واشنګټن/ قاهره - امريکا د مصر پر پوځ غږ کړې چې له څوکۍ لرې کړل شوې ولسمشر محمد مرسي خوشې کړي.
د امريکا د بهرنیو چارو وزارت وياندې جین ساکي ويلي دي چې امريکا د جرمني له خوا د مرسي د خوشې کولو غوښتنې ملاتړ کوي.
جرمني له وړاندې خواست کړی چې مصري پوځ دې مرسي پرېږدي.
د جولاۍ پر ۳ مه د ولسمشرۍ له څوکۍ تر لرې کېدو وروسته اسلامپاله محمد مرسي په خلکو کې نه دی ليدل شوی.
چارواکي وايي، مرسي په قاهره کې د ريپبلکن ګارډ په يوه ودانۍ کې دی.
په قاهره کې د مرسي په زرګونو پلويانو د جمعې پر ورځ مظاهرې کړې دي.
دوی د ولسمشر په توګه د مرسي د بیا پر حالولو غوښتنه کړې ده.
په عین حال کې د مرسي مخالفانو هم مظاهرې کړې دي.
د نوموړي اخوان المسلمین پلویانو ویلي دی چې دوی به د پوځ په ملاتړي لنډ مهالي حکومت کې برخه وا نخلي.
