د خیبر پښتونخوا په ټانک کې پوليس وايي چې د اګست پر ۱۱مه په منزۍ سیمه کې وسله والو يو قبایلي مشر ملک حبیب شوبيخېل له خپل پولیس ساتونکي سره په ډزو وژلی دی.
د ټانک د پوليسو مشر وقار احمد د اکست پر ۱۱مه مشال راډيو ته وويل چې مخ پټو موټر سايکل سپرو وسله والو لومړی د ملک حبيب ساتونکی وژلی او بیا یې تښتولی دی.
دوي وايي، "دی کور ته روان وو چې موټر سايکل سپرو يې لومړی پولیس ساتونکی وواژی او بیا يې ملک حبيب وتښتاوه، خو په لار کې پرې د پوليسو شک شو او ورپسې شو ، موټر سايکل سپرو پر پوليسو هم ډزې وکړې خو بیا جنډولې سړک سره د ملک حبیب مړی پروت وو."
پولیس وايي پلټنې يې پیل کړې دي. بلخوا په سیمه کې د پښتون ژغورنې غورځنګ يو ځايي مشر زوهيب پښتين ويلي چې په سیمه کې د هدفي وژنو د مخنيوي او د امنيت ذمه واري د حکومت او پوځ ده او بايد دوي خپلې ذمه وارۍ پوره کړي.
تر دا مهال د ملک حبيب د وژنې ذمه واري چا نه ده منلې.
