د پاکستان د خوړو وزیر رانا تنویر حسېن وايي هېواد یې له چین سره په دوه اړخیزې کرنیزې سوداګرۍ کې پر پانګونې سلا شوی دی.
نوموړي دا څرګندونې د جنورۍ پر ۲۰مه په اسلام اباد کې د چین او پاکستان ترمینځ د کرنیزې سوداګرۍ د پانګونې په اړه د دوه ورځني کنفرانس په پای کې یوې خبري غونډې ته د وینا پر مهال وکړې.
اسلام اباد او بیجېنګ په دې کنفرانس کې د دواړو هېوادونو د خصوصي سېکټورونو ترمینځ د ۴.۵ مېلیاردو ډالرو په ارزښت ۷۸ تفاهم لیکونه لاسلیک کړل.
رانا تنویر حسېن خبریالانو ته وویل چې د تفاهم لیکونو د عملي کولو لپاره په اسلام اباد او بیجېنګ کې ځانګړې څانګې جوړې کړل شوې دي.
د نوموړي په وینا له چین سره په کرنیزو چارو کې د دوی ګډه همکاري به د صادراتو (برامداتو) په زیاتولو کې مرسته وکړي.
حسېن وايي چې په اسلام اباد کې د کرنیزو چارو د پانګونې کنفرانس ته ۱۶ چینايي او ۱۶۵ پاکستاني شرکتونه وربلل شوي ول.
