي او د اړونده ادارو مشرانو ته به د انفرادي او اجتماعي ژمنو د اعلانولو، اصلاحاتو په کور دننه او بهر د جمهوریت په دفاع کې د ګامونو اخېستو لپاره یو پلیټ فارم ورکوي.

پېښور کې دوه پولیس د عملیاتو پر مهال وژل شوي

پېښور کې یو پولیسوال د ډیوټۍ پر مهال

بېګا د شپې پرمهال په حیات آباد کې د لټون عملیاتو پر مهال د وژل شويو دوو پولیسوالو جنازه په پولیس لاین پېښور کې وشوه.

په دغه مهال د خیبر پښتونخوا د پولیسو مشر معظم جا انصاري له خبریالانو سره په خبرو کې وویل چې د حیات اباد فېز ۷ کې بېګا شپه په یوه کور کې په جرمونو د ککړو مشکوکو کسانو په اړه د اطلاع پر اساس عملیات کېدل چې دا پېښه رامنځ ته شوه او دوی دوه پولیس وال پکې ووژل شول.

دی وايي، په عملیاتو کې پر پولیسو د ‌ډزو بریدکوونکيو په ګډون اووه کسان نیول شوي دی او وسله یې هم ترې نیولې ده.

د دې پېښې په باب د پولیسو بیان کې ویل شوي چې له نیول شويو ملزمانو نورې پلټنې هم رواني دي.

روغتیا نړیوال سازمان: ښايي اروپا کې د کویډ-۱۹ له وبا زرګونه نور کسان ومري

دا په داسې حال کې ده چې په اروپايي هیوادونو کې د وایرس ځپلو شمېره پورته شوې ده.

روغتیا نړیوال سازمان (ډبلیو اېچ او) وايي چې د مارچ تر میاشتې پورې په اروپا کې نور ۷۰۰۰۰ کسان له کووېډ- ۱۹ ناروغۍ څخه مړه کېدای شي.

دا په داسې حال کې ده چې په اروپايي هېوادونو کې د کویډ-۱۹ وړجنو شمېره پورته شوې ده.

ډبلیو اېچ او د نومبر پر۲۳مه وویل چې د سازمان د اروپايي سیمې په ۵۳ هېوادونو کې وبا تر اوسه له ۱،۵ میلیونه څخه ډېر کسان مړه کړي او کېدای شي چې په ژمي کې دغه شمېره ۲،۲ میلیونه ته پورته شي.

د دې په نتیجه کې د مارچ له لومړۍ نېټې څخه د سیمې د ۴۹ هېوادونو په روغتونونو کې د جدي پاملرنې په یونټونو کې ښايي د ناروغانو بار ډېر شي.

د روغتیا نړیوال سازمان په اروپايي سیمه کې روسیه، پخواني شوروي هیوادونه او ترکیه شامل دي.

سازمان ویلي چې په اروپا کې یو لوی شمېر غیر واکسین شوي خلک او همدارنګه د ناروغۍ پروړاندې د واکسین په اغیزمنتوب باور کمېدل او وړې وړې ناروغۍ په سیمه کې د وایرس د خورېدو په لاملونو کې شامل دي.

امریکا او اروپا به ډېر ژر پر بېلاروس اقتصادي بندیزونه ولګوي

د امریکا یوه لوړپوړې دیپلوماته او د بېلاروس لپاره د دې هېواد ځانګړې استازې جولي فېشر

امریکا او اروپا به ژر پر بېلاروس نور اقتصادي بندیزونه ولګوي.

دوی پر بېلاروس تور لګوي چې له اروپا سره ګډه پوله کې یې په لوی لاس د کډوالۍ ناورین رامنځته کړی دی.

د امریکا یوې لوړپوړې دیپلوماتې او د بېلاروس لپاره د دې هېواد ځانګړې استازې جولي فیشر د نومبر پر ۲۲مه وویل، د بېلاروس او اروپا سرحد کې د کډوالۍ د ناورین ټول مسولیت د بېلاروسي واکمن الکساندر لوکاشینکا پر غاړه دی.

مېرمن فیشر د وېلسن مرکز یوه کانفرانس ته وویل، د دغه ناورین له کبله زرګونه کډوال بد حالت کې ژوند کوي او په خبره یې لوکاشینکا باید خپل چلند بدل کړي.

نوموړې وویل، امریکا او اروپایي ټولنې په ډاګه کړې چې ژر به له کډوالو د ناوړه استفادې په خاطر پر بېلاروس بندیزونه ولګوي.

د طالبانو حکومت په افغانستان کې رسنیو ته نوې کړنلاره ورکړې ده

کابل کې يوه خصوصي رسنۍ

د طالبانو حکومت د نومبر پر ۲۱مه د افغانستان رسنیو ته پر اتو مادو مشتمله نوې کړنلاره ورکړې ده.

طالبانو په خپله اعلامیه کې ټېلیویژنونو ته ویلي چې باید د دوی په خبره د شریعت او افغاني ارزښتونو خلاف فلمونه، مزاحیه او تفریحي پروګرامونه او داسې ډرامې خپرې نه کړي چې چاته سپکاوی شوی وي یا ښځو پکې اداکاري کړې وي.

په اعلامیه کې دا هم ویل شوي چې ښځینه خبریالانې دې حجاب کوي او ټېلیویژنونه دې داسې فلمونه نه خپروي چې د پيغمبرانو او اصحابو تمثیل پکې شوی وي او تصویري بڼه ولري.

ګڼو شمېر افغان خبریالانو په تېره بیا بهر مېشتو هغو د طالبانو د حکومت دا ګام د رسنیو د ازادۍ محدودول بللي دي.

د طالبانو د حکومت امر باالمعروف او نهی عن المنکر وزارت ویاند عاکف مهاجر مشال راډیو ته وویل چې دا کړنلاره د رسنیو او بیان ازادي نه محدودوي.

شمالي وزیرستان کې پولیسوال وژل شوی

چارواکي وايي، په شمالي وزیرستان کې ناڅرګندو وسله والو په هدفي برید کې یو پولیس وژلی دی.

د پولیسو ځايي مشر عتیق حسین مشال راډیو ته وویل، وسله والو پولیسواله د نومبر پر ۲۱مه هغه مهال وژلی چې دی له میرلي څخه میرامشا ته روان وو.

چا د دې پېښې زمه واري نه ده منلې.

له تېرو څو کلونو راهیسې وزیرستانونه پر له پسې د هدفي بریدونو ښکار دي، سږکال یوازې په شمالي وزیرستان کې د هدفي بریدونو تر ۶۰ زیاتې پېښې رپوټ شوې دي. په سیمه کې د هدفي وژنو ضد په وار وار ولس احتجاجونه کړي او د مخنیوي غوښتنې یې کوي.

دغه بریدونه په داسې حال کې کېږي چې حکومت له تحریک طالبان پاکستان سره د مذاکراتو خبرې کوي چې په وینا یې تر ډېره حده کامیاب شوي دي.

اسټریا کې د کویډ-۱۹ وبا مخنیوي لپاره بشپړ ټولبند لګېدلی

انځور له ارشيفه

په اسټریا کې د کورونا وایرس مخنیوي لپاره د نومبر پر ۲۲مه په مکمله توګه ټولبند لګول شوی دی. دا په داسې حال کې ده چې په اروپا کې خلک د نویو محدودیتونو خلاف احتجاجونه او مظاهرې کوي.

اسټریا (اتريش) چې اته اعشاریه نهه ملینه ابادي لري، ولس ته یې یوازې د ضروري کار لپاره د وتلو، په دوکانونو کې د اړینو سامانونو اخیستو او د ورزش اجازه ده خو رېسټورانونه، شرابخانې او نايان، تیېټرې او غیرضروري دوکانونه به بند وي.

دا محدودیتونه به د ډیسېبمبر تر ۱۲مې وي او چارواکي وايي چې ۱۰ ورځې پس به دې اقداماتو ته بیا کتنه کوي. د دې محدودیتونو خلاف په ویانا کې د تیرې اوونۍ په پای کې له ۳۰ زرو زیات کسان لارو کوڅو ته د احتجاج په توګه راوتي وو. دغسې شاوخوا ۶۰۰۰ کسانو په لینز ښار کې احتجاج وکړ.

د تیرې اوونۍ په پای کې د اروپا په نورو برخو کې هم پرتشدده احتجاجونه وشول.

د هالېنډ په ګڼو ښارونو کې د نومبر پر ۲۱مه هم احتجاجونو دوام درلوده. دغه احتجاجونه درې شپې په دوامداره توګه وشول. د دې ترڅنګ د بیلجیم په برسلز ښار کې هم د نومبر پر ۲۱مه د کورونا وایرس مخنیوي اقداماتو خلاف په احتجاجونو کې د تشدد پېښې وشوې. په دې احتجاج کې شاوخوا ۳۵ زره کسانو برخه اخیستې وه.

د سوډان پوځ سلا شوی چې وزیراعظم پر خپله څوکۍ بحالوي

په سوډان کې مدني فعالان غوښتنه کوي چې پوځ دې په مکمله توګه له سیاسته لاس واخلي.

رپورټونه وايي، د سوډان پوځ پر دې سلا شوی چې لرې کړل شوي وزیراعظم عبدالله همدوک به پر خپله څوکۍ بېرته بحال کړي.

دا له هغه وروسته ده چې د اکتوبر پر ۲۵مه د پوځي کودتا په نتیجه کې همدوک له واکه تر لرې کېدو وروسته په سوډان کې تر څو اوونیو ناارامي وه.

د امه ګوند مشر فضل الله برما ناصر ویلي، د حکومت او پوځ استازي پر دې هم سلا شوي چې د اکتوبر ۲۵مې د پوځي کودتا وروسته نیول شوي چارواکي او سیاستوالان به خوشي کړي.

نوموړي زیاته کړه چې د تړون له مخې به عبدالله همدوک د ټیکنوکرېټک حکومت مشري کوي.

ناصر دا هم وویل چې د تړون په اړه به اعلامیه د نومبر پر ۲۱مه ناوخته خپره شي.

په سوډان کې مدني فعالان غوښتنه کوي چې پوځ دې په مکمله توګه له سیاسته لاس واخلي.

همدوک له پوځي کودتا راهیسي په کور کې نظر بند دی. په سوډان کې په ۲۰۱۹م کال کې امرانه مشر عمر ال بشیر له واکه لیرې کړل شو او اوسنۍ پوځي کودتا ته داسې کتل کېږي چې دا جمهوري حکومت ته د واک انتقالولو په لړ کې خنډ دی.

پولېنډ وايي، بيلاروس په نوو طريقو کډوال دې هېواد ته ورټيل وهي

د پولېنډ د دفاع وزیر ماریوس بلاشزاک د نومبر په شلمه يوې ځايي راډيو ته په خبرو کې وويل چې پر سرحد موجوده ستونزه ښايي مياشتې دوام وکړي.

د پولېنډ چارواکو پر ګاونډي بيلاروس تور پورې کړی چې د نوو طريقو په کارولو سره کډوال دې اروپايي هېواد ته ورټيل وهي.

د پولېنډ د دفاع وزیر ماریوس بلاشزاک د نومبر په شلمه يوې ځايي راډيو ته په خبرو کې وويل چې پر سرحد موجوده ستونزه ښايي مياشتې دوام وکړي.

د منځني ختيځ په زرګونو کډوال په اروپا کې د ميشته کېدو په تمه، له پولېنډ سره د بیلاروس د سرحدي سيمو په ځنګلونو کې میشت دي.

د نومبر په ۱۹مه، هغه کسانو چې پولېنډ ته یې د ننوتلو هڅې کولې، د پوليسو سره نښتې هم وکړې.

اروپايي اتحاديه تور پورې کوي چې د سیاسي فشار لپاره د کارونې په ترڅ کې، بيلاروس کډوال هڅوي چې پولېنډ ته لاړ شي. بيلاروس دا تور رد کړی دی.

ایران وايي، په خلیج فارس کې یې یوه کښتۍ د ډیزلو قاچاق په تور نیولې

ایران وايي، تر یو لاک ۵۰ زره لیټره زیات ډیزل تر لاسه کړي او د بېړۍ ۱۱ کسیزه بهرنۍ عمله یې عدالت ته وړاندې کړې ده.

د ایران انقلاب ساتونکي ځواک د نومبر پر ۲۰مه ویلي چې په خلیج فارس کې یې یوه کښتۍ د ډیزلو د قاچاق په تور نیولې ده.

ایراني رسنیو د سمندري ځواک د یو کمانډر کرنل احمد حاجیان له خولې ویلي چې په قاچاق شویو ډیزلو بار یوه بهرنۍ کښتۍ یې نیولې ده.

د نوموړي په خبره تر پلټنو وروسته یې تر یو لاک ۵۰ زره لیټره زیات ډیزل تر لاسه کړي او د بېړۍ ۱۱ کار کوونکي یې عدالت ته وړاندې کړي دي.

خو حاجیان د بیړۍ د نیول شوو کارکوونکو د شناخت په اړه معلومات نه دي ورکړي او نه یې هم دا ویلي چې کښتۍ کله ونیول شوه.

دا په خلیج فارس کې داسې تازه پېښه ده چې هلته یو شمېر بېړۍ تر حملو لاندې راغلي او یا نیول شوي دي.

نړۍ د نومبر پر ۲۰مه د ماشومانو نړیواله ورځ لمانځي

د ماشومانو د نړیوالې ورځې په مناسبت د نومبر پر ۱۹مه په پېښور کې یوه غونډه وشوه.

په نړۍ کې د نومبر ۲۰مه د ماشومانو د نړیوالې ورځې په توګه لماځل کېږي.

د ماشومانو د نړیوالې ورځې په مناسبت د نومبر پر ۱۹مه په پېښور کې یوه غونډه وشوه.

د خیبر پښتونخوا د ماشومانو خوندیتوب کمېشن مشر اعجاز محمد خان مشال راډیو ته وویل چې تراوسه یې ۳۰ زره ۴۹۵ ماشومان ژغورلي دي.

د ده په وینا، دا ماشومان له جنسي زیاتي، کم عمري ودونو او داسې نورو مسلو سره مخامخ وو.

د ماشومانو لپاره د ملګرو ملتونو ادارې یونیسف پر خپله ویبپاڼه لیکلي چې کوېډ- ۱۹ وایرس وبا وښوده چې نابرابرۍ د هر ماشوم حقونه اغېزمن کړي دي.

دې ادارې زیاته کړې چې دا ځل د ماشومانو نړیواله ورځ تر بل هر وخته زیاته مهمه ده نو باید د هیوادونو مشران د ماشومانو نظرونه او غوښتنې واوري.

په شمالي وزیرستان کې برید یو امنیتي عسکر ټپي کړی

په شمالي او جنوبي‌ وزیرستان کې په دې وروستیو کې د وسله والو او پوځ پر یو بل بریدونه زیات شوي دي.

د شمالي وزیرستان امنیتي چارواکي وايي چې د نومبر پر ۱۹مه د میرامشاه په عليخېلو سیمه کې وسله والو پر امنیتي پوسته برید کړی چې پکې یو پوځي ټپي شوی دی.

په سیمه کې چارواکو د نومبر پر ۲۰مه مشال راډیو ته وویل چې تر پېښې وروسته یې په سیمه کې د لټون عملیات پیل کړي دي.

بلخوا د شمالي وزیرستان د پولیسو مشر عقیق حسین مشال راډیو ته وویل چې په عليخیلو کې تیره شپه وسله والو د نجونو د مډل سکول د استادانو یو استوګنځای ړنګ کړی دی.

نوموړي زیاته کړه چې د چاودنې پر مهال په دغه ځای کې څوک موجود نه وو.

د دواړو پېښو ذمه واري لا چا نه ده منلې.

په شمالي او جنوبي‌ وزیرستان کې په دې وروستیو کې د وسله والو او پوځ پر یو بل بریدونه زیات شوي دي.

د پاکستان سېنېټ د خبریالانو تحفظ په اړه قانوني مسوده منظوره کړه

د پاکستان پارلمان ودانۍ

د قامي اسمبلۍ د منظورۍ څخه وروسته د پاکستان سېنېټ هم د خبریالانو خوندیتوب په اړه قانوني مسوده منظوره کړې ده.

د پروټیکشن اف جرنلسټس اینډ میډیا پروفیشنلز بل په نوم دا قانوني مسوده د نومبر پر ۱۹مه د بشري حقونو وفاقي وزیرې شیرین مزاري سېنېټ ته وړاندې کړه چې ۳۵ سېنېټرانو یې په حق کې او ۲۹ یې په مخالفت کې رای ورکړی.

بلخوا د مخالفو ګوندونو غړیو په قانوني مسوده خپل احتجاج وکړ او زیاته یې کړه چې حکومت د نن په غونډه کې دا مسوده د یو اضافي مادې په توګه شامله کړې ده.

د اپوزیشن غړیو پر دې مهال شعارونه ورکړل چې "ربرسټیمپ پارلیمان د منلو وړ نه دی".

غونډې ته په وینا کې د بشري حقونو وزیرې شیرین مزاري وویل چې وزارت د دې قانوني مسودې په راجوړولو ډېره خواري کړې او د یو کال موده ورباندې لګیدلې ده.

سېنېټ د نن په غونډه کې د نیب ترمیمي بل او د لوړو زده کړو د کمیشن په اړه یوه قانوني مسوده هم منظوره کړې ده.

پر دغه مهال د اپوزیشن د احتجاج له کبله د سېنېټ چیرمین صادق سنجراني دې اړ شو چې غونډه له خپله وخته مخکې پای ته ورسوي.

په بلخ کې د عصبي ناروغیو یو ډاکټر وژل شوی

ډاکټر عالمي چې په مزار شریف کې د یوه رواني کلنیک مشر و، شاوخوا درې میاشتې مخکې د مزار شریف په نهمه ناحیه کې خپل کور ته نېږدې تښتول شوی و.

د افغانستان د بلخ ولایت روغتیايي چارواکي وايي، په دغه ولایت کې د عصبي ناروغیو یو ډاکټر برمته ګرو وژلی دی.

د بلخ ولایت د روغتیا ریاست سرپرست، مولوي صدام د نومبر پر ۱۹مه مشال راډیو ته وویل، د ډاکټر نادر عالمي مړی نن د مزار شریف په لومړۍ حوزه کې موندل شوی.

نوموړی وايي:"ډاکټر صاحب شهید نادر عالمي د شمال یو باقدر او عزتمن شخص و چې دوې میاشتې مخکې اختطافچیانو [برمته ګرو] تښتولی و او داسې ښکاري چې تېره شپه د سختې شکنجې په نتیجه کې مړ شوی دی. موږ یې جنازه وکړه."

ډاکټر عالمي چې په مزار شریف کې د یوه رواني کلنیک مشر و، شاوخوا درې میاشتې مخکې د مزار شریف په نهمه ناحیه کې خپل کور ته نېږدې تښتول شوی و.

د هغه کورنۍ ویلي، تښتوونکو د ډاکټر عالمي د خوشې کېدو په بدل کې د اووه لکه امریکايي ډالرو غوښتنه کړې وه.

خیبر پښتونخوا کې څه باندې څلور میلیونه ماشومانو ته د شري واکسين لګول شوي

د سیند صوبې په مرکز کراچۍ کې یوه ماشوم ته د ګوزن څاڅکي ورکول کېږي

د خیبر پښتونخوا په ۳۶ ضلعو کې د شري او روبيلا ضد کمپاين کې تر څلور ميليونه زيات ماشومان واکسين شوي دي.

د صحت محکمې وياند اسد ضيا د نومبر پر ۱۸مه مشال راډيو ته وويل، کوښښ يې دی چې هغه ټول ماشومان واکسين کړي چې د کمپاين لپاره يې هدف ټاکلی.

د خيبر پښتونخوا د صحت وزير تېمور سليم جګړا د کمپاين پرانستې غونډې ته ويلي ول چې د صوبې تر ۱۵ ميليونه زيات هغه ماشومان به چې عمرونه يې د نهه مياشتو څخه تر ۱۵ کلونو پورې دي، واکسينوي.

په یاده صوبه کې د شري او روبيلا ضد کمپاين د نومبر ۱۵مې نېټې څخه پیل شوی چې د نومبر تر ۲۷مې به جاري وي.

له افغانانو سره د روسیې د مرستو لومړی جوپه کابل ته ورسېده

کابل ته د روسیې لومړنۍ مرستې

د روسیې د بشري مرستو لومړنۍ محموله نن پنجشنبه (د لړم ۲۷مه) کابل ته ورسېده.

دا خبره د نومبر پر ۱۸مه د روسیې تاس خبري اژانس راپور کړې ده.

په کابل کې د روسیې سفیر دیمتري ژېرنوف مخکې ویلي و چې هېواد یې افغانستان ته ۳۶ ټنه بشري مرستې استوي.

د هغه په خبره تمه ده د بشري مرستو دوه نورې جوپې هم کابل ته واستول شي چې ټول ټال اندازه یې له سلو ټنو اوړي.

د راپورونو له مخې د طالبانو د بیا واکمنېدو راهیسې دا له افغانستان سره د روسیې لومړنۍ بشري مرستې دي.

ملګرو ملتونه: د افغانستان ۶۰ ٪ وګړي له لوږې سره مخامخ دي

افغانستان کې بې ځایه شوي کډوال

د افغانستان لپاره د ملګرو ملتونو ځانګړې استازې په افغانستان کې د ممکنه بشري ناورين خبرداری ورکړی دی.

ديبورا لاینز د ملګرو ملتونو امنيت شوری ته د نومبر پر ۱۷مه نېټه وويل چې د افغانستان له ۳۸ میليونه وګړو څخه ۶۰ فيصده خلک د لوږې تر کچې پورې له يو کړکېچ سره مخامخ دي او ښايي دا وضعيت په ژمي کې نور هم بدتر شي.

نوموړې وويل، باید نړيوال هرو مرو داسې لارې چارې ولټوي چې له مخې يې افغان ولس ته مالي مرستې ورسېږي.

هغې زياته کړه، افغانان ځانونه متروکه او هېر کړل شوي احساسوي او داسې ګڼي چې دوی ته د هغه څه سزا ورکول کېږي چې پکې د دوی هېڅ قصور نه شته.

هغې وويل چې پر طالبانو لګول شويو بنديزونو بانکي نظام فلج کړی چې له کبله يې د اقتصاد هراړخيزه اغېز شوی دی.

دې د شوری غړيو ته ډاډ ورکړ چې ملګري ملتونو به پوره هڅه کوي چې یقيني کړي چې پیسې د طالبانو لاس ته ونه لوېږي.

په کابل کې چاودنې یو تن وژلی او ۶ ژوبل

د نننۍ چاودنې مسولیت لا کومې وسله والې ډلې نه دی منلی، خو د تېرو دوو چاودنو مسولیت داعش وسله والې ډلې منلی و.

د طالبانو کورنیو چارو وزارت وایي، د کابل ښار لوېدیزه څنډه کې چاودنې یو تن وژلی او ۶ نور یې ټپیان کړي دي.

د دې وزارت ویاند سعید خوستي مشال راډیو ته وویل چې چاودنه د نومبر پر ۱۷مه د ۱۳مې حوزې په نقاش سیمه کې پر یوه ټونس ډوله موټر شوې او په خبره یې ټپيانو کې میرمنې هم شاملې دي.

د تېرې دوشنبې په ورځ د کابل په کوټه سنګي کې چاودنې دوه تنه ملکیان ټپیان کړل.

له هغه دوه ورځې وړاندې ورته چاودنې یو کس وواژه او څلور نور یې ټپیان کړل.

د نننۍ چاودنې مسولیت لا کومې وسله والې ډلې نه دی منلی، خو د تېرو دوو چاودنو مسولیت داعش وسله والې ډلې منلی و.

د کابل په لویدیځ او ۱۳مه حوزه کې ډېر شیعه افغانان اوسېږي چې ډېر کله د داعش د بریدونو هدف وي.

اذربایجان وايي له ارمینیايي عسکرو سره په نښته کې یې اووه سرتېري وژل شوي

د ارمنستان او ازربایجان ترمنځ پوله کې تازه شخړه د نومبر پر ۱۶مه ونښته. انځور - ارشیف

د اذربايجان چارواکي وايي، په سرحدي سيمو کې يې له ارمينيا سره په نښتو کې اووه عسکر وژل شوي او ۱۰ ټپیان شوي دي.

د اذربايجان دفاع وزارت د نومبر پر ۱۷مه په يوه خبرپاڼه کې زیاته کړې چې دا مرګ ژوبله د نومبر پر ۱۶مه په شوو نښتو کې رامنځته شوې.

بلخوا د ارمينيا دفاع وزارت ويلي چې اذربايجان یې ۱۳ سرتېري نيولي، ۲۴ یې لادرکه او يو یې وژل شوی دی.

پروسږکال دواړو هېوادونو د نارګونو قره باغ سيمې پر سر جګړه کړې وه او د اوسنۍ نښتې د پيل پړه پر يو بل اچوي.

نور وښیئ

ځانګړې پاڼې

له موږ سره اړیکي

XS
SM
MD
LG