د پاکستان او اسټرالیا د کرکټ لوبډلو ترمنځ وروستۍ ۲۰ اووریزه لوبه نن په لاهور کې ترسره کېږي.
د پاکستان لوبډلې د دې لوبلړۍ لومړۍ دواړه لوبې ګټلي او جام یې د ځان په نوم کړی دی. پاکستانۍ لوبډلې د جنورۍ پر ۳۱مه په دویمه ۲۰ اووریزه لوبه کې اسټرالیا ته په ۹۰ منډو ماته ورکړه.
پاکستانۍ لوبډلې لومړی بېټنګ وکړ او په ټاکلو ۲۰ اورونو کې یې د پینځو لوبغاړو په سر ۱۹۸ منډې وکړې.
سلمان اغا ۷۶، عثمان خان ۵۳ او شاداب خان ۲۸ منډې وکړې.
په ځواب کې د اسټرالیا ټول لوبغاړي په ۱۶م اور کې د ۱۰۸ منډو له جوړولو وروسته وسوځېدل. تر ټولو زیاتې منډې کېمرون ګرین ۳۵ او مېتیو شورټ ۲۷ منډې وکړای شوې.
د پاکستان له خوا ابرار احمد او شاداب خان ۳، ۳ وکټې واخیستې.
د پاکستان کپتان سلمان اغا په زړه پورې لوبه وکړه
د پاکستان د کرکټ ملي لوبډلې د درو سیالیو د لوبلړۍ په لومړۍ ۲۰ اووره سیالۍ کې هم اسټراليا ته په ۲۲ منډو ماتې ورکړې وه.
د لاهور په قذافي لوبغالي کې د جنورۍ ۲۹مې د سیالۍ پچه پاکستان وګټله او لومړی یې توپ وهنه (بېټينګ) غوره کړه.
پاکستان په ټاکل شويو ۲۰ اوورونو کې د اتو لوبغاړو په زيان ۱۶۸ منډې وکړې.
په ځواب کې د اسټراليا لوبډلې په ټاکل شويو ۲۰ اوورونو کې د اتو لوبغاړو په زيان ۱۴۶ منډې وکړې او ټاکل شوی هدف يې تر لاسه نه کړ.
دا په داسې حال کې ده چې ټاکل شوې د کرکټ د ۲۰ اووره نړیوال جام سیالۍ د فبرورۍ له اوومې بيا د مارچ تر اتمې په هند او سري لنکا کې وشي.