د بلوچستان د کروندګرو اتحادیې د مارچ پر دويمه د بجلۍ لوډشېډنګ ضد کاربندیز کړی او د صوبې یوشمېر مهمې لويې لارې يې تړلې دي.
یوشمېر کروندګرو مشال رېډیو ته ویلي چې په ۲۴ ساعتونو کې یوازې دوه ساعته برېښنا لري او د نشتوالي له کبله يې باوړۍ (ټيوب ويلونه) نه چلېږي. د دوی په خبره، فصلونو ته په کافي اندازه اوبه نه شي ورکولی او هم دې امله يې باغونه خرابېږي.
اخوا په کوټه کې د پاکستان د اوبو او برېښنا چارو ادارې (واپډا) یوه چارواکي محمد افضل مشال رېډیو ته ويلي چې کروندګر د بجلۍ بېلونه نه پرې کوي نو ځکه یې ورباندې برېښنا بنده کړې ده.
نوموړي زیاته کړې چې د واپډا او کروندګرو ترمينځ د شوې پرېکړې له مخې به يې پخوا په ۲۴ ساعتونو کې شپږ ساعته بجلي ورکوله، خو د بېلونو نه ورکولو له کبله ورته اوس یوازې دوه ساعته بجلي ورکوي.
په کوټه کې د برېښنا د وېش او لېږد اداره (کېسکو) په تازه بیان کې ويلي چې د روان ۲۰۲۳ز تر جنورۍ پورې يې کروندګر د بجلۍ بېلونو په برخه کې ۳۸۳ اربه روپۍ پوروړي ول.
