د قطر وزیراعظم محمد بن عبدالرحمان آل ثاني په کندهار کې د طالبانو د سرپرست حکومت له رییس الوزرا ملا محمد حسن اخوند سره لیدلي دي.
د طالبانو حکومت ویاند ذبیح الله مجاهد تر لیدنې وروسته پر خپل ټوېټر لیکلي چې آل ثاني د یو پلاوي په مشرۍ له اخوند سره وکتل. د هغه په خبره، په پلاوي کې د قطر د استخباراتو مشر عبدالله الخلیفي هم شامل دی.
قطر د امریکا او طالبانو ترمینځ مذاکراتو کې مهم رول لوبوي.
محمد بن عبدالرحمان آل ثاني د قطر د وزیراعظمۍ ترڅنګ د هغه هېواد د بهرنیو چارو وزیر هم دی.
ذبیح االله مجاهد وايي چې دواړو خواوو د تعلیم او صحت په ګډون په مختلفو برخو کې د همکارۍ زیاتولو ژمنې وکړې.
د طالبانو حکومت په بیان کې له دې پرته نور معلومات نه دي ورکړي.
