د امریکا د بهرنیو چارو وزارت یوې افغانې ښځې ته د ۲۰۲۴ز کال د زړورو ښځو نړیواله جایزه ورکړې ده.
د مارچ پر پینځمه هغه جایزه د بنفشې یعقوبي په ګډون د نړۍ ۱۲ ښځو ته ورکړل شوې. یعقوبي د بشري او معذورانو د حقونو ملاتړې ده.
د افغانستان د نجونو، ښځو او بشري حقونو لپاره د امریکا ځانګړې استازې رینا امیري او د افغانستان لپاره د امریکا شارژدافېیرې کیرن ډېکر پر اېکس، چې پخوا یې نوم ټوېټر وو، بنفشې یعقوبې ته د جایزې مبارکي ورکړې او ویلي یې دي چې هغې په یو داسې هېواد کې د معذورانو د حقونو ملاتړ لپاره کار کړی دی چې پکې د څلورو لسیزو په جګړو کې ګڼ وګړي معلول شوي دي.
د امریکا د بهرنیو چارو وزارت یعقوبي ته د جایرې ورکولو ترڅنګ په افغانستان کې د بشري حقونو او ښځو د حقونو نور ملاتړي هم ستایلي دي.
وزارت پر خپله ووبپاڼه په بیان کې لیکلي دي چې یعقوبي خپله هم د دید یا بینایۍ معذوري لري او له اوږدې مودې راهیسې یې د تشدد ښکار ښځو د وکیلې په توګه د هغوی د حقونو دفاع کړې ده.
په بیان کې راغلي چې هغه له ۲۰۰۸ز کال راهیسې له خپل مېړه سره یو ځای نابینا او د دید معذورۍ لرونکو ماشومانو ته د درملنې او تعلیم ورکوي او پر ټېلېوېژن د معلولیت په اړه د اګهۍ خپرولو لپاره خپرونه کوي.
د امريکا د بهرنيو چارو وزارت له ۲۰۰۷ز کال راهیسې د زړورو ښځو نړیواله جایزه ورکوي چې تر اوسه پورې د ۹۰ هېوادونو ۱۹۰ ښځو ګټلې ده.
