د روغتیا نړیوال سازمان (ډبلیو اېچ او) خبرداری ورکړی دی چې د پاکستان په سیند کې سېلاب ځپلې سیمې د ناروغیو له کبله د دویم ناورین ښکار کېدو له خطر سره مخامخ دي.
د سازمان مشر تېدروس اېدهانوم ګیبریېسس د سېپټېمبر پر ۱۷مه ناوخته په خبرداري کې ویلي دي چې په سېلاب ځپلو سیمو کې څښاک پاکې اوبه نه شته او د ناولو اوبو څښلو له وجې خلک د هیضې (نس ناستي او قي یا کولرا) او یوشمېر نورو ناروغیو ښکار شوي دي.
ده پر مرسته کوونکو غږ وکړ چې له اغېزمنو سره دې کومکونو ته په دوام ورکولو د خلکو ژوند وژغوري او ورته دې له لا نورو تکلیفونو رسېدو مخه ونیسي.
هلته په سیند صوبه کې د روغتیا ادارې په یوه تازه رپورټ کې ویلي دي چې په سېلاب ځپلو سیمو کې د شاوخوا ۲۵ لکه ناروغانو درملنه شوې ده او نورو ډېرو درملو ته اړتیا لري.
تر سېلابونو وروسته په خیبر پښتونخوا او بلوچستان کې هم ګڼ خلک د هیضې او نورو ناروغیو ښکار شوي دي.
