په کراچۍ کې پولیسو د ۲۰۲۰ز کال په یوه مقدمه کې د قامي اسمبلۍ د غړي او د پښتون ژغورنې غورځنګ د مخکښ علي وزیر ګرفتاري په ډاګه کړې ده.
د نوموړي وکیل قادر خان د ډېسېمبر پر ۱۵مه ناوخته مشال راډیو ته وویل چې پولیسو د ډېسېمبر پر ۱۵مه په چارسده کې په دایر شوي رپورټ کې د هغه ګرفتاري ښوولې ده.
دی زیاتوي چې د چارسدې له قضیې سره پر وزیر د ټولو مقدمو شمېر شپږ ته رسېدلی دی.
ده وویل، "د ده یوه [قضیه] ختمه شوې چې پکې هغه باعزت بري شوی دی. پر ده درې کېسونه د کراچۍ دي، په دې درېواړو کې دی په ضمانت دی. له دې علاوه پر [وزیر] درې نورې [مقدمې] دي چې یوه یې میرامشا، بله یې [د ډېره اسماعیل خان او درېیمه یې د چارسدې ده."
پر علي وزیر په مقدمو کې د ریاستي ادارو پرضد د ویناګانو او د خلکو پارولو تورونه دي چې هغه او وکیل یې ردوي.
دا په داسې حال کې ده چې د ډېسېمبر پر ۱۶مه د نوموړي د بند دوه کاله پوره شول. نوموړی د ۲۰۲۰م کال د ډېسېمبر پر ۱۶مه په پېښور کې نیول شوی وو.
د پښتون ژغورنې غورځنګ مشر منظور پښتین د ډېسېمبر پر ۱۵مه ناوخته پر ټویټر لیکلي چې علي وزیر د پوځي جنرالانو په وینا نیول شوی وو.
نوموړي د ارمي پبلک سکول پېښې ته په منسوب یو ټویټ کې زیاته کړې چې علي وزیر د پارلمان غړی دی خو نه پارلمان او نه هم عدالت هغه ته انصاف ورکړی دی.
16 دسمبر۔جو لڑنے گئے تھے انہوں نے ہتھیار ڈال دئےاور جو پڑھنے گئے تھے انکو شہید کر دیا گیا۔مگرجب عام عوام یا عوامی نمائندوں پر جبر کی بات ہو تو 2سال پہلے اِسی دن علی وزیر کو جنرلوں کے کہنے پر گرفتار کیا گیا، پارلمان ممبر ہوتے ہوئے بھی آج تک پارلمان اور عدلیہ انصاف نہ دے سکے۔
— Manzoor Pashteen (@ManzoorPashteen) December 16, 2022
د پېښور پولیسو نوموړی د سیند پولیسو په غوښتنه نیولی وو. د سیند پولیسو پر علي وزیر تور پورې کړی وو چې د دوی په وینا د ۲۰۲۰م کال د ډېسېمبر پر شپږمه یې د کراچۍ په سهراب ګوټ کې د جلسې پر مهال د ملک او ملکي ادارو خلاف خبرې کړې وې.
علي وزیر له هغه راهسې د کراچۍ په زندان کې دی. د ده وکیل او پښتون ژغورنې غورځنګ وايي، چې کله یې په یو مقدمه کې ضمانت وشي نو پولیس ورپسې بله را وباسي.
پښتون ژغورنې غورځنګ د علي وزیر د خوشي کولو لپاره په وار وار جلسې، لاریونونه او پرلتونه وهلي خو نوموړی لا هم نه دی خوشی شوی.
د پښتونخوا ملي عوامي ګوند مظاهرې
پښتونخوا ملي عوامي ګوند د علي وزیر د بند پرضد د ډېسېمبر پر ۱۶مه د پاکستان په بېلابېلو ښارونو کې مظاهرې کوي.
دا اعلان لومړی د پښتونخوا ملي عوامي ګوند مشر محمود خان اڅکزي د ډېسېمبر پر دویمه د عبدالصمد خان اڅګزي د ۴۹م تلین په جلسه کې کړی وو.
محمود خان اڅکزي ویلي وو چې که ریاست علي وزیر د ډېسېمبر تر ۱۶مې خوشی نه کړ نو په ټول ملک او له ملکه بهر چې هر ځای پلویان ولري، هلته به احتجاج کوي.
Mahmood Khan Achakzai will address a protest rally, staged by Pkmap against arbitrary detention of Ali wazir, today in Quetta. The rally will leave the metropolitan park at 2 pm and will be converted into a public demonstration at Bacha khan chok quetta.#PMAPProtests4AliWazir
— Mahmood Khan Achakzai (@MKAchakzaiPKMAP) December 15, 2022
د محمود خان اڅکزي پر رسمي ټویټر پاڼه لیکل شوي چې دی به نن په دې لړ کې په کوټه کې کېدونکې احتجاجي مظاهرې ته وینا کوي.
د سیند حکومت ویاند مرتضا وهاب د ډېسېمبر پر ۱۵مه په یوه پیغام کې مشال راډیو ته ویلي دي چې صوبايي حکومت د نوموړي په ګرفتارۍ او بندي کولو کې لاس نه لري.
نوموړي زیاته کړې چې د علي وزیر پرضد عدالتي کاروايي روانه ده نو ځکه دوی یې د خوشې کولو واک نه لري.