د ګلګت بلتستان په استور ضلع کې د واورې ګټ راپرېوتو د ماشومانو او ښځو په ګډون نهه کسان وژلي او ۲۵ یې ژوبل کړي دي.
د پاکستان ډان رسنۍ د ديامير پوليسو مرستيال مشر طفيل مير له خولې وايي چې د مې پر ۲۷ سهار وختي د سختو بارانونو له کبله په شونټر تحصيل کې د واورې ګټ راپريوتی دی.
نوموړی وايي په پېښه کې له کشمير سره تعلق لرونکې کورنۍ زيانمنه شوې ده.
د ګلګت بلتستان اعلا وزير خالد خورشيد په خپل يو ټويټ کې پر ياده پېښه خپګان ښودلی او د ژغورنې ادارو ته يې امر کړی چې زر تر زره ځان د پېښې ځای ته ورسوي.
خو پاکستاني رسنۍ د ديامير پوليسو د مرستيال مشر په حواله وايي چې د پېښې ځای ته په رسېدو کې ډېر مشکلات دي.
د ده په خبره دا ځکه چې دغه لرې پرته سيمه ده او هلته تلونکې لارې خرابې دي او په سيمه کې د مواصلات نظام هم نشته.
ياده دې وي چې مخکې هم د پاکستان په واورينو سيمو کې داسې پېښې رامنځته شوې دي چې پکې ډېرو کسانو ته مرګژوله اوښتې ده.
