د افغانستان لپاره د ملګرو ملتونو د مشر ځانګړې استازې او د ملګرو ملتونو د مرستندویه ماموریت (یوناما) مشرې روزا اوتنبایېوا ویلي د طالبانو حکومت ته یې د نړيوالو خبرداری رسولی دی.
هغې د جنورۍ پر ۱۱مه پر ټوېټر ليکلي چې طالبان باید د ښځو پر ضد "خپل شدید کمپاین پای ته ورسوي."
نوموړې زیاته کړې چې په دې اړه یې د نړۍ خبرداری د طالبانو د حکومت د بهرنیو چارو سرپرست وزیر امیرخان متقي ته رسولی دی.
یوناما په بیان کې لیکلي، طالبان باید د ښځو پر زده کړو او کار لګول شوي بندیزونه لغوه کړي چې د افغانستان د بې ثباتۍ او بې وزلۍ ستونزه لا پراخه نه شي.
د جنورۍ پر ۱۱مه، په کابل کې د ملګرو ملتونو مرستيال استازي مارکوس پوتزل هم د نجونو د تعلیم په تړاو د طالبانو حکومت بهرنیو چارو وزارت له مرستیال شېر محمد عباس ستانکزي سره کتلي دي.
عباس ستانکزي تېره اوونۍ یوې غونډې ته په وینا کې ویلي ول چې د طالبانو د مشر یوازې هغه فرمانونه باید عملي شي چې شرعي بنسټ ولري.
طالبانو د ۲۰۲۲ز کال د ډېسېمبر په وروستیو کې یې د نجونو لوړې زده کړې تر دویم اعلان پورې وځنډولې او په ناحکومتي ادارو کې یې ښځې له کاره منع کړې.
د طالبانو دا اقدامات له پراخ نړیوال غبرګون سره مخامخ شول خو هغوی تراوسه د نړیوالو پرله پسې غوښتنو ته مثبت ځواب نه دی ویلی.
