په پاکستان کې له کوټې څخه پېښور ته په تلونکي اورګاډي کې چاودنه شوې چې پکې یوه ښځه وژل شوې او درې تنه ژوبل دي.
د پاکستان رسنۍ وايي، چاودنه د فبرورۍ پر ۱۶مه د ملتان ډېوېژن له چیچه وطني سیمې سره نېږدې د اورګاډي په څلورمه ډبه کې شوې ده.
د انګرېزۍ ژبې ډان ورځپاڼه لیکي چې پولیسو د وژل شوې ښځې جسد او ژوبل کسان روغتون ته لېږدولې دي.
ورځپاڼه د اورګاډو ادارې د ویاند بابر علي له خولې وايي چې د جعفر اېکسپرېس په نوم په اورګاډي کې چاودنه د ګیس ډبې یا سیلېنډر چاودېدو له وجې شوې ده.
دی زیاتوي، مساپرو سیلېنډر په خپل سامان کې پټ تشناب ته وړی وو.
تر اوسه معلومه نه ده چې د پېښې په تړاو څوک نیول شوي او که نه.
تر دې مخکې د ۲۰۱۹ز کال په اکتوبر کې له کراچۍ څخه راولپېنډۍ ته په تلونکي اورګاډي کې د سیلېنډر چاودنې له کبله د اور لګېدو په پېښه کې ۷۳ کسان وژل شوي او ۴۰ ژوبل شوي ول.
هغه مهال چارواکو ویلي ول چې مساپرو په رېل ګاډي کې د سباناری (ناشته) پخوله چې سیلېنډر وچاودېد او له کبله یې اور ولګېد.
