د اګست پېنځمې پر ماښام په کراچۍ کې د هند تر واک لاندې له کشمیر سره د یووالي په موخه د جماعت اسلامي پر لاریون د لاسي بم برید شوی.
رویټرز اژانس د کراچۍ د پولیسو مشر غلام نبي مېمن له خولې وايي چې په برید کې لږ تر لږه ۳۹ کسان ژوبل شوي.
روغتیايي چارواکي وايي ژوبل کسان د ښار بېلا بېلو روغتونونو ته رسول شوي.
د پاکستان انګرېزۍ ژبې ډان ورځپاڼه وايي، پېښه د ښار په ګلشن اقبال سیمه کې د جماعت اسلامي د لاریون له لارۍ سره نېږدې شوې.
ورځپاڼه د یوه پولیس چارواکي ساجد سدوزي له خولې وايي چې پر موټر سایکل سپرو دوو کسانو پر لاریون د لاسي بم برید وکړ.
د ګوند مشر او سېنېټر سراج الحق د چارشنبې پر ماخوستن پر ټوېټر په بیان کې تور پورې کړی چې په کراچۍ کې "هندي اېجنټان" فعاله دي او له کشمیر سره یې د یووالي هڅې زیانمنول غواړي.
رویټرز اژانس وايي، د سیندودېش انقلابي پوځ په نوم یوې بېلتونپالې ډلې د برید ذمه واري منلې چې له تېرو څو میاشتو راهیسې بیا فعاله شوې ده.
پر ټوېټر د سراج الحق بیان
کراچی میں جماعت اسلامی کی یکجہتی کشمیر ریلی پر بم حملہ بزدلانہ کارروائی ہے۔ شہر میں اب بھی بھارتی ایجنٹ موجود ہیں جن سے اہل کشمیر سے اظہاریکجہتی برداشت نہیں ہوا۔ اس طرح کے اوچھے ہتھکنڈوں سے خوفزدہ نہیں ہوں گے۔ اہل کشمیر کی زیادہ جرات کے ساتھ ترجمانی کریں گے۔ #JI_StandsForKashmir
— Siraj ul Haq (@SirajOfficial) August 5, 2020
اسوشيېټېډ پرېس اژانس وايي، په ژوبلو کې د لږ تر لږه یو کس حالت خراب دی.
پېښه پر داسې مهال شوې چې د اګست پر پېنځمه په پاکستان کې د هند تر واک لاندې کشمیر ځانګړي اییني حیثیت یو کال پوره کېدو په مناسبت په هغه هېواد کې یو شمېر احتجاجي لاریونونه وشول.
د ۲۰۱۹ز کال د اګست پر پېنځمه نوي دلي د جمو او کشمیر کورواکي او ځانګړی اییني حیثیت ختم کړل او په بشپړ ډول یې د هند تر اساسي قانون لاندې راوست.
هلته د پاکستان وزیراعظم عمران خان د اګست پر څلورمه د بهرنیو چارو له وزیر شاه محمود قریشي سره یو ځای ولس ته په وینا کې وویل چې د هند تر واک لاندې کشمیر یې په خپله رسمي سیاسي نقشه کې شامل کړی دی.
د هند د بهرنیو چارو وزارت د اګست پر ۴مه په بیان کې دا نقشه د "سیاسي بې عقلۍ اقدام" بللی چې له لارې یې پر هندۍ خاوره "کمزورې دعوې" کول غواړي.
نوی دلی د کشمیر په اړه د تېر کال پرېکړه کورنۍ موضوع بولي او وايي، هېچا ته پکې د مداخلې اجازه نه ورکوي.
پر ۱۹۴۷ز کال د هند نیمه وچې تر وېش او د پاکستان له جوړېدو راهیسې کشمیر د دواړو هېوادونو ترمنځ لانجمن حیثیت لاره.
دواړو هېوادونو د کشمیر پر سر دوه جنګونه هم کړي چې پکې یې په ۱۹۴۸ز کال کې د جګړې په پایله کې د کشمیر یوه برخه پاکستان تر خپل واک لاندې راوسته او بله برخه یې د هند تر واک لاندې شوه.