د لاسرسي ځای

تازه خبر

خبرونه

په عراق کې د ایراني رژيم ضد ډله بل ځای ته یووړل شوه

د عراق حکومت تیره ورځ په دې هیواد کې د ایران د حکومت د مخالفانو د یوه کمپ د څلورو سوو اوسیدونکو لومړۍ ډله یوه داسې انتقالي کېمپ ته یوړه چې د بغداد هوايي ډګر ته نژدې دی.

دا کسان د مجاهدین خلق نومي ډلې غړي دي، چې په ایران کې د اوسني حکومت د نسکورولو غوښتنه کوي.

دوی به تر هغه وخته په دې کېمپ کې د انتظار په حالت کې وي چې تر څو له عراق دباندې د دوی د ځای پر ځای کولو مسله روښانه کیږي.

د عراق حکومت او ملګري ملتونه د تېر شوي دسمبر په میاشت کې پر دې سره سلا شوي وو چې د دې ډلې غړي له عراق دباندې ځای پر ځا ی کړي.

مجاهدین خلق ډله له نولس سوه اتیا تر نولس اته اتیا پورې د عراق او ایران تر منځ په جګړې کې د عراقي پوځ تر څنګ د ایران پر ضد جنګیدلې ده.

د نننۍ ورځې ټول خبرونه وګورئ

د سټیل مل نهه زره ملازمینو بېروزګارول غندو: سراج الحق

د لاهور په سټل مل کې یو خواریکښ

د پاکستان سېنېټ په نننۍ( د جون پر پنځمه) غونډه کې د اپوزشن ګوندونو ځينو مشرانو د سټيل ملز (وسپنو کارخانه) د نهو زرو ملازمينو نوکریانو ختمولو حکومتی ګام غندلي.

د جماعت اسلامي امیر او سېنېټر سراج الحق د سېنېټ غونډې ته وويل چې واکمن تحريک انصاف ګوند خو يو کروړ نوکريانو ورکولو دعوې کولې خو هغوینهه زره ملازمين بېروزګاره کړل.

د دې په ځواب کې د صنعت او پيداوار وفاقي وزير حماد اظهر وویل چې پاکستان سټيل ملز له ۲۰۰۸ کال راهيسي په تاوان کې راون وو او په ۲۰۱۵ز کال کې وتړل شو. دوی زياته کړه چې نجکاريسټيل مل ښه کولای شي.

د سېنېټ په غونډه کې په پاکستان کې د کورونا وايرس په اړه هم بحثونه وشول.

د خزانې وزارت ايوان ته ويلي چې د کورونا وايرس بحران له وجې په ملک کې ۳۰ لاکه کسان بېروزګاره کېدای شي.

د دوی د اندازو ترمخه د وايرس له کبله صنعتي څانګې سره تعلق لرونکې ۱۰ لاکه او خدمتونو په څانګه کې ۲۰ لاکه کسان له ملازمتونو محرومه کېدای شي.

د سېېڼت مشر صادق سنځراڼي د ايوان غونډه د جون تر اتمې ځنډولې ده.

امریکا کې د وژل شوي جورج فلوید په یاد مراسم

د جورج فلوید د یاد مراسم

په امریکا کې مدني فعالانو، سیاستوالو او هنرمندانو د جون پر څلورمه د جورج فلوید، د یاد په مراسمو کې ګډون وکړ.

۴۶ کلن فلوید هغه تور پوستی امریکايي وو چې تېره اوونۍ د پولیسو په حراست کې مړ شو او له هغه راهیسې په دې هېواد کې د نژادي بې‌ عدالتۍ پر وړاندې پراخ لاریونونه پيل شول.

فلويد د مینیسوتا ایالت په مینیاپولیس ښار کې د مې په ۲۵مه مړ شو او د پنجشنبې ورځې یادغونډه‌یې هم په همدې ښار کې جوړه شوه.

د فلويد د کورنۍ مدافع وکیل ویلي چې په درې ایالتونو کې به شپږ ورځې د ده په یاد کې مراسم جوړ شي. د مراسمو لپاره دوه نور ایالتونه شمالي کارولینا او تکزاس یاد شوي دي.

د فلوید د مړینې پرضد ځيني مظاهرې په تاوتریخوالي اووښتي، خو د جون پر درېيمه سوله ‌ییز لاریونونه وشول.

په مینیسوتا ایالت کې محکمې درې نور پولیس افسران هم په دوهمه درجه قتل کې په مرسته کولو تورن کړي.

د دې قضیې پر مرکزي تورن، ديریک چاوین د دوهمې درجې قتل تور دی چې په نتيجه کې يې په ۴۰ کاله بند محکومېدای شي.

ایران د امریکا بحري ځواک پخوانی سرتېری خوشې کړ

مایکل وایټ

د امریکا د بحري ځواک یو سرتېری مایکل وایټ د ایران له زندانه تر خوشي کېدو وروسته خپل هیواد ته روان شوی دی.

د امریکا ولسمشر ډونلډ ټرمپ د جون پر څلورمه پر ټویټر لیکلي چې مایکل وایټ له ایرانه وتلی دی او امریکا ته پر لاره دی او ډېر ژر به له خپلې کورنۍ سره یو ځای شي.

ایراني چارواکو دا امریکايي سرتېری د ۲۰۱۸م کال په جولای میاشت کې بندي کړی وو.

پر ده تور وو چې د ایران ستر مشر ایت ‌الله علي خامنايي ته ‌یي سپکاوی کړی دی او په ایران کې په ۱۳ کاله بند محکوم شوی.

خو په مارچ میاشت کې د کورونا وایرس له کبله په لنډ مهاله توګه خوشی شوی وو.

په باجوړ کې بمي چاودنې دوه تنه وژلي دي

د خیبر پښتونخوا په قبایلي ضلع باجوړ کې یو بمي چاودنې دوه تنه وژلي دي.

د باجوړ مرستیال کمشنر مشال راډیو ته ویلي چې دا پېښه د جون پر څلورم مازیګر شوې ده.

دوی وايي چې دا کسان د سکول استادان وو او پر موټر سایکل کور ته روان وو چې د ماموندو په ډمه ډوله کې په وچ باراني خوړ وراندې په مځکه کې ښخ کړل شوی بم چاودلی دی.

چا تر اوسه د دې پېښې زمه واري نه ده منلې.

نن د واکسین نړیواله سرمشریزه په لندن کې کېږي

انځور له ارشیفه

د واکسین نړیواله سرمشریزه نن د جون پر څلورمه په لندن کې کېږي.

تمه ده چې په دې غونډه کې به د کوویډ۱۹ ناروغۍ پرضد د واکسین او د دې وبا پر وړاندې د مدافعت د پروګرامونو لپاره د ۷.۴ بیلیونه ډالره مرستې ترلاسه کړل شي.

په دې غونډه کې به د نړۍ پنځوس هېوادونه او همداراز هغه کسان چې خیریه بنسټونه لري د واکسین د نړیوال اتحاد لپاره چنده راټوله کړي.

دا په داسې حال کې ده چې امریکا د روغتیا له نړیوالې ادارې سره خپلې مالي مرستې ځنډولې دي.

په نړۍ کې یو شمېر کمپنۍ او څیړنیزې ادارې هڅه کوي چې د کوویډ ۱۹ د ناروغۍ ضد واکسین جوړ کړي.

د روغتیا ځینې پوهان وايي چې کېدای شي واکسین د ۲۰۲۱ کال تر پا وړاندې تیار نه شي او د روغتیا نړیوالې ادارې خو ویلي چې کېدای شي د کورونا وایرس پرضد واکسین هډو جوړ نه کړل شي.

چین: پر سکول برید ۳۹ کسان ټپیان شوي

انځور له ارشیفه

د چین سرکاري میډیا وایي چې د دغه هیواد په جنوبي برخه کې په یو سکول په برید کې ۳۹ کسان ټپیان شوي دي.

ځای چارواکي وايي، چې د ګوانګجي سیمې په کانګوو کې یو ۵۰ کلن سړي ۳۷ زده کوونکي او دوه لویان په چاقو وهلي او زخمي کړي يې دي.

برید کوونکې د سکول چوکیدار وو، چې نیول شوی دی او په اړه يي پلټنې روانی دي.

د چین سرکاري سي سي ټي وي راپور ورکوي چې په برید کې د سکول د هیډ ماسټر په ګدون ۴۰ کسان ټپیان شوي دي.

په سوشل میډیا په ویډیوګانې کې لیدل کېږي چې زخمیان روغتون ته وړلی کېږي او د سکول مخې ته لوی شمېر خلک راټول شوي دي.

د هرات حوزوي روغتون ۶۰ سلنه کارکوونکي کورونا وهلي

ارشیف

د افغانستان هرات ولایت حوزوي روغتون مسئولان وایي، د دوی ۶۰ په ۱۰۰ کې کارکوونکي په 'کووېډ- ۱۹' ناروغۍ اخته شوي دي.

د روغتون سرطبیب محمد عارف جلالي وایي، له همدې کبله دوی د روغتیایي کارکوونکو له کمښت سره مخ شوي او که د کورونا پیښې زیاتې شي، روغتیایي خدمتونه به ټکني شي.

د هرات حوزوي روغتون شاوخوا ژر تنه کارکوونکي لري.

د دغه روغتون د سوځېدنې څانګې ټول کارکوونکي کورونا نیولي، حال دا چې د مسولینو په خبره د انتاني څانګې سم نیمایي او د داخلې او جراحي څانګو ۳۰ سلنه پرسونل دا وایرس لري.

د هرات روغتیایي مسولان اوس لاس په کار شوي چې په رضاکاره ډول روغتیایي کارکوونکي وګماري.

'کراچۍ کې د لوېدلې الوتکې پیلوټ لارښوونو ته پاملرنه نه‌وه کړې'

په کراچۍ ښار کې غورځېدلې الوتکه

د پاکستان هوايي چلند اداره وایي، د هغې الوتکې پیلوټ د کنټرول برجونو لارښوونو ته پاملرنه نه‌ وه کړې چې الوتکه‌ یې په کراچۍ ښار کې نسکوره شوه.

د پاکستان هوایي چلند (پي‌ ای‌اې) ایربس الوتکه د مې په ۲۲مې له لاهوره کراچۍ ته روانه وه چې هوایي ډګر ته نږدې ولوېده. په دې پېښه کې ۹۷ کسان ووژل شول او دوه تنه وژغورل شول.

د پاکستان ملکي هوایي ادارې (پي‌ای‌اې) ته په یوه لیک کې څرګنده کړې ده چې کله الوتکه د کراچۍ په ۱۰۰ کیلومترۍ کې وه پيلوټ ته ویل شوي و چې الوتکه‌ یې ډېره لوړه خېژولې خو هغه ورته ویلي ول چې دی یې په اسانۍ سره لاندې بیولای شي.

د الوتکې مالوماتو خوندیکولو توره پېټۍ (بلېک بوکس) په فرانس کې څېړل کېږي.

د پاکستان هوايي چلند وزیر غلام سرور ویلي دي چې د پېښې ابتدایي راپور به د جون په ۲۲مه پارلمان ته وړاندې کړي.

چین له افغانستان سره د روغتیا او خوړو په برخه کې مرسته کوي

حنیف اتمر سره په کابل کې د چین سفیر لیدنه

چین ژمنه وکړه چې له افغانستان سره به د کرونا ویروس د مبارزې په خاطر د روغتیایي وسایلو او خوراکي موادو مرستې وکړي.

دا ژمنه په کابل کې د چین سفیر وانګ یوو د افغانستان د بهرنیو چارو له سرپرست وزیر محمد حنیف اتمر سره په چارشنبه د کتنې پر مهال په کابل کې وکړه.

پیکنګ دا ژمنه په داسې حال کې کړې ده چې په افغانستان کې د کرونا ویروس مثبتې پېښې تر ۱۷ زرو اوښتې دي.

د عامې روغتیا وزارت مرستیال وحید مجروح د جون پر درېیمه په کابل کې رسنیو ته د تېرو ۲۴ ساعتونو په ترڅ کې د مثبتو پېښو په اړه معلومات ورکړل.

دی وايي: "۷۵۸ مثبت واقعیات تثبیت شوي ۲۴ وطنوالو ژوند له لاسه ورکړی او ۷۸ تنه جوړ شوي دي. په مجموعي توګه تر اوسه په افغانستان کې ۱۷،۲۶۱ مثبتې پېښې لرو، ۲۹۴ وفات شوي او ۱،۵۲۲ جوړ شوي دي."

تېره میاشت په افغانستان کې د کرونا مثبتې پېښې تر زرو لږ اوښتې وې چې د چین د ۷۰۲ ټنه روغتیایي وسایلو مرسته کابل ته ورسېده.

د چین سفیر ونه‌ویل چې د پیکنګ نوې مرسته به څومره وي او کله به کابل ته رسېږي.

روسیې سوریې ته‌ نورې جنګي الوتکې ورکړې

د روسیې جنګي الوتکه

روسیې منلې چې سوریې ته‌یې نورې 'مېګ-۲۹' جټ الوتکې استولې دي.

دا اعلان یوه ورځ له هغه وروسته کېږي چې د امریکا پوځ روسیه تورنه کړه چې دغه هېواد د سوریې له لارې لیبیا ته جنګي الوتکې لېږدوي او هلته د هغو جنګیالیو ملاتړ کوي چې د خلیفه حفتر په ملاتړ د حکومت په ضد جنګېږي.

په دمشق کې د روسیې سفارت پرون پر خپله ټویټرپاڼه ولیکل، د دفاعي همکاریو په ترڅ کې د جنګي الوتکو یوه بله برخه سوریې ته ورسېده.

د سوریې سنا خبري اژانس ویلي، دغه الوتکې به د سوریې پر هوا مأموریت کې برخه اخلي.

روسیه چې سوریه کې د بشار الاسد ملاتړ کوي، د لوېدیځ له خو تورنه ده چې سوریه کې یې د پوځي مأموریت پر مهال ملکیان وژلي او جنګي جرمونه‌یې ترسره کړي.

امریکا د چین مسافر وړونکو الوتکو ته د ورتګ اجازه نه ‌ورکوي

انځور له ارشیفه

امریکا پریکړه کړې چې د جون له ۱۶مې وروسته به د چین مسافروړونکو الوتکو ته اجازه ورنه کړي چې امریکا ته ورشي.

دا فشار د دې لپاره دی چې چين امریکایي الوتکې خپل هېواد ته نه ورپریږدي.

په امريکا کې د کورونا تر خپریدو وروسته چین د امریکایي الوتکو پروازونه وځنډول.

د امریکا ترانسپورت وزارت د جون پر درېيمه وویل چې چين د دواړو هیوادو ترمنځ د الوتنو له موافقې سرغړونه کړې ده.

بيجينګ تر دې مخکې د دوو امريکايي هوايي شرکتونوو يونايټيد او ډيلټا ايرلاینز د پروازونو بيا پېلولو غوښتنه رد کړه.

ماشومان له زور زياتي او تشدده وساتئ: ملګري ملتونه

انځور له ارشیفه

ملګري ملتونه د جون پر څلورمه د تشدد د قرباني ماشومانو ورځ لمانځي.

دې ادارې پر خپل ویب سايټ ليکلي چې په ټولو هېوادونو غږ کوي چې ماشومان له هر قسمه تاوتريخوالي وساتي.

د خېبر پښتونخوا حکومت د بشري حقونو کوارډينېټر، سردار علي د جون پر درېمه مشال راډيو ته وويل چې دوی د بې سرپرسته ماشومانو لپاره پناه ځايونه جوړ کړي او پوليسو ته یې د بشري حقونو روزنه ورکړې چې پر ماشومانو د تشدد د مخنيوي لپاره لارې چارې زده کړي.

د ملګرو ملتونو ترمخه په ټوله نړۍ کې ۲۵۰ ميليونه ماشومان په داسې ځايونو کې اوسي چې يا پرې جګړې تېرې شوې او يا لا هم روانې دي.

امریکا: د جورج فلویډ مفدمه کې درې نور پولیس ګرفتار

ارشیف

د امريکا په مينوسوټا کې د لوی څارنوال دفتر ويلي چې د يوه تورپوستي کس د وژنې په تړاو يې د درېوو نورو پولیس افسرانو د نيولو حکم ورکړی دی.

تر دې مخکې يو پوليس افسر ډيريک شووان چې د مړ شوي تن، جارج فلويډ په مرۍ يې پښه ايښي او د هغه سا بنده کړې وه، نیول شوی دی.

لوی څارنوال کېت ايلیسن د جون په درېمه وويل چې دغه پوليس افسران یې په رسمي توګه د يو تن په وژلو او يا هم په وژلو کې په مرستې تورن کړي دي.

هغه خلکو چې د مې په ۲۵مه د جارج فلويډ تر مرګ وروسته يې په ټوله امريکا کې مظاهرې پېل کړي دي، د مينوسوټا د لوی څارنوال دا کار ستايلی دی خو په اتمه شپه یې هم احتجاج ته دوام ورکړی دی.

دوی له حکومته غواړي چې د پوليسو د زور زياتي مخه ونيسي. مظاهره چيانو په ځينو ځايونو کې موټرونو ته اور اچولی دی.

خېبر کې ۱۷ پولیس وال د بډو په تور له دندو ګوښه

انځور له ارشیفه

د خېبر انتظامي چارواکو ځينې هغه پوليس له دندو ليري کړي چې د رشوت اخیستو تور پرې پورې وو.

د خېبر ضلعې پوليسو مشر، ډي پي او محمد اقبال د جون پر درېيمه يوه خبرپاڼه کې ويلي چې تورخم ته د تللي لارې په اوږدو کې د رشوتونو اخیستو په جرم يې ۱۷ پولیس افسران له دندو ليري او ۵۰ يې معطله کړي دي.

د تجارانو اتحاديې د دې کار هرکلی کړی او ځينو غړو يې مشال راډيو ته ويلي چې له ډېر وخت راهیسې یې په دې اړه شکايت درلود.

تورخم د پاکستان او افغانستان ترمنځ د دواړو هېوادونو تر ټوله لويه او مصروفه تجارتي لار ده.

نن د سایکل نړیواله ورځ لمانځل کېږي

انځور له ارشیفه

نن د جون پر درېمه د ملګرو ملتونو تر سیوري لاندې د سایکل نړیواله ورځ لمانځل کېږي.

د ورځې لمانځلو مرام دا حقیقت منل دی چې سایکل یوه ارزانه سورلۍ ده چې له تېرو دوو پیړیو راهیسې خلک کاروي، او د تګ راتګ او یو بل سره د اړیکو ټینګو ساتلو لپاره ګټه ترې پورته کوي.

د سایکل سورلي ساده ده او د چاپیریال لپاره هم ښه ګڼل کېږي.

دا ورځ اوس د ښه جسماني او ذهني صحت له تصور سره تړلې ده او د شکرې رنځورانو لپاره ګټه لري.

ملګرې ملتونه د دې ورځې په لمانځلو سره په نړۍ کې پر هېوادونو غږ کوي چې د پرمختیایي ستراتیجۍ د جوړولو پر مهال په مقامي، سیمه ایزه او بین المللي کچه، د بایسیکل له وړتیا سترګې پټې نه کړي.

نېب دې د شهباز شریف د نیولو ډډه وکړي: لاهور های کورټ

شهباز شریف د خپلو کارکنانو په منځ کې

لاهور های کورټ د احتساب قامي اداری (نېب) ته امر کړی، چې تر ۱۷مه جونه دې د مسلم لیګ (ن) د مشر شهباز شریف د نیولو څخه ډده وکړي.

عدالت نن [د جون پر درېمه] تر ګرفتارۍ وړاندې ضمانت په اړه د شهباز شریف د خواست اورېدنه وکړه او نوموړی يې د پنځه لکو روپو په ضمانتي مچلکه خوشې کړ.

له عدالتي فېصلې وروسته د مسلم ليګ ن يو مخکښ احسن اقبال يو وارې بيا پر حکومت د انتقامي سياست کولو تورونه په پورې کولو سره په لاهور کې رسنيو ته وويل حکومت نیب د اپوزيشن ګوندونو نه انتقام اخيستو لپاره کاروي.

د احسن اقبال د تورونو په جواب کې د حکمران ګوند پاکستان تحريک انصاف پارليماني استازي صداقت علي عباسي مشال راډيو ته وويل نیب يوه خودمختاره اداره ده او د حکومت نه بلکه په خپله خوښه کار کوي.

د احتساب قامي اداره غواړي چې شهباز شریف له امدنه د زیاتو اثاثو په مقدمه کې ګرفتار کړي او د نهې پر ورځ یې په لاهور کې د هغه پر کور چاپه هم وهلې وه.

نیب د شهباز شریف پرضد د درغلۍ د یو شمیر قضیو پلټنې کوي خو نوموړی د درغلۍ تورونه ردوي او څلور میاشتې يې د یادې ادارې په حراست کې هم تېرې کړې دي.

په هرات کې یو شمېر ډاکترانو خپلې دندې پرېښي

ارشیف

د افغانستان په هرات ولایت کې په کورونا وایرس د اخته کسانو د درملنې د روغتون ۱۳ ډاکترانو د کاري ساعتونو د زیاتېدو او په روغتون کې د امکاناتو د کموالي له کبله استعفی وکړه.

مسعود میرزايي چې ده هم استعفی کړې د جون پر دویمه ناوخته مشال راډیو ته وویل، دوی په کورونا وایرس اخته کسانو ته کافي امکانات نه لري او په روغتون کې د مړینو شمېر هم زیات دی.

هغه زیاته کړه: "زموږ د استفعی یو دلیل د امکاناتو کموالی دی، په دې معنی چې د ناروغانو پایوازان د خپلو ناروغانو د مړینې پوښتنه له موږ کوي، هېڅ امکانات نه‌ شته، هره شپه له اته تر ۱۰ پورې ناروغان مري، خو روغتیا ریاست یوازې د دوو ناروغانو مړینه اعلانوي."

دغو ډاکترانو ویلي، چې له درېیو میاشتو معاشونه هم نه ‌دی ورکړل شوي.

خو په هرات کې د کورونا وایرس په وړاندې د مبارزې مسؤل زمری حَصین مشال راډیو ته وویل، دوی د دغه روغتون د ستونزو د حل هڅه کوي.

حصین دا نه مني چې په کورونا وایرس د اخته کسانو د درملنې روغتون دې امکانات ونه لري.

په هرات کې په کورونا وایرس د اخته کسانو شمېر تر ۲۹۰۰ اوښتی او ۵۸ کسان په دې ویروس تر اوسه په دغه ولایت کې مړه شوي دي.

امریکا یو ایرانی ساینسدان له بري کېدو پس له هېواده وشړلو

ایرانی ساینسپوه سیروس اصغري

ایراني چارواکي وايي، ساینسپوه سیروس اصغري له یې له امريکا وتلی او خپل هېواد ته ورروان شوی دی.

دوی دا نه مني، چې د اصغري خوشې کېدل دې د واشنګټن او تهران ترمنځ د بندیانو د تبادلې د موافقې یوه برخه وي.

اصغري چې د ایران د شریف صنعتي پوهنتون ښوونکی دی، په امریکا کې نیول شوی و.

هغه په ۲۰۱۶م کال کې د امریکا د اوهایو ایالت د پوهنتون له یوې تحقیقاتي پروژې د تجارتي رازونو د پټولو په هڅو تورن کړل شوی و.

۵۹ کلن اصغري، تورونه رد کړي، د ۲۰۱۹م کال په نومبر میاشت کې له تورونو سپین اعلان شو.

د ایران د بهرنیو چارو وزارت ویاند عباس موسي ویلي، ټاکل شوې چې اصغري نن (د جون درېمه) ایران ته ورسېږي.

امریکا د تېر (۲۰۱۹م) کال په ډيسمبر میاشت کې د یوه چینايي الاصله امریکايي څېړونکي ژیاو وانګ په بدل کې د مسعود سلیماني په نوم یو ایرانی ساینسپوه تبادله کړی و.

د امریکا په یو شمېر ښارونو کې ګرځبدېز لګېدلی

انځور له ارشیفه

په امريکا کې له نيويارکه نيولې بيا تر لاس اېنجلسه په لسګونو ښارونو کې ګرځبدیز لګېدلی.

دا اقدام له هغه وروسته پورته کړل شوی چې په هغه هېواد کې د پوليس لخوا د يوه تورپوستي له وژل کېدو وروسته پرون د جون پر دوهمه په اوومه ورځ هم په بېلا بېلو ايالتونو کې لسګونه زره کسانو مظاهرې وکړې خو په ځېنو سيمو کې د شپې مهال تشدد او لوټل هم وشول.

اخوا ولسمشر ډونلډ ټرمپ د ايالتونو پر ګورنرانو فشار زيات کړی چې د حالاتو کنټرولولو لپاره ملي ساتندويان وروغواړي.

ټرمپ له دې وړاندې ويلي ول چې که ګورنران پرېکنده ګام وانخلي نو دی به له پوځي عملياتو کار واخلي. نوموړي ويلي ول چې د بلوو او شوکو بندولو لپاره به ټولې پوځي او سرکاري سرچینې وکاروي.

په دغه هېواد کې وروستۍ بلوې او مظاهرې له هغه وروسته پيل شوي چې د مې پر ۲۵مه د مینيسوټا ریاست په مینیاپولیس ښار کې جارج فلویډ نومی یو بې وسلې تورپوستی تن د پولیس لخوا د نیولو پر مهال ووژل شو.

د فلویډ په وژنه تورن پولیس افسر نیول شوی دی.

کابل: جومات کې چاودنې دیني عالم مولوي نیازی وواژه

مولوي محمد ایاز نیازی

د افغانستان د سرښار کابل په وزیر اکبر خان جومات کې بمي چاودنې د دغه جومات خطیب مولوي محمد ایاز نیازي وژلی دی.

د کورنیو چارو وزارت وايي چې پېښه تېر ماښام شاوخوا اووه نيمي بجې هلته له مخکې پټ کړل شوي بم له چاودېدو رامنځ ته شوه.

د وزارت وياند طارق ارين وايي چې په چاودنه کې د مولوي نيازي په ګډون دوه کسان وژل شوي او دوه نور ژوبل شوي دي.

د افغان ولسمشر دفتر پرون ناوخته په يوه اعلاميه کې ويلي چې پر جوماتونو، تکایاوو، روغتونونو، ولسي وګړو او عامو ودانيو ترهګر بریدونو کول بشري ضد جنایت دی.

وسله والو طالبانو په دغه چاودنه کې لاس لرل رد کړي او تر اوسه کومې بلې وسله والې ډلې هم د دغه بريد مسوليت نه دی منلی.

د ایران پارلماني غړی یې وايي د نومبر مظاهرو ۲۳۰ تنه وژلي

د ایران د پارلمان د ملي امنیت او بهرنیو چارو د کمېټې مشر مجتبی ذالنور

د ایران پارلمان یو مهم غړي څرګنده کړې چې د نومبر په میاشت کې په دې هېواد کې د حکومت ضد مظاهرو پر مهال ۲۳۰ کسان وژل شوي دي.

دا خبر د ایرنا دولتي خبري اژانس ورکړی دی. دا لومړنی ځل دی چې د ایران د پارلمان یو غړی د تېرو اعتراضونو پر مهال د مرګ‌ژوبلې شمېرې وړاندې کوي.

د تېر کال د نومبر په میاشت کې په ایران کې د تېلو د بیو لوړېدل د حکومت پر ضد د پراخو اعتراضونو سبب شول.

په ایران کې کې د ۱۹۷۹ میلادي کال د اسلامي انقلاب راهیسې، د تېر کال د نومبر څلور ورځني اعتراضونه تر ټولو پراخ او له تاوریخوالي سره مل ګڼل کېږي.

د ایرنا خبري اژانس د راپور په حواله د ایران د پارلمان د ملي امنیت او بهرنیو چارو د کمېټې مشر مجتبی ذالنور ویلي، په دې اعتراضونو کې ۲۳۰ کسان وژل شوي چې په پنځو کې یو یې د امنیتي ځواکونو غړی و.

د نوموړي په وینا په وژل شویو کې له څلورو یو تن له لارویانو و چې اعتراضونو کې یې لاس نه‌درلود او یو شمېر یې له نږدې واټن څخه په سر او سینې په مردکیو لګېدلي وو.

ذالنور ادعا کړې چې امنیتي ځواکونو له اعتراض کوونکو څخه ډیر واټن درلود او دا کسان د امنیتي ځواکونو په ډزو نه‌دي لګېدلي.

نوموړی وايي، یو زیات شمېر کسان پر داسې مردکیو لګېدلي چې په ایران کې یې کارول معمول نه‌دي.

په دې اعتراضونو کې تر ۲،۰۰۰ زیات کسان ټپیان شوي هم وو.

د بخښنې نړیوال سازمان د دې اعتراضونو پر مهال د وژل شویو شمېر ۳۰۴ تنه بللی دی او هغوی چې له مسئلې خبر دي وايي، د ۱۲ ماشومانو په شمول په دې اعتراضونو کې ۴۰۰ کسان وژل شوي دي.

امریکا بیا د وژل شویو کسانو شمېر زر تنه بللی دی.

کندوز کې چاودنې ۷ کارګران وژلي او ۶ ټپیان دي

د کندز نقشه

افغان چارواکي وايي، په کندوز ولايت کې د سړک غاړې بم چاودنه کې اوه ولسي وګړي وژل شوي او شپږ نور ټپيان دي.

دا چاودنه په داسې حال کې شوې چې تېره اوونۍ د حکومت او طالبانو له خوا د اوربند تر اعلان وروسته په دې هېواد کې تاوتريخوالي کې کم شوی دی. د جون پر لومړۍ نېټه د کندوز په خان اباد ولسوالی کې يو ټرک چې پکې کارګران سپاره ول د چاودنې ښکار شو.

هيڅ يوې ډلې د بريد پړه نه ده منلې خو د کندوز ولايت وياند عصمت الله مرادي وايي چې شک يې پر طالبانو دی.

نوموړي وويل چې طالبانو د امنيتي ځواکونو په نښه کولو لپاره د سړک غاړې بم ښخ کړی خو دغسې بمونه تل ولسي وګړي وژني.

ولسوال حيات الله اميري وايي چې په ټپيانو کې د دوو حالت نازک دی.

سپریم کورټ له سیند خکومته د خبریال ډینیل پرل ټول ریکارډ غوښتی

امريکايي خبريال ډېنيېل پرل

پاکستان سپريم کورټ د سيند حکومت ته حکم کړی چې د وژل شوي امريکايي خبريال ډېنيل پرل په مقدمه کې دې ټول ريکارډ وړاندې کړي.

سيند حکومت د سيند های کورټ د اپرېل پر دوهمه ورکړې هغه فيصله په سپريم کورټ کې چېلنج کړې چې له مخې يې د ډېنېل پرل په وژنه کې ککړ د عمر سعيد شيخ د عمري بند سزا په اوه کاله بند اړولې وه او درې نور کسان يې خوشي کړي ول.

په پنځو ججانو مشتمل د سپريم کورټ ججانو د جون پر لومړۍ نېټه د اورېدنې پر مهال د سيند حکومت وکيل ته وويل، دوی چې کومې قانوني نکتې راپورته کړي او کوم دستاويزونه يې وړاندې کړي هغه نيمګړي دي. عدالت حکم ورکړ چې د جون ۱۵مې په اورېدنه کې دې پوره رېکارډ وړاندې کړل شي.

د وال سټريټ جورنال خبريال ډېنېل پرل په په ۲۰۰۲ ز کال کې په کراچۍ کې د تښتونې وروسته وژل شوي وو. پوليسو په دې تور له القاعده سره تړاو لرونکی عمر سعيد شيخ او درې نور کسان نيولي ول. وروسته د کراچۍ ترهګرۍ يو عدالت تورن کسان په مجرم ګرځولو سره سزا کړل.

امریکا کې مظاهره کوونکو ته د ډونالد ټرمپ خبرداری

د امریکا ولسمشر ډونالد ټرمپ

د امریکا ولسمشر ډونالد ټرمپ پیتلې که د دغه هېواد د ریاستونو ګورنران پرېکنده ګام وانخلي نو نسلي ناارامي به په پوځي ځواک ختمه کړي.

نوموړی وايي د بلوو او شوکو بندولو لپاره به ټولې پوځي او سرکاري سرچینې وکاروي.

ولسمشر ټرمپ د جون پر لومړۍ نېټه وویل، که د ریاستونو ګورنران یې سپارښتنې ونه مني نو د نېشنل ګارډ دومره ځواکونه به وګوماري چې تولې لارې کوڅې به ولکه کړي.

نوموړي د مې پر ۳۱مه له تشدده ډکو بلوو غندنه کړې ده.

د امریکا ولسشمر د خانه جنګۍ د وخت یو قانون ترمخه په انتهايي حالاتو کې په هېواد کې دننه هم پوځ ځای پر ځای کولای شي چې زیاتره یې له قدرتي افتونو سره د مبارزې پر مهال کارول شوي دي.

په دغه هېواد کې دا وروستۍ بلوې هله ولګېدې چې د مینيسوټا ریاست په مینیاپولیس ښار کې جارج فلویډ نومې یو بې وسلې تورپوستی تن د پولیس لخوا د نیولو پر مهال ووژل شو.

د فلویډ په وژنه تورن پولیس افسر نیول شوی دی.

غني له پامپیو سره پر افغان سوله غږېدلي

د افغانستان ولسمشر محمد اشرف غني او د امریکا د بهرنیو چارو وزیر مایک پومپیو. انځور له ارشیفه

افغان ولسمشر اشرف غني د امریکا د بهرنیو چارو له وزیر مایک پامپیو سره د ویډیو کنفرانس له لارې د افغانستان سولې بهیر په اړه خبرې کړي.

پامپیو ویلي چې د امریکا اساسي هدف د اوږد مهاله ستراتیژيکو اړیکو د دوام په چوکاټ کې یوموټی، خپلواکه، جمهوري او باثباته افغانستان دی او دې هدف ته د رسېدو لپاره به له افغان حکومت سره یو ځای کار وکړي.

له بلې خوا د افغانستان د سولې لپاره د امریکا ځانګړي استازي زلمي خلیلزاد د جون پر لومړی د انترنیت له لارې خبریالانو ته وویل چې د افغانستان سولې په برخه کې پرمختګ شوی او هیله یې وښوده چې د تاوتریخوالي کچه به ټېټه پاتې شي چې دا راز بین الافغاني خبرې پيل شي.

نوموړي زیاته کړې چې د وړوکي اختر د اوربند وروسته په افغانستان کې د تشدد کچه نسبتاً کمه شوې ده.

نور پورته کړئ

ځانګړې پاڼې

له موږ سره اړیکي

XS
SM
MD
LG