د بادغیس امنیتي مسوولین وایي چې د دې ولایت په بالامرغاب ولسوالۍ کې د افغان ځواکونو او وسله والو طالبانو په یوې نښتې کې چې څو ورځې یې دوام وکړ ۵۷ طالبان مړه او ۴۸ ټپيان شوي دي.
په بادغیس کې د ملي اردو د دریمې لوا قوماندان داودشاه وفادار مشال راډیو ته وویل دغه نښته هغه مهال پیل شوه کله چې وسله والو طالبانو د افغان امنیتي ځواکونو په اکمالاتي کاروان حمله وکړه.
قوماندان وفادار وایي چې؛ په دې نښته کې چې دولس ورځې یې دوام وکړ د ملي اردو پنځه تنه سرتیري هم مړه او پنځلس ټپيان شوي دي.
د وسله والو طالبانو ویاند قاري یوسف احمدي بیا رسنیو ته ویلي چې؛ په دې پيښه کې د ملي اردو پنځوس سرتیري وژل شوي دي.
افغان چارواکي بیا د طالبانو دا ادعا ردوي.
