د پاکستان وزیراعظم پر اسلامي هیوادونو غږ کړی چې په سویډن کې د قران پاک د بې حرمتۍ پرضد په ملګرو ملتونو او نورو ټولو نړیوالو ادارو کې خپل اواز اوچت کړي.
شهباز شریف دا څرګندونې د جولایي پر شپږمه په اسلام اباد کې د پارلېمان ګډې غونډې ته د وینا پر مهال کړې دي.
نوموړي وویل، دا اقدام ځکه ضروري دی چې په راتلونکې وخت کې څوک د داسې ګام پورته کولو جرات پیدا نه کړل شي.
ده د اسمبلۍ سپیکر ته په اشاره وویل، " تاسو ته خواست کوم چی یوه کمیټۍ جوړه کړئ چې په راتلونکي کې د داسې خراب حرکت د خاتمې لپاره سپارښتنې جوړې کړي."
شهباز شریف زیاته کړه چې نه یوازې به د پاکستان بلکې نړیوالو ادارو ته به هم هغه سپارښتنې رسوي چې د ده په وینا داسې پېښې بیا تکرار نه شي.
د پاکستان وزیراعظم په خپله وینا کې دا هم وویل چې د ملګرو ملتونو له سرمنشي انتونیو ګوتېرېش سره به اړیکه نیسي او ورنه به غواړي چې پر دې موضوع دې غونډه را وبلي.
د ده په وینا، په هغه غونډه کې دې د اسلامي هیوادونو مشرانو ته بلنه ورکړي چې د سویډن په پلازمېنه سټاکهولم کې د رامنځ ته شوې دې پېښې په اړه خپل دریځ نړۍ ته ښکاره کړای شي.
بل پلو، د پاکستان د پارلېمان په شریکه غونډه کې منظور شوي قرارداد له اړوند نړیوالو ادارو او ریاستونو غوښتنه شوې چې د مذهبي شخصیتونو، مقدسو کتابونو او عبادت ځایونو د بې حرمتۍ د مخنیوي لپاره دې اقدامات وکړي.
دا په داسې حال کې ده چې د جولايي پر اوومه په پاکستان کې د قران مجید د تقدس ورځ لمانځل کېږي. وزیراعظم شهباز شریف امر کړی چې د جمعې تر لمانځه وروسته دې د یادې پېښې پرضد احتجاج وکړای شي.
د پاکستان په ګډون ګڼو اسلامي هېوادونو په سویډن کې د قران سوځونې پېښه غندلې او دا یې په څرګنده توګه له نړیوالو قوانینو سرغړونه بللې ده.
د جون پر ۲۸مه د سویډن په پلازمېنه سټاکهولم کې یو کس د قران مجيد پاڼې وسوځولې چې د نړۍ په یو شمېر اسلامي هېوادونو کې يې غبرګونونه وپارول.
د سویډڼ پولیسو په څو ځله د مسلمانانو ضد احتجاج کوونکو ته د مظاهرو له اجازت ورکولو انکار کړی خو عدالت هغوی ته ویلي چې څوک له احتجاج کولو ګرځول د بیان ازادۍ حق تر پښو لاندې کول دي.
