د پاکستان د کرکټ بورډ انتظامي کمېټۍ مشر ذکا اشرف د ۲۰۲۳ز کال اسیا جام د سیالیو مهالوېش اعلان کړی دی چې له مخې یې څلور لوبې په هغه هېواد کې کېږي.
د پاکستان کرکټ بورډ چارواکو او یوشمېر لوبغاړو د جولای پر ۱۹مه په لاهور کې د یوې غونډې پر مهال د اسیايي لوبډلو ترمینځ د کرکټ یو ورځنیو سیالیو د ۱۶م پړاو په اړه معلومات ورکړل او د اتلولۍ جام یې وښود.
له مهالوېش سره سم، د اسیا جام لومړۍ سیالي د اګست پر ۳۰مه په ملتان کې د کوربه لوبډلې پاکستان او نیپال ترمینځ کېږي. ټاکل شوې چې د اتلولۍ (ټورنامېنټ) پایلوبه د سېپټېمبر پر ۱۷مه په کولمبو کې وشي.
د پاکستان او هند لوبډلو ترمینځ سیالي به د سېپټېمبر پر دویمه د سري لنکا په کینډي ښار کې کېږي.
تر دې یوه ورځ وروسته د افغانستان او بنګلادېش لوبډلې د لاهور په قذافي لوبغالي کې یو بل ته مخامخېږي.
پاکستان د اتلولۍ د سیالیو ګډ کوربه دی. ټاکل شوې وه چې پاکستان د اسیا جام د ټولو سیالیو کوربه شي خو هند هغه هېواد ته له خپلې لوبډلې له استولو انکار وکړ چې له کبله یې پاکستان د سیالیو په غبرګ کوربه توب سلا شو.
د اسیا جام په سیالیو کې شپږ لوبډلې برخه اخلي چې پکې په الف ګروپ کې پاکستان هند او نیپال او په ب ګروپ کې افغانستان، سري لنکا او بنګلادېش شاملې دي.
