د ایران یو پوځي چارواکي ویلي دي چې روانه اوونۍ په زرګونه بې اسناده افغانان له هغه هېواده ایستل شوي دي.
د ایران د خراسان رضوي ولایت د سرحدي ځواکونو قومندان سردار مجید شجاع د ډېسېمبر پر ۱۴مه اېرنا اژانس ته وویل چې روانه اوونۍ یې شاوخوا ۸،۰۰۰ افغانان هېواد ته لېږدولي دي.
د اژانس په وینا چې په تېرو میاشتو کې له ایرانه څه باندې ۳۰۰،۰۰۰ بې اسناده افغانان ایستل شوي دي.
دا په داسې حال کې ده چې د نومبر په پیل کې پاکستان هم د بې اسناده افغانانو د ایستلو بهیر پیل کړ. د ملګرو ملتونو د کډوالو ادارې (یو اېن اېچ سي ار) او د پاکستان د کورنيو چارو وزارت د شمېرو له مخې، د ډېسېمبر تر ۱۴مې، شاوخوا ۵۰۰،۰۰۰ افغانان خپل هېواد ته لېږدول شوي دي.
د ایران د بهرنیو چارو وزیر حسین امیر عبداللهیان په وروستیو کې په جینیوا کې د کډوالو په اړه یوې غونډې ته په وینا کې له نړیوالې ټولنې وغوښتل چې د افغانستان د بنسټونو په رغونه کې ونډه واخلي چې ورسره افغان کډوال خپل هېواد ته ستانه شي.
