د لاسرسي ځای

تازه خبر

خبرونه

د ایران مذهبي مشر له امریکا سره د خبرو اترو غوښتنه وکړه

د ايران د ستر مذهبي مشرعلي خامنه یي د بهرنۍ پاليسۍ عالي رتبه سلاکار د تهران پر اټمي پروګرام له امريکا سره د مستقيمو خبرو اترو غوښتنه وکړه.


علي اکبر ولايتي چې د ولسمشریزی د انتخاباتو يو کانديد و، د ايران يوه ټلويزيون ته په مرکه کې وويل، دا به ډېره ګټوره وي، چې د ايران اسلامي جمهوريت د پنځه جمع يو هېوادونو لکه: امريکا، روسيې، فرانسې، برتانيا، چين او جرمني له استازو سره يو په يو خبرې وکړي.

دغو هېوادونو د ايران پر اټومي پروګرام تېره مياشت پر يوه لومړني توافق خبرې وکړي.

د ايران دولتي رسنۍ د ولايتي دا وينا را اخيستې چې ويلي يې دي:

”تر هغو چې له شپږو ځواکمنوهېوادونو سره يو په يو خبرې ونه کړو، سم لوري ته به نه يو روان“

د نننۍ ورځې ټول خبرونه وګورئ

مجاهد: طالبان د تهران غونډې ته نه دي بلل شوي

ذبیح الله مجاهد وايي، د طالبانو حکومت له ایرانه د غونډې په اړه تفصیل غوښتی خو لا یې ځواب نه دی ترلاسه کړی - انځور له ارشیفه

طالبان وايي، په تهران کې د افغانستان په اړه غونډې ته نه دي بلل شوي.

د طالبانو د حکومت ویاند او د اطلاعاتو او کلتور وزارت مرستیال ذبیح‌الله مجاهد د اکتوبر پر ۲۵مه مشال راډیو ته وویل، "هغه غونډه چې په ایران کې جوړېږي د افغانستان د ګاونډیانو غونډه ده. موږ ته‌ یې تر دې دمه بلنه نه‌ ده رالېږلې. موږ د جزییاتو غوښتنه وکړه، خو تر اوسه‌ یې ځواب نه‌ دی راکړی."

ایران هم تر اوسه نه‌ دي ویلي چې طالبانو ته‌ یې په غونډه کې د ګډون بلنه استولې او که نه، خو مجاهد وویل، هغه غونډه د افغانستان په ګټه ده.

د ایران فارس خبري اژانس د اکتوبر پر ۲۴مه وویل، په تهران کې د اکتوبر پر ۲۷مه په غونډه کې د پاکستان، ازبکستان، تاجکستان او ترکمنستان د بهرنیو چارو وزیران ګډون کوي.

راپور زیاتوي، د چین د بهرنیو چارو وزیر به هم په انلاین ډول په غونډه کې حاضر وي، خو په غونډه کې د روسیې د ګډون په اړه تر اوسه څه نه‌ دي ویل شوي.

طالبانو د اګست په نیمايي کې کابل ونیوه او شاوخوا درې اوونۍ وروسته یې خپل لنډمهالی حکومت اعلان کړ. د نړۍ هېڅ هېواد د طالبانو حکومت په رسمیت نه دی پېژندلی، خو د هغوی له واکمنېدو راهیسې د سیمې او نړۍ په کچ د افغانستان سیاسي او اقتصادي حالاتو په اړه یوشمېر غونډې شوې دي.

د اکتوبر پر ۲۰مه په روسیه کې د سیمې د هېوادونو د استازو غونډې ته طالب چارواکي هم ورغلي ول. د هغه کنفرانس په پای کې په اعلامیه کې پر طالبانو غږ شوی چې ټولشموله حکومت جوړ کړي.

د افغانستان لپاره د مسکو په غونډه کې د پاکستان، چین، ایران، هند او د منځنۍ اسیا د هېوادونو استازو د طالبانو له چارواکو سره خبرې وکړې.

د بشري حقونو سازمان وايي افغانستان کې پر شیعه ګانو بریدونه د بشریت ضد جنایت دی

د ۲۰۲۱ز کال د اکتوبر پر ۱۶مه په کندهار کې په برید کې لسګونه کسان ووژل او ژوبل شول.

د بشري حقونو د څار نړیوال سازمان (هیومېن رایټس واچ) ویلي، په افغانستان کې له اسلامي دولت سره د تړلې ډلې له خوا پر شیعه لږکیو بریدونه په بشریت ضد جرمونو کې راځي.

یاد سازمان د اکتوبر پر ۲۵مه په یو بیان کې ویلي چې د هزاره ګانو په نښه کولو لپاره ګڼ بریدونه په بشریت ضد جرمونو کې راځي او ترسره کوونکي یې باید د قانون منګولو ته وسپارل شي.

سازمان دا څرګندونې پر داسې مهال کړې دي چې د اسلامي دولت خراسان ډلې په وروستیو کې په افغانستان کې د خونړیو بریدونو ذمه واري منلې ده.

په دې کې د روانې میاشتې په پیل کې په کندوز او کندهار کې د اهل تشیع په جوماتونو کې پر عبادت کوونکو هغه ځانمرګي بریدونه هم شامل دي چې نېږدې ۱۵۰ کسان پکې ووژل شول.

هغې وسله والې ډلې د روان کال د اګست میاشتې پر ۲۹مه د کابل پر هوايي ډګر د هغه ځانمرګي برید ذمه واري هم منلې وه چې پکې ۱۷۰ کسان وژل شوي ول چې اکثریت یې عام افغان وګړي ول.

اسلامي دولت یا داعش ډلې د اګست په نیمايي کې پر افغانستان د طالبانو له واکمنېدو راهیسې پر طالب چارواکو هم بریدونه زیات کړي دي.

طالبان په تېرو څه د پاسه دوو میاشتو کې د داعش ډلې پر وړاندې د عملیاتو او د هغوی د یوشمېر وسله والو د نیولو او وژلو دعوې کړې دي.

افغانستان خپله لومړنۍ لوبه نن له سکاټلینډ سره کوي

د افغانستان د کرکټ ملي لوبډله - انځور له ارشیفه

د ۲۰ اوریزه کرکټ نړیوال جام په ترڅ کې افغانستان خپله لومړنۍ لوبه له سکاټلینډ سره کوي.

د شارجې په لوبغالي کې د اکتوبر ۲۵مې سیالي د افغانستان پر وخت د مازیګر په څلور نیمو بجو پیلیږي.

د افغانستان لوبډلې تر دې وړاندې دوه تمریني سیالۍ کړي چې له وېسټ انډیزه یې ګټلې خو د جنوبي افریقا پروړاندې یې بایللې.

د دې جام په لړ کې پرون پاکستان هند ته په ۱۰ وکټو په ماتې ورکولو خپله لومړۍ لوبه وګټله.

هند په سیالۍ کې د اووه لوبغاړو په سوځېدو پاکستان ته د ۱۵۲ منډو هدف ورکړ، خو پاکستان بې له هېڅ وېکټې بایللو، دا منډې پوره کړې.

د ۲۰ اوریز کرکټ نړیوال جام سیالۍ په متحده عربي اماراتو او عمان کې روانې دي او ټاکل شوې چې پایلوبه یې د نومبر پر ۱۴مه وشي.

په ازبکستان کې د ولسمشرۍ ټاکنې ترسره شوی

د ازبکستان خلکو د ۲۰۲۱ز کال د اکتوبر پر ۲۴مه د ولسمشرۍ په انتخاباتو کې رایې وکارولې.

په ازبکستان کې ولسمشرۍ ټاکنې بشپړې شوې او داسې ښکاري چې شوکت میرضیایېف به په اسانۍ بریا ترلاسه کړي.

د میرضیایف پر وړاندې څلور داسې سیاستوالان د ولسمشرۍ څوکۍ ته نوماندان ول چې په ټولنه کې ډېر مشهور نه ول او د حکومت پلویان هم بلل کېدل.

خلکو د منځنۍ اسیا په هغه هېواد کې د اکتوبر پر ۲۴مه د ولسمشر د ټاکلو لپاره رایې وکارولې.

دا په ۱۹۹۱ز کال کې له پخواني شوروي اتحاد څخه د ازبکستان له خپلواکۍ راهیسې، په ۳۵ میلیونه نفوس لرونکي هېواد کې د ولسمشرۍ د دور شپږم انتخابات ول.

د ازبکستان د ټاکنو د کمېسیون چارواکو د اکتوبر ۲۴مې پر ماښام اعلان وکړ چې د رایو په شرایطو له برابرو کسانو څخه څه باندې ۸۰ فیصدو یې ووټونه اچولي دي. د ولسمشرۍ په تېرو انتخاباتو کې دا فیصدي څه باندې ۸۷ وه.

میرضیاییف د خپلې ولسمشرۍ پرمهال له نورې نړۍ سره د ازبکستان د سوداګرۍ او روابطو په برخه کې نوی باب پرانیست خو پر ده هم د ازبکستان د مخکینیو واکمنانو په څېر د بشري حقونو د نه رعایت، د سیاسي مخالفانو د سختې ځپنې او ګڼو نورو مسلو په تړاو انتقادونه او تورونه پورې کېږي چې د هغه حکومت یې ردوي.

په ډېره اسماعیل خان کې د پولیو ضد ډلې امنیت ساتونکی وژل شوی

په نړۍ کې پاکستان او افغانستان داسې هېوادونه دي چې پکې لا هم د پولیو وایرس کیسونه ثبتېږي. (انځور: ارشیف)

د خیبر پښتونخوا په ډېره اسماعيل خان ښار کې پوليو ضد څاڅکې ورکوونکې ډلې محافظ پولپس سپاهي وژل شوی دی.

د کېنټ تاڼې محرر طارق الله مشال راډیو ته ويلي چې اکرام الله د اکتوبر پر ۲۴مه نېټه د پوليو ډلې تر حفاظت وروسته کور ته په لاره وو چې له قرېش موړ سره په موټر سايکل سپرو وسله والو په ډزو وواژه.

ناقانونه تحريک طالبان پاکستان ډلې مشال راډيو ته په لېږل شوي بيان کې د پوليس سپاهی د وژلو ذمه واري منلې ده.

دا په داسې حال کې ده چې نن د اکتوبر پر ۲۴مه د پولیو وایرس ختمولو نړیواله ورځ لمانځل کېږي.

د روغتیا نړیوالې ادارې (ډبلیو اېچ او) په دې اړه له غړو هېوادونو او شریکانو غوښتي چې د وایرس پر وړاندې دې مبارزې ته دوام ورکړي.

دې ادارې پر خپله ووبپاڼه لیکلي، د واکسینو او د پولیو ختمولو د نړیوال پروګرام د پیاوړي مشرتابه په هڅو له ۱۹۸۰ز کال راهیسې د پولیو وایرس پېښې ۹۹،۹ فیصده کمې شوې دي.

په نړۍ کې پاکستان او افغانستان داسې هېوادونه دي چې پکې لا هم د پولیو وایرس کیسونه ثبتېږي.

د پولیو ختمولو نړیوالې ادارې پر خپله ووبپاڼه لیکلي چې سږ کال په پاکستان کې د پولیو یو کېس او تېر کال ۸۴ ثبت شوي دي.

کرکټ: نن سري لنکا له بنګله دیش او پاکستان له هند سره لوبه کوي

د متحده عربي اماراتو او عمان په کوربتوب د کرکټ د ۲۰ اوریزو سیالیو سږنی نړیوال جام به د نومبر تر ۱۴مې نېټې دوام لري.  (انځور: ارشیف)

لومړۍ لوبه به د پېښور له وخت سره سم ماسپښین درې بجې د شارجې په میدان کې د بنګلا دېش او سریلنکا ترمنځ وي.

په دویمه لوبه کې به پاکستان له هند سره په دوبۍ کې بازۍ کوي چې د پېښور له وخت سره سم ماښام اووه بجې پیلېږي.

د اکتوبر پر ۲۳مه په لومړۍ لوبه کې اسټرالیا جنوبي افریقا ته ماته ورکړه او په دویمه لوبه کې انګلستان له ویسټ انډیز څخه بازۍ وګټله.

د متحده عربي اماراتو او عمان په کوربتوب د کرکټ د ۲۰ اوریزو سیالیو سږنی نړیوال جام به د نومبر تر ۱۴مې نېټې دوام لري.

نن د پولیو وایرس ختمولو نړیواله ورځ لمانځل کېږي

په نړۍ کې پاکستان او افغانستان داسې هېوادونه دي چې د ګزڼ یا پولیو ناروغي لا هم پکې موجوده ده.

د روغتیا نړیوالې ادارې ډبلیو اېچ او له غړو هېوادونو او شریکانو غواړي چې د د دې وایرس پر وړاندې مبارزې ته دوام ورکړي.

دې ادارې پر خپله ووبپاڼه لیکلي چې د واکسینو او د پولیو ختمولو د نړیوال پروګرام د پیاوړي مشرتابه په هڅو له ۱۹۸۰ز کال راهیسې د پولیو وایرس پېښې ۹۹،۹ فیصده کمې شوې دي.

په نړۍ کې پاکستان او افغانستان داسې هېوادونه دي چې د ګزڼ یا پولیو ناروغي لا هم پکې موجوده ده.

د پولیو ختمولو نړیوالې ادارې پر خپله ووبپاڼه لیکلي چې سږ کال په پاکستان کې د پولیو یو ناروغ موندل شوی او تېر کال ۸۴ ثبت شوي وو.

وزیراعظم عمران خان په درې ورځني سفر سعودي عرب ته تللی

د سعودي عرب په ریاض کې د دې غونډې هدف په منځني ختیځ کې ۵۰ اربه ونې کښېنول دي چې پکې به ۱۰ اربه یوازې په سعودي عرب کې کښېنول کېږي.

د پاکستان وزیراعظم عمران خان د اب و هوا بدلون په اړه په غونډه کې د ګډون لپاره سعودي عرب ته ته تللی دی.

د پاکستان د بهرنیو چارو وزارت د اکتوبر پر ۲۳مه پر ټوېټر پاڼه لیکلي چې عمران خان به د درې ورځني سفر پر مهال په ریاض کې د منځني ختیځ زرغون نوښت (مډل ایسټ ګرین انېشېټېف) سرمشریزې د پیلېدو په غونډه کې برخه اخلي.

بیان زیاتوي چې نوموړی به پر دې مهال مخ پر ودې هېوادونو ته د اب و هوا بدلون پر وړاندې د ننګونو او د پاکستان د یو ارب ونو کرلو د منصوبې په اړه خپل نظر او تجربه وړاندې کوي.

د وزارت په وینا، د ریاض د غونډې هدف په منځني ختیځ کې ۵۰ اربه ونې کښېنول دي چې پکې به ۱۰ اربه یوازې په سعودي عرب کې کښېنول کېږي.

افغان پیلوټان: طالبان مو په افغانستان کې کورنۍ ځوروي

افغان پیلوټان. انځور- ارشیف

تاجکستان ته اوړېدلي افغان پیلوټان وايي، طالبان یې په افغانستان کې کورنیو ته ګواښونه کوي.

دا هغه پیلوټان دي چې د اګست په میاشت کې، کابل ته د طالبانو له ننوتو وروسته د هیواد پرېښودو او په ګاونډي هیواد تاجکستان کې پناه اخېستو ته اړ شوي دي. دغه پیلوټان وايي، اوس په افغانستان کې طالبان د هغوی د کورنیو پاتې غړو ته ګواښونه کوي چې خپلوان مو بیرته هیواد ته راوغواړئ.

په دغو کې ځیني پیلوټان وايي چې امریکا ته د تلو لپاره یې سفري اسناد پوره شوي دي او ډېر ژر به هلته ولاړ شي. خو دوو هغو پيلوټانو چې د تاجکستان د سر ښار دوشنبې په اطرافو کې یې پناه اخېستې ده، د اکتوبر پر ۲۳مه مشال راديو ته وویل چې طالبان پر هغوی افغانستان ته د ستنېدو لپاره فشار اچوي.

يو پیلوټ د نوم نه ښودلو په شرط ويلي چې د هغه زوی افغانستان ته له ستنېدو پس د طالبانو لخوا وهل شوی او ورته یې ويلي که پلار دې هيواد ته ستون نه شو نو وبه وژل شې.

یو بل پيلوټ ويلي چې طالبان د هغوی يو شمېر خپلوانو کورونو ته ورغلي او له هغو یې غوښتلي چې دا پیلوټ دې افغانستان ته راستون شي.

هغه زیاته کړه چې له طالبانو سره د هغو ۱۴۳ پیلوټانو د نومونو فهرست دی چې دا مهال په تاجکستان کې دي او اوس طالب چارواکي د دغو پيلوټانو پر خپلوانو د هغوی د ستنېدو لپاره فشار اچوي.

د طالبانو ویاند ذبیح الله مجاهد د دې پيلوټانو دا تورونه رد کړي او د اکتوبر پر ۲۳مه یې مشال راديو ته ويلي چې هېڅ څوک د دوی پروا نه کوي او زیاتوي چې دا پيلوټان غواړي دا ډول دعوې وکړي چې په بهرنيو هيوادونو کې پناه واخلي.

مجاهد وويل چې که دغه پیلوټان افغانستان ته ستانه شي نو هېڅ مشکل به ورته نه پېښېږي.

مستونګ کې نهه وسله وال وژل شوي

د ادارې په خبره دا عملیات یې د مستونګ ضلعې په روشي سیمه کې کړي.

د بلوچستان د ترهګرۍ ضد ادارې چارواکي ادعا کوي چې په مستونګ ضلع کې يې د عملیاتو پر مهال نهه وسله وال وژلي دي.

د هغوی په خبره دا عملیات یې د مستونګ ضلعې په روشي سیمه کې کړي.

په کوټه کي د اکتوبرپر ۲۳مه د یادې ادارې د ویاند لخوا په جاري کړل شوي بیان کې ويل شوي چې دا وسله وال له امنيتي ځواکونو سره د ډزو پر مهال وژل شوي دي.

په بیان کې ادعا شوې چې د دې عملیاتو پر مهال یې د يو کالعدم وسله والې ډلې کيمپ ختم کړی او درنه وسله یې هم نیولې ده.

په بیان کې د وژل شویو د پېژندګلوۍ او د ناقانونه پېژندل شوې ډلې نوم نه دی اخیستل شوی.کومې وسله والې ډلې تر اوسه په دې اړه څه نه دي ویلي.

د القاعده مهم مشر عبدالحميد المطر په شام کې ووژل شو

د شام په شمال غربي برخه کې دا بريد دوه ورځې وروسته تر هغې شوی چې په جنوب کې پر يوه امريکايي پوسته حمله شوې وه.

د امريکا مرکزي قومندانۍ يو وياند وايي، د اکتوبر پر ۲۲مه په شام کې د القاعده ډلې يو مهم مشر په امريکايي ډرون بريد کې وژل شوی دی.

د مرکزي قومندانۍ وياند ارمي مېجر جان ريګزبي په يو بيان کې وايي:" د عبدالحميد المطر له وژنې سره به د دې ترهګريزه ډلې د لا نورو نړيوالو بريدونو پلانولو او ترسره کولو صلاحيت ګډوډ شي چې له مخې يې دوی امريکايي وګړي، د دوی متحدان او بې ګنا ولسي وګړي ګواښي."

ريګزبي زياته کړه مرکزي قومندانۍ ته"د بريد په نتيجه کې د ولسي مرګژوبلې په اړه کومې اشارې نه دي په لاس ورغلي."

د شام په شمال غربي برخه کې دا بريد دوه ورځې وروسته تر هغې شوی چې په جنوب کې پر يوه امريکايي پوسته حمله شوې وه. د مرکزي قومندانۍ وياند دا نه دي ويلي چې ګیني دا بريد د انتقامي کاروايۍ په توګه ترسره شوی.

تر دې مخکې امريکا ویلي وو چې د اکتوبر پر ۲۰مه التنف پر پوځي چاوڼۍ حمله شوې وه چې پکې کوم امريکايي عسکر نه و ژوبل شوی.

د امريکايي مرکزي قومندانۍ وياند زياتوي القاعده چې شام د يو خوندي ځای په توګه کاروي اوس هم د امريکا او د دوی متحدانو لپاره ګواښ ده.

د شام ۱۰ کلنه جګړه د ۲۰۱۱ز کال د حکومت ضد مظاهرينو خلاف تر کارواۍ وروسته پیل شوه.

د شامي ولسمشر بشارالاسد وفادارو ځواکونو د شام زياتره برخو کنټرول وروسته له هغو ترلاسه کړی چې د روسيې او ايران پوځي ملاتړ مرسته ورسره وکړه چې د طاقت توازن د اسد رژيم په حق کې کړي.

شمالي وزیرستان: تښتول شوي څلور کسان خوشې شول

دا ټول اته کسان وو چې يو پکې څو اوونۍ مخکې مړ شو او درې کسان تېره مياشت او څلور د اکتوبر پر ۲۲مه خوشې شول.

د شمالي وزيرستان چارواکي وايي، هغه څلور کسان یې له وسله والو خوشې کړي چې د ۲۰۲۱ کال په فبرورۍ کې وسله والو تښتولي وو.

د شمالي وزيرستان مرستيال کمېشنر شاهد علي خان د اکتوبر پر ۲۲مه ناوخته مشال رېډيو ته وويل چې د دوی او اتمانزو جرګې په هلو ځلو دغه کسان هم د اکتوبر پر ۲۲مه خوشې شول.

نوموړی دا هم وويل چې په سيمه کې د دوی د عملياتو او له مختلفو قامونو سره د جرګو په نتيجه کې دغه کسان خوشې شوي. دی وايي، په دې ترڅ کې د اتمانزو جرګه افغانستان ته هم تللې وه.

له شمالي وزیرستانه شپږ کسان د فېبرورۍ پر ۲۱مه نېټه تښتول شوي وو، دغه راز دوه کسان چې د تښتولو نېټه يې نه ده معلومه بيا له جنوبي وزيرستانه تښتول شوي ول.

دا ټول اته کسان وو چې يو پکې څو اوونۍ مخکې مړ شو او درې کسان تېره مياشت خوشې شوي وو او پاتې څلور یې د اکتوبر پر ۲۲مه راخلاص شول.

په تازه خوشې شویو کې انجينر همایون داوړ او اېډوکېټ عتیق الله داوړ هم شامل دي. د دواړو کورنیو له مشال راډیو سره د خبرو پر مهال د هغوی د خپلوانو په خوشې کېدو خوښي ښکاره کړه. تر اوسه کومې وسله والې ډلې د دې کسانو د تښتولو ‌ذمه واري نه ده منلې.

بشري حقونو څار اداره: طالبانو په زرګونه کورنۍ په زوره بې ځایه کړې دي

طالبان په کابل ښار کې د ګزمې پر مهال

بشري حقونو څار ادارې پر طالبانو تور پورې کړی چې د افغانستان په بېلا بېلو سیمو کې یې زرګونه کورنۍ په زوره بې ځایه کړې دي.

د طالبانو لخوا دا ګام د شییعه هزاره ګانو او همدا رنګه له تېر حکومت سره د تړلو کسانو لپاره د ډله ییزې سزا په توګه اوچت کړل شوی دی.

نیویارک مېشتې ادارې د اکتوبر پر ۲۲مه په یو بیان کې ویلي، وروسته له هغې چې طالبان په اګست میاشت کې واک ته ورسېدل، د افغانستان په څلورو ولایتونو کې یې هزاره ګانو ته امر وکړ چې خپل کورونه او کروندې پرېږدي.

همدارنګه په پنځم ولایت کې طالبانو هغه جایدادونه نیولي چې تېر حکومت په ملکي مامورینو ویشلي وو.

د بشري حقونو د څار اداره وايي، د طالبانو لخوا دا سرغړونې په هلمند، بلخ، دایکنډي، ارزګان او کندهار کې ترسره شوې دي.

یاده اداره وايي، د طالبانو لخوا په زوره د خلکو د بې ځایه کولو تر ټولو لویې پېښې په دایکنډي او ارزګان ولایتونو کې مخې ته راغلي چېرته چې تېره میاشت، له ۱۵ کلو لږ تر لږه ۲۸۰۰ اوسېدونکي ایستل شوي دي.

طالبانو د بشري حقونو د څار ادارې د دغو څرګندونو په اړه لا څه نه دي ویلي.

''روس تر ۱۰۰ زیات خبریالان بندیان کړي، امریکا دې یې د راخوشې کولو هڅې وکړي''

ولادېسلاف یسپېنکو

د ازادې اروپا رېډیو زنداني خبریال ولادېسلاو یسپېنکو له امریکايي ولسمشر جو بایډن او د کانګرس له غړو غوښتي دي چې تر ۱۰۰ زیاتو هغو سیاسي بندیانو د خوشې کولو لپاره لا زیاتې هڅې وکړي چې په کرایمییا کې د هغوی د فعالیتونو پر سر د روسیې د استخباراتو وفاقي ادارې (اېف اېس بي) په حراست کې دی.

یسپېنکو چې د ۲۰۲۱ز کال له مارچ راهیسې د روسیې تر اشغال لاندې کرېمیا سیمه کې بندي دی، دا غوښتنه په هغه لیک کې کړې چې د اکتوبر پر ۲۱مه په واشنګټن کې د اوکراین په سفارت کې په لومړي ځل په عام محضر کې ولوستل شو.

نوموړي په لیک کې له بایډن او د کانګرس له غړو غوښتي چې روسي ولسمشر ولادیمیر پوتین ته ((واضحه پیغام ورکړي چې امریکا له اوکراین سره ولاړه ده.)) واشنګټن پر روسیې غږ کړی چې په کرایمییا کې د بشري حقونو سرغړونې ودروي او ټول سیاسي بندیان خوشې کړي.

هغه خط د یسپېنکو ښځې کیترینا یسپېنکو خپله امریکا ته وړی دی. نوموړې اوسمهال د امریکا په سفر ده چې هلته له چارواکو سره وګوري او په کرایمییا کې یې له وضعیته خبر کړي.

روسیې په ۲۰۱۴ز کال کې د اوکراین ټاپووزمه کرېمیا سیمه له ځان سره وتړله. د امریکا او اروپايي ټولنې په ګډون لسګونه هېوادونو د مسکو دا اقدام وغنده او دریځ لري چې کرایمییا د اوکراین برخه ده.

د کرکټ نړیوال جام سیالیو کې افغانستان لومړۍ له سکاټلنډ سره مخ کیږي

د افغانستان د کرکټ ملي لوبډله

د کرکټ نړیوال شل اوورېز جام سیالیو کې د افغانستان لومړۍ د اکتوبر پر ۲۵مه له سکاټلنډ سره ده.

د بي ګروپ سکاټلنډۍ ډلې د اکتوبر پر ۲۱مه د دوو لوبغاړو په سوځېدو په ۱۷ اورونو کې د عمان د ۱۲۲ منډو هدف پوره کړ او سیالي یې وګټله.

دې ټیم د خپل ګروپ لومړی ځای واخېست او د نړیوال جام د دولسو غوره ټیمونو ګروپي سیالیو ته ووت.

د افغانستان دوهمه سیالي به د اکتوبر پر ۲۹ مه له پاکستان سره وي.

د کرکټ نړیوال جام په نورو لوبو کې بیا نن د نمېبییا او ایرلینډ او د سريلنکا او هالنډ لوبډلې لوبه کوي.

تر نننیو لوبو وروسته به د ۱۲ غوره لوبډلو سیالۍ پیل شي چې پکې د نړۍ مخکښې لوبډلې له یو بل سره مخامخېږي.

د متحده عربي اماراتو او عمان په کوربه توب د کرکټ د شل اوریزو سیالیو سږنی نړیوال جام د نوومبر تر ۱۴مې نېټې دوام کوي.

پوتین: مسکو له تور لېسټه د طالبانو پر ایستلو غور کوي

د روسیې ولسمشر ولادیمیر پوتین

د روسیې ولسمشر ولادیمیر پوتین ویلي، مسکو د سختدریځه ډلو له لېسټه د طالبانو پر لیرې کولو غور کوي.

نوموړي دا خبره د اکتوبر پر ۲۱مه د والدای بحث کلب په غونډه کې پر داسې مهال کړې چې هغه هېواد د افغانستان له نویو واکمنانو سره تعلقات پراخوي او روانه اوونۍ د طالبانو یو لوړپوړی پلاوی مسکو ته تللی وو چې هلته د چین، پاکستان او اتو نورو هېوادونو له استازو سره په یوه غونډه کې ګډون وکړي.

مسکو په تېرو کلونو کې څو ځلې د طالب استازو کوربه پاتې شوی دی خو هغوی یې په رسمیت نه دي پېژندلي.

طالبان په روسیه کې د ترهګرو ډلو په لېسټ کې شامل دي. د مسکو غونډې په پای کې په وروستي بیان کې راغلي چې د غونډې ګډونوالو ویلي، "له دې سره سره چې نړیوالې ټولنې نوی افغان حکومت په رسمیت نه دی پېژندلی خو له افغانستان سره د عملي رابطو لپاره د دې نوي واقعیت په پام کې نیول اړین دي چې طالبان اوس پر هېواد واکمن دي."

د هغې غونډې یوه موخه دا وه چې په اګست کې د طالبانو له واکمنېدو راهیسې په افغانستان کې ((د بشري ناورین مخنیوي لپاره د نړیوالې ټولنې هڅې)) پیاوړې کړای شي.

پوتین وویل، افغانستان باید اقتصادي مرستې ترلاسه کړي او ټولې کنګل شتمنۍ یې باید ازادې شي ځکه چې په هغه جګړه ځپلي هېواد کې ثبات د ټولو ګاونډیو په ګټه دی.

شمالي وزیرستان: دوو پېښو کې یو وسله وال مړ او عسکر ټپي

په وروستیو کې په شمالي وزیرستان کې پر امنیتي سرتېرو حملې زیاتې شوې دي.

په شمالي وزیرستان کې په دوو پېښو کې یو وسله وال وژل شوی او یو عسکر ټپي شوی دی.

یوه امنیتي چارواکي بېګا د نوم نه ښوولو په شرط مشال راډیو ته وویل، د اکتوبر پر ۲۱مه په میرامشا کې د وسله والو په حمله کې یو عسکر ژوبل شو.

د ده په خبره، عسکرو په خیر کلي کې ګزمه کوله چې وسله والو ورباندې برید وکړ.

چارواکي وايي، تر پېښې وروسته پاکستانیو عسکرو په سیمه کې د وسله والو لټون پیل کړ او د عملیاتو پر مهال د احمد الله په نوم یو مشکوک وسله وال ووژل شو.

پر پوځیانو د پرونۍ حملې ذمه واري چا نه ده منلې.

په وروستیو کې په شمالي وزیرستان کې پر امنیتي سرتېرو حملې زیاتې شوې دي.

د اکتوبر پر ۱۷مه وسله والو په سپینوام کې پر پوځیانو حمله کړې وه چې پکې یو سرتېری ژوبل شوی وو.

تر دې مخکې د روانې میاشت پر اوومه په دوسلي کې په رېموټ کنټرول بمي برید کې یو سرتېری وژل شوی او بل ټپی شوی وو. تحریک طالبان پاکستان د هغو حملو ذمه واري منلې وه.

پاکستان د قانوني ویزو لرونکیو افغانانو لپاره د تورخم لار پرانستې  

تورخم لار

د افغانستان په پلازمېنه کابل کې د پاکستان سفارت د اکتوبر پر ۲۱مه په یو بیان کې ویلي چې هغه افغانان د تورخم په لاره پاکستان ته د تګ اجازه لري چې قانوني ویزې لري.

په بیان کې راغلي چې په دغه اړه د کورنیو چارو وزارت نه د ځانګړی اجازتنامې شرط هم لیرې کړل شوی دی.

بل خوا د لنډيکوتل ایډیشنل اسسټنټ کمشنر اشراف الدین نن مشال راډیو ته ویلي چې له نن ماسپښین څخه یوازې ان لاین ویزه لرونکي افغان وګړي کولی شي چې د تورخم په دروازه پاکستان ته داخل شي.

د تورخم امیګریشن چارواکي وایی هڅه کوي چې ان لاین او سټیکر ویزه لرونکو دواړه پاکستان ته د راتلو لپاره په مرحله واره توګه انتظام وکړي.

په پاکستان کې د کورونا د کنټرول مرکز د مې میاشتې له ۵ مې نېټې راهیسې په تورخم دروازه سفري محدودیتونه لګولي وو او افغان وګړو ته یی اجازه نه ورکوله چې پاکستان ته داخل شي.

دا په داسې حال کې ده چې دا مهال د تورخم هغې غاړې ته په زرګونه افغان وګړي چې پاکستاني ویزې لري، په انتظار دي، چې کله به ورته د داخلېدو اجازه ورکول کېږي.

بشري حقونو څار اداره: ملګري ملتونه دې تر ګواښ لاندې افغانانو سره خپلې مرستې ډېرې کړي

د کابل هوايي ډګر. انځور- ارشیف

بشري حقونو څار نړیوالې ادارې (هیومن رایټس واچ) پر ملګرو ملتونو او حکومتونو غږ کړی دی چې تر ګواښ لاندې افغانانو سره خپلې مرستې ډېرې کړي.

د بشري حقونو نیویارک میشته سازمان د اکتوبر پر ۲۱مه په دغه اړه د یوې نوې پالیسۍ په لنډیز کې له ملګرو ملتونو او حکومتونو څخه غوښتي چې د کډوالو په بیا ابادولو تمرکز وکړي او د هغه افغانانو لپاره خوندي او دوامداره لارې چارې ولټوي چې تحفظ ته اړتیا لري.

د اګست له میاشتې راهیسې کله چې طالبانو کابل نیولی دی، ګڼ افغانان چې پکې د بشري حقونو دفاع کوونکي، د ښځو حقونو فعالان، خبریالان، قاضیان او د پخواني حکومت چارواکي، د سخت دریځه ډلې لخوا له ژور خطر سره مخ دي.

د مهاجرینو د حقونو په اړه د سازمان د یوې څانګې مشر بل فریلیک په یوه بیان کې ویلي چې دا کډوال د پناه اخېستو حق ته د احترام لپاره په حکومتونو تکیه کوي.

هیومن رايټس واچ په داسې حال کې دا غږ پورته کړی دی چې امنسټي انټرنیشنل هم ویلي چې هغه افغانان چې د طالبانو د غچ اخېستو له خطر سره مخ دي او له افغانستانه بهر د خوندیتوب په لټه کې دي، په اروپا او د مینځنۍ اسیا په هیوادونو کې له سختو خنډونو سره مخ دي.

خیبر پښتونخوا کې ډینګي تبې شپږ کسان وژلي

د ډینګي ناروغانو پخوانی عکس. انځور- ارشیف

د خيبر پښتونخوا د روغتیا څانګه وايي، روانه میاشت د اکتوبر تر ۲۰مې نېټې ډینګي تبې شپږ تنه وژلي دي.

د دې څانګې د تازه شمېرو ترمخه د اکتوبر تر ۲۰مې نېټې له ۴۵۰۰ زیات کسان په ډینګي تبه اخته شوي دي.

د روغتیا څانګې چارواکي وايي چې د پېښور په ګډون نوښار، بونیر، هري پور، ایبټ اباد او صوابۍ د ډینګي ناروغۍ په اړه حساسې ضلعې ګرځول شوي خو تر ټولو زیات، یعنې ۱۶۰۰ کیسونه په پېښور کې رپورټ شوي دي.

بلخوا د خیبرپښتونخوا د روغتیا څانګه وايي، په ډینګي ناروغۍ اخته کسانو لپاره د صوبې په روغتونونو کې ځانګړي انتظامات شوي او په متاثره سیمو کې د ماشو ختمولو سپرې، له ماشو څخه بچ کېدو لپاره دوایانې او مچر دانۍ هم خلکو ته وړیا ورکوي.

باجوړ کې چاودنې څلور امنیتي اهلکار وژلي

باجوړ نقشه

بېګا ماښام د اکتوبر پر ۲۰مه نېټه د باجوړ ماموندو په تير بانډه ګۍ کې چاودنې څلور امنیتي اهلکار وژلي دي.

د باجوړ پولیسو بېګا رسنیو ته استولې خبرپاڼه کې ویلي چې په وژل شویو کې دوه پولیس واله او دوه د ایف سي ځواک غړي دي.

د بیان ترمخه پېښه هغه وخت وشوه چې په یاده سیمه کې د ګشت پر مهال په امنیتي اهلکارو د سړکغاړی ښخ شوی بم وچاودېده.

د پوليسو ضلعي افسر عبدالصمد خان تیره شپه رسنیو ته وویل چې په سیمه کې د لټون عملیات پیل شوي دي. د خيبر پښتونخوا وزيراعلا محمود خان د پېښې غندنه کړې او په دې یې ژور خپګان ښودلی دی.

د دې پیښې ذمه واري تحریک طالبان پاکستان منلې ده.

بښنې نړیوال سازمان: افغان وګړو ته له هېواده وتل ګران شو

د تورخم لار

بښنې نړیوال سازمان (امنیستي انټرنيشنل) وایي، تقریباً ناممکنه ده چې افغانان دې وکولای شي له خپل هېواده ووځي ځکه ګاونډیو هېوادونو پرې پولې تړلي دي.

امنیسټي انټرنیشنل په یوه راپور کې چې نن یې خپور کړی ویلي چې د افغانستان ګاونډیانو د افغانانو پرمخ پولې تړلې او یوازې هغه کسان پریږدي چې د سفر اړین اسناد لري.

د امنیسټي انټرنیشنل په وینا دې کار له غیرقانوني لارې د افغانانو وتل ستونزمن کړي دي.

د جرمني ډي پي اې خبري اژانس د راپور سره سم امنیسټي انټرنیشنل پر دولتونو غږ کړی چې له سختې بیوروکراسۍ پرته دې پرېږدي چې افغانان بهر ته ولاړ شي او هغو ته دې چې تر سخت کړاو تېرېږي، پر بشري اساس ویزې ورکړي.

له کله چې طالبان بیا واک ته رسېدلي، یو زیات شمېر افغانان چې ویره لري طالبان به ترې غچ واخلي، تر اوسه نه دي توانېدلي چې له هېواده ووځي.

د شام په پلازمېنه دمشق کې چادونو ۲۷ تنه وژلي

دمشق کې چادونه پر یوه پله په یوه بس کې پر تېرېدونکو پوځیانو شوې: ۲۰۲۱، ۲۰م اکتوبر

د شام سرکاري رسنۍ وايي، په پلازمېنه دمشق کې اکتوبر ۲۰مه په یوه بمي چاودنه کې د وژل شویو شمېر ۲۷ ته رسېدلی دی.دا په تېرو کالونو کې تر ټولو خونړی برید دی.

تر دې وړاندې سرکاري خبري اژانس ثنا په دغه حمله کې د وژل شویو کسانو شمېر ۱۳ ښودلی وو.

سرکاري خبري اژانس ثنا وایي نن د اکتوبر پر ۲۰مه د سړک غاړې دوه بمي چاودنې وشوې چې کله په یوه بس کې پوځیان پر یوه پله تېرېدل.

د سرکاري ټیلیوېژن تر مخه دغه حمله سهار کې کارونو او سکولونو ته د تللو په مصروفه وخت کې تر سره شوه. په برتانیا کې میشت د شام د بشرۍ حقونو څارونکې ډله وایي په دغه حمله کې ۱۴ تنه وژل شوی دي او کېدای شي د وژل شویو کسانو شمېر زیات شي.

تر اوسه چا د دغه حملې ذمه واري نه ده منلې. له هغه راهیسې چې ولسمشر بشر ال اسد ته وفادارو عسکرو د ښار شاوخوا سیمې له یاغیانو بیرته نیولې دی، دمشق په دې تېرو نېږدو کالونو کې له داسې تاو تریخوالي خوندي وو.

خو په روان کال کې د هغه هېواد په شرقي سیمو کې د اسلامي دولت توندروه ډلې د مشکوکو وسله والو لخوا د پوځیانو په ګاډو ګڼې حملې ترسره شوي دي.

روس، چين او پاکستان له افغانستان سره مرستو ته چمتو والی ښوولی

د کابل هوايي ډګر یو انځور

د روسيې د بهرنيو چارو وزارت وايي چې روس، چين او پاکستان له افغانستان سره مرستو ته چمتو والی ښوولی خو زياتوي چې دا په دې مانا نه ده چې دوی د طالبانو حکومت په رسميت پېژني.

وزارت زياتوي چې د يادو هېوادونو استازو د اکتوبر ۱۹مه په ماسکو کې د افغانستان په اړه د غونډې پرمهال "د شريکو امنيتي ګواښونو په اړه بحث وکړ او افغانستان ته يې د عاجلو بشري او اقتصادي مرستو ورکولو په لړ کې ګډه دلچسپي څرګنده کړه."

تمه ده چې اکتوبر ۲۰مه (نن) د ماسکو په غونډه کې په دې اړه نورې خبرې وشي.

په دې غونډه کې به تر ۱۰ ډېر هېوادونو استازي ګډون وکړي خو د امريکا د بهرنيو چارو وزارت وار له مخه اعلان کړی چې په دې غونډه کې به يې استازي ګډون نه کوي.

د افغانستان په اړه د ماسکو په نننۍ (اکتوبر ۲۰مه) غونډه کې د طالبانو پلاوی هم ګډون کوي.

د طالبانو وياند ذبيح الله مجاهد د غونډې تر پيل مخکې مشال راډيو ته ويلي و چې دوی به له نړيوالو سره د طالبانو حکومت د رسميت پېژندلو، د سيمې هېوادونو ته د را ولاړو شويو اندېښنو د رفع کولو او تجارت په اړه خبرې وکړي.

کابل: لاسي بم برید کې دوه طالبان او څلور ماشومان ژوبل

ارشیف، کابل کې د یوې چاودنې سیمه

په افغانستان کې طالب چارواکي وايي، په کابل کې د اکتوبر پر ۲۰مه سهار په یوه چاودنه کې د دوو طالبانو په ګډون څلور ماشومان ټپيان شوي دي.

د طالبانو د سرپرست حکومت د کورنیو چارو وزارت ویاند قاري سعید خوستي فرانسپرس اژانس ته ویلي چې دا پېښه نن سهار مهال د کابل په دهمزنګ کې هغه مهال رامنځته شوه چې د طالبانو پر ګاډي یوه ناڅرګند کس لاسي بم ورګوزار کړ چې له امله‌ یې د دوی دوه ساتونکي ټپیان شول.

یوه بل چارواکي بیا په دې پېښه کې د نږدې ښوونځي د څلورو زده‌کوونکو ماشومانو د ټپي کېدو خبره کړې ده.

طالب چارواکو نه‌ دي ویلي چې دغه لاسي بم د چا له‌خوا د دوی د ساتونکو موټر ته ورګوزار شوی او نه هم تر اوسه چا یا کومې ډلې د دې پېښې مسولیت اخیستی خو تر دې مخکې پر طالبانو د دا ډول حملو مسؤلیت د اسلامي دولت ډلې یا داعش اخیستی دی.

نور وښیئ

ځانګړې پاڼې

له موږ سره اړیکي

XS
SM
MD
LG