د لاسرسي ځای

تازه خبر

ملګري ملتونه: طالبان دې د نجونو پر تعلیم لګول شوي بندیزونه ژر تر ژره ليرې کړي


په کابل کې د زده کړو او کار په ملاتړ د ښځینه معترضانو د اعتراض یو انځور: انځور له ارشیفه

افغانستان ته د ملګرو ملتونو د سازمان تللی لوړپوړی پلاوی دې هېواد ته د خپل سفر په پای کې له طالبانو غواړي چې پر افغان نجونو او ښځو لګول شوي بندیزونه او محدودیتونه ژر لغوه کړي.

په یاد پلاوي کې د دې سازمان د سرمنشي مرستیاله امینه محمد، د ښځو په چارو کې د دې سازمان اجرایوي مشره سیما باهوس او په سیاسي او د سولې په چارو کې د ملګرو ملتونو د سرمنشي د دفتر رییس خالد خیاري شامل وو.

په افغانستان کې د ملګرو ملتونو سازمان مرستندويه دفتر یا یوناما تېره شپه (د جنورۍ په ۲۰مه) ناوخته یوه خبرپاڼه کې د دې پلاوي له قوله ولیکل، پر افغان نجونو او ښځو اوسني لګېدلي بندیزونه هغو میلیونو انسانانو ته د مرستو رسول زیانمنوي چې دې مرستو ته بېړنۍ اړتیا لري.

خبرپاڼه کې د ملګرو ملتونو سازمان د سرمنشي د مرستیالې امینه محمد له قوله زیاته شوې، بندیزونه او محدودیتونه نجونې او ښځې په کور کې زنداني کوي، بشري حقونه یې زيانمنوي او ټولنه یې له خدماتو محروموي.

XS
SM
MD
LG