د پاکستان حکومت د تحريک منهاج القرآن له مشر مولانا طاهرالقادرې سره د خبرو اترو لپاره يوه مذاکراتي ډله جوړه کړې ده.
دا ګام له هغه وروسته اخستل شوی کله چې مولانا طاهرالقادرې نن تر مازيګر پورې حکومت ته وروستۍ نيټه ورکړې وه.
هغه په اسلام آباد کې په زرګونو کسانو ته د وينا پر وخت وويل، حکومت بايد هرو مرو د خبرو لپاره يوه مذاکراتي ډله وروليږي. په ډله کې د پيپيلز پارټي يو مشر خورشيد شاه، د عوامي نېشنل پارټۍ افراسياب خټک، د متحده قامي مومېنټ ايم فاروق ستار او د مسلم ليګ ق مشاهد حسین شامل دي.
مولانا طاهرالقادرې په اسلام آباد کې له څو ورځو راهیسې په زرګونو لارويان د حکومت پر ضد راغونډ کړي دي. دی له حکومت د نګران حکومت د جوړولو د او انتخابي اصلاحاتو د اعلانولو غوښتنه کوي.
