د لاسرسي ځای

تازه خبر

د امریکا ولسمشر د "جي۲۰" غونډې په څنډو کې له هندي وزیراعظم سره کتلي


د سېپتېمبر پر اتمه د هند وزیراعظم نریندرا مودي (ښي لور ته) له امریکایي ولسمشر جوبایډن سره په نوي ډیلي کې د خبرو په مهال.

د امریکا ولسمشر جو بایډن د نړۍ د شتمنو هېوادونو ( جي ۲۰) په سرمشریزه کې د ګډون لپاره هند ته رسېدلی او له هندي وزیراعظم نرېندرا مودي سره یې کتلي دي.

مودي د سېپتمبر پر اتمه پر اېکس چې پخوانی نوم یې ټویټر لیکلي چې په نوي ډیلي کې یې له ولسمشر بایډن سره وکتل او په یو شمېر موضوعاتو یې خبرې وکړې. مودي ویلي له دې خبرو اترو سره به د هند او امریکا اړیکې نورې هم ژورې شي.

د هند په نوي ډیلي کې د سېپټېمبر پر نهمه د جي ۲۰ غونډه پيل شوه. په غونډه کې د ګډون لپاره جو بایډن د سېپتمبر پر اتمه هند ته ولاړ.

دا په داسې حال کې ده چې د نړۍ د ځواکمنو هېوادونو ډله په اوکراین کې د روسیې له جګړې څخه د ماحولیاتي بدلون پورې په ډیرو مسلو ویشل شوې ده او هېوادونه لا تر اوسه په نوي ډیلي کې د غونډې لپاره په حتمي بیانیه موافقې ته نه دي رسیدلي.

ولسمشر جو بایډن د سېپټمبر پر اتمه پر اېکس چې پخوانی نوم یې ټویټر وو، ولیکل چې هغه د امریکايي لومړیتوبونو پر مخ بوتللو او پرمخ تلونکو هېوادونو سره په مرستو متمرکز دی. نوموړي د یو فورم په توګه جي۲۰ ته خپله ژمنتیا وښووله او ویې ویل چې دا ډله نتیجې ښوولې شي.

۸۰ کلن امریکايي ولسمشر به د سېپټمبر په ۱۰مه ویتنام ته هم سفر وکړي چیرې چې تمه کیږي هغه، د مخ په زیاتیدونکي چینایي اغیز په شا د تمبولو لپاره له خپل پخواني دښمن هېواد سره اړیکې ښه کړي.

د چین ولسمشر شي جينپېنګ او د روسیې ولسمشر ولادمیر پوتین په دې غونډه کې برخه نه اخلي.

بیجینګ دلیل نه دی ښودلی خو ویلي یې دي چې لومړی وزیر لی کیانګ به په غونډه کې ګډون وکړي.

دا په داسې حال کې ده چې د اوکراین جګړې له کبله د روسیې او لویدیځ اړیکې خرابې دي. کرېملین د سېپټېمبر پر اوومه وویل چې ولسمشر ولادمیرپوتین غونډې ته د ویډیويي وینا پلان هم نه لري.

XS
SM
MD
LG