د پاکستان د بهرنيو چارو وزارت وايي چې وزيراعظم شهباز شريف راتلونکې اوونۍ واشنګټن ته سفر لري چې هلته د غزې تړانګې "د سولې بورډ" په لومړۍ غونډه کې ګډون وکړي.
د وزارت ویاند طاهر اندرابي د فېبرورۍ پر ۱۲مه په اسلاماباد کې خبري غونډې ته وویل چې د فېبرورۍ ۱۹مې غونډه امریکايي ولسمشر ډانلډ ټرمپ پلان کړې ده.
نوموړي وويل چې له وزيراعظم سره د هغه مرستیال او د بهرنيو چارو وزير اسحاق ډار هم واشنګټن ته ځي.
رويټرز اژانس وايي چې ځينې هېوادونه د دې بورډ د غړيتوب په اړه احتياط کوي او کارپوهان اندېښنه لري چې ښايي دا جوړښت د ملګرو ملتونو رول کمزوری کړي. خو امريکا وايي چې تر اوسه تر ۲۰ زيات هېوادونه ورسره په بورډ کې یوځای شوي دي.
د ولسمشر ټرمپ "د غزې د پلان" له مخې، هغه بورډ به د غزې د لنډمهالې ادارې څارنه کوي خو نوموړي وروسته اعلان وکړ چې دا بورډ به د نړيوالو شخړو د حل لپاره هم پراخوي.
اسلاماباد مخکې ويلي چې د دې بورډ غړيتوب د غزې د پلان د ملاتړ لپاره د ملګرو ملتونو د امنيت شورا د چوکاټ برخه ده.
اندرابي په خبرو کې زياته کړه چې اسلام اباد په ښه نيت په هغه بورډ چې "د اتو اسلامي عربي هېوادونو ګډ غږ دی" ورګډ شوی دی.