د اېشیا جام په نوم د ۲۰ اووریزه کرکټ اتلولۍ په لړ کې د پاکستان او افغانستان ملي لوبډلې یو بل ته مخامخېږي.
دا سیالي پېښور پر وخت د ماښام پر اووه او د کابل پر شپږ نیمو بجو د متحده عربي اماراتو په شارجه کې پیلېږي.
د پاکستان او افغانستان ترمینځ د سېپټېمبر اوومې سیالي خورا مهمه بلل کېږي.
دا په داسې حال کې ده چې د سېپټېمبر پر شپږمه سري لنکا د څلور غوره لوبډلو د پړاو په سیالۍ کې هند ته په شپږو وېکټو ماتې ورکړه.
هندۍ لوبډلې په لومړي بیټېنګ کې سري لنکا ته د ۱۷۴ منډو هدف ورکړ. په ځواب کې یې سري لنکایۍ لوبډلې په وروستي اوور کې د څلورو لوبغاړو په سوځېدو ټاکلی هدف پوره کړ او پایلوبې ته یې لاره ومونده.
د څلور غوره لوبډلو په پړاو کې تر اوسه پاکستان خپله یوه سیالي ګټلې، افغانستان خپله لومړۍ هغه بایللې او هند دواړه سیالۍ بایللې دي.
ټاکل شوې چې د اېشیا کپ په نوم د اتلولۍ پایلوبه د سېپټېمبر پر ۱۱مه وشي.
اېشیا کرکټ کپ په لومړي ځل په ۱۹۸۴ز کال کې شوی وو او په وروستي ځل په ۲۰۱۸ز کال کې هند ګټلی وو.
