د بلوچستان په مچ سیمه کې وسلوالو شپږ کان کیندونکي تښتولي دي.
په مچ کې د کان کیندونکو د اتحادیې مشر اقبال یوسفزي مشال راډیو ته وویل چې هغوی د نومبر پر ۱۳مه تښتول شوي او ټول پښتانه دي. د ده په وینا، څلور د خیبر پښتونخوا د شانګلې، یو د مچ او بل د افغانستان دی.
د مچ یو انتظامي چارواکي د نوم نه ښوولو په شرط مشال راډیو ته وویل چې تر پېښې وروسته یې امنیتي ګامونه پورته کړي او د تښتول شویو لټون روان دی. تر اوسه چا د پېښې ذمه واري نه ده منلې.
