اوکراین د امریکا هغه وړاندیز منلی چې د روسیې د یرغل پر ضد جګړه کې به د ۳۰ ورځو اوربند کوي.
د دې په ځواب کې، امریکا اعلان وکړ چې سمدلاسه به د پوځي مرستو ځنډ ليرې کړي، چې پکې د استخباراتي معلوماتو شریکول هم شامل دي. دا پرېکړه د مارچ پر ۱۱مه د سعودي عرب په جده ښار کې د نهو ساعتونو د خبرو پایله وه، چې د امریکا د ولسمشر ډانلډ ټرمپ او د اوکراین د ولسمشر ولودیمیر زېلېنسکي ترمينځ تر تلخ ملاقات دوه اوونۍ وروسته یو حيرانوونکی پرمختګ ګڼل کېږي.
د دواړو مشرانو ترمينځ د لفظي شخړې له امله، امریکا اوکراین ته په مرستو کې ځنډ او د استخباراتي معلوماتو پر شريکولو محدودیت اعلان کړی وو. امريکا دا اقدام ځکه کړی وو چې په وينا يې داسې شکونه درلوده چې اوکراین سولې ته ژمن نه دی.
د دواړو هېوادونو په ګډ بیان کې راغلي چې اوکراین د امریکا د وړاندیز منلو ته "چمتووالی" ښوولی، چې له مخې یې سمدستي د ۳۰ ورځو موقتي اوربند اعلان شي. دا اوربند د دواړو خواوو ترمينځ د توافق له مخې تمدید کېدلی شي، خو دا په دې پورې مشروط دی چې روسیه یې ومني او هممهاله یې عملي کړي.
د امریکا ولسمشر ډانلډ ټرمپ په واشنګټن کې خبریالانو ته ويلي وو چې له روسیې سره به غونډه د مارچ پر ۱۱مه یا تر هغې يوه ورځ وروسته وکړي.
د امريکا د بهرنيو چارو وزير مارکو روبیو، چې په سعودي عربستان کې یې د امریکا د ملي امنیت له سلاکار مایک والټز سره يو ځای په مذاکراتو کې برخه اخیستې وه، وویل چې د اوربند پلان اوس د روسیې په واک کې دی. روسيو چارواکو څو ځله ویلي چې دوی د لنډمهاله اوربند یا موقتي هوکړې پر ځای، د سولې يو جامع تړون غواړي.
