د اوکراین پوځ وايي روسیو ځواکونو د جون پر ۱۰مه په بشپړه توګه د دونېڅک او لوهانسک سیمو نیولو ته توجه ورکړې وه.
د اوکرایني پوځ مشر ویلي چې په هغو سیمو کې په روانه جګړه کې "له بده مرغه په وژل شویو او ټپیانو کې ولسي وګړي شامل دي،" او شخصي کورونه، ولسي او انتظامي ځایونه زیانمن او ویجاړ شوي دی.
خو مشال راډیو په ازاده توګه د جګړې له ډګره د دې دعوو تصدیق نه شي کولای.
د اوکراین ولسمشر وولودیمیر زېلېنسکي تر دې وړاندې په کییف کې د کاناډا له وزیراعظم جسټن ټروډو سره شریکې خبري غونډې ته وویل چې ځواکونو یې د روسي پوځ د عملیاتو مخنیوي ته دوام ورکړی دی خو په دې اړه یې نور معلومات ور نه کړل.
