د خيبرپښتونخوا په ډېره اسماعيل خان کې د قانون ۱۴۴مه ماده عملي شوې او په سيمه کې به د فبرورۍ پر ۲۸مه د ماښام تر شپږو بجو د ولسي خلکو پر تګ راتګ بندیز وي.
د ډېره اسماعيل خان ډېپټي کمیشنر لخوا مشال راډيو ته په رالېږل شوې خبرپاڼه کې ويل شوي دي چې په سيمه کې امنيتي وضعې ته په کتو او د ولس د خونديتوب په خاطر يې په "خاصو سيمو کې ګرځبنديز لګولی دی."
هغه سیمې چې د بندیز لاندې دي، په هغو کې پر ټانک سړک له طارق شهید سيمې څخه تر باګووال پورې علاقې، او همدارنګه د کلاچي، هتله، کوټ اټل او ګره عبدالله پورې سيمې شاملې دي.
په خبرپاڼه کې د امنیتي ګواښ د نوعیت په اړه نور جزیات نه دي په ډاګه کړل شوي. ډېره اسماعیل خان د خیبر پښتونخوا یو له ناارامه سیمو ده.
په دې سیمه کې وخت ناوخته د وسلوالو له خوا د پاکستان پر امنیتي ځواکونو بریدونه، چاودنې او هدفي بریدونه کېږي.
د سیمې خلکو په وار وار د احتجاجونو پرمهال د پاکستان امنیتي ادارې په دې تورنې کړې دي چې د وسلوالو پر فعالیت یې سترګې پټې کړې دي.
خو هغوی دا تورونه ردوي او وايي چې د وسلوالو پرضد یې هدفي عملیات روان دي.
دا په داسې حال کې ده چې پاکستان او افغانستان له څو ورځو راهيسې پر يو بل بريدونو ته دوام ورکړی دی.
