د عمان پولیسو ویلي چې د هغه هېواد په سمندري حدودو کې یوه کښتۍ ډوبه شوې چې پکې درې تنه وژل شوي او دوه ژوبل شوي دي.
فرانس پرېس او رویټرز اژانسونو پر اېکس پاڼه د عمان د پولیسو د یو بیان په حواله لیکلي دي چې په کښتۍ کې د سيلانيانو د لارښود په ګډون ۲۵ فرانسوي سيلانيان سپاره ول چې د عمان له سلطان قبوس بندره څه د پاسه دوه میله لیرې په اوبو کې واوښته.
د اژانسونو په راپورونو کې په کښتۍ کې د موجودو نورو کسانو د وضعیت او د پېښې په اړه نور معلومات نه دې ورکړل شوي، خو پولیسو ویلي چې د پېښې د لامل معلومولو لپاره یې پلټنې پیل کړې دي.
دا په داسې حال کې ده چې د اژانسونو په وینا، عمان ته په وروستیو کې د بهر ملکي سيلانیانو ورتګ زیات شوی دی.
اژانس فرانس پرېس لیکلي چې په ۲۰۲۴ز کال کې هغه هېواد ته نیږدې څلور مېلیونه سيلانيان ورغلي ول او د هغه هېواد حکومت پايښت لرونکي سيلګرۍ ته په پام سره دا هدف لري چې تر ۲۰۴۰ز کاله د سيلانيانو دا شمېر درې چنده زیات کړي.
