د پاکستان وزیراعظم عمران خان د پنجاب صوبې ګورنر چوهدري محمد سرور له دندې ليري کړی دی.
د اطلاعاتو وفاقي وزیر فواد چوهدري د اپريل په درېيمه پر ټويټر ليکلي چې بل ګورنر به وروسته اعلانيږي خو د اوس لپاره به د قانون ترمخه، د صوبايي اسمبلۍ مرستيال سپېکر ځايناستی ګورنر وي.
وفاقی حکومت نے گورنر پنجاب چوہدری محمد سرور کو ان کے عہدے سے برطرف کر دیا ہے، نئے گورنر پنجاب کا اعلان بعد میں کیا جائیگا، آئین کے مطابق ڈپٹی اسپیکر قائم مقام گورنر ہوں گے
— Ch Fawad Hussain (@fawadchaudhry) April 3, 2022
تر اوسه معلومه نه ده چې محمد سرور ولې له دندې ليري شوی دی. خو د اپوزيشن ګوند، مسلم ليګ (ن) يو مشر شاهد خاقان عباسي ويلي چې محمدسرور ځکه ليري شوی چې وزيراعظم له نوموړي خفه وو چې ولې یې د وزيراعلی لپاره د رايو اچول ونه ځنډول. تر اوسه د دې تور په اړه د حکمران تحريک انصاف څه ونه ويل.
د پنجاب په صوبايي اسمبلۍ کې د وزيراعلی د ټاکلو لپاره غونډه د اپريل په درېيمه راغوښتل شوې ده. د واکمن تحريک انصاف لخوا پرویز الهي او اپوزیشن لخوا حمزه شهباز شريف دې چوکۍ ته نوماند دي.
پنجاب اسمبلۍ ۳۷۱ چوکۍ لري چې پکې د تحريک انصاف او اتحادیانو یې ۱۹۵ دي. ۴ خپلواکه دي. د اپوزېشن غړي ۱۷۲ دي.
عثمان بزدار د پنجاب د مارچ په ۲۸مه د وزیراعلا له څوکۍ څخه استعفا تر هغه څو ساعته وروسته وزیراعظم ته لېږلې وه چې په همدغه ورځ سهار مهال د پنجاب اسمبلۍ کې مخالفه ګوندونو پاکستان مسلم ليګ نواز او پيپلز پارټۍ د عثمان بزدار پرضد د سپيکر په دفتر کې د عدم اعتماد تحريک جمع کړ.
د حکومت مخالفه ګوند مسلم ليګ (نواز) د پنجاب اسمبلۍ غړي رانا مشهود د مارچ پر ۲۸مه نېټه په لاهور کې خبريالانو ته ويلي وو چې دوی سره د حکمران تحريک انصاف کسان هم ملګري دي نو ځکه به دا عدم اعتماد تحريک کامياب شي.