په افغانستان کې طبیعي پېښو ته د رسېدو په چارو کې د طالبانو د دولت وزارت وایي، وروستیو سېلاوونو په بېلابېلو ولایتونو کې څه باندې ۹۰۰ کورونه ویجاړ کړي دي.
د وزارت ویاند شفیع الله رحیمي د مارچ پر ۲۹مه مشال راډیو ته وویل چې په سېلابونو دغه شمېرې يې د لومړنيو معلوماتو پر اساس خپرې کړې دي.
د نوموړي په وینا، د ۹۰۰ کورونو د ويجاړېدو په ګډون درې کسان مړه شوي او ۲۲،۰۰۰ زرعي ځمکه يې هم خرابه کړې ده.
دغه زیانونه د افغانستان په ۱۴ ولایتونو کې اوښتي دي چې پکې د هېواد مرکزي سیمې او ټول زونونه شامل دي.
د ملګرو ملتونو دبشري مرستو د همغږۍ ادارې (اوچا) هم ویلي چې مرستندویه ادارې د سېلابونو د اغېز او بیړنیو مرستو ارزونه کوي.
