په هند کې د ۵۰ اووره يا يو ورځني کرکټ نړيوال جام سیاليو کې نن (د اکتوبر پر ۲۵مه) اسټراليا او نېدرلينډز (هالينډ) له يو بل سره سيالي کوي.
د ډېلي په ارون جېټلي نړیوال لوبغالي کې دا سيالي د پېښور پر وخت د ماسپښین پر یوه نیمه او د کابل پر يوه بجه پيلېږي.
تر دې وړاندې د اکتوبر پر ۲۴مه جنوبي افريقا بنګلادېش ته په ۱۴۹ منډو ماتې ورکړه.
سبا انګلينډ او سري لنکا يو بل ته مخامخېږي. د اکتوبر پر پينځمه پيل شوې د کرکټ نړيوال جام سيالۍ به د نومبر تر ۱۹مې روانې وي.
په دې سياليو کې ۱۰ لوبډلې برخه اخلي. د دې سياليو په لومړي پړاو کې به هره لوبډله له نورو لوبډلو سره سیالي کوي او په پای کې به د سر څلور لوبډلې نيمه پايلوبې او بيا وروسته به دوه لوبډلې پايلوبې ته لاره مومي.
